2 CRÓNICAS 17

1Oc Josafat te rey te t-xel Asa aju ktzan tman, ex oc tipun Josafat tu'n tk'ojin cyi'j aj Israel. 2Ex e cub tk'o'n ke soldad cyuj cycyakil tnam toc muro cyi'j tuj Judá, ex tuj tcyakil tx'otx' Judá, ex cyuj ke tnam cye aj Efraín, akeju otok cub cyi'j tu'n Asa aju ktzan tman. 3O onin Kman ti'j Josafat porque o tbincha ic tza'n o tbincha David t-xe tnejel, aju ktzan t-xe'chel, ex minti' oc ten c'ulul cywitz ke tilbilal Baal, 4nok o'cx ajben te Dios aju Tdios ktzan tman, ex e japun ke tmandamyent tu'n, ex minti' oc lpe' ti'j cybinchben aj Israel. 5Cyja'tzun tzaj tk'o'n Kman tipun tcawbil, ex cycyakil aj Judá pon cyi'n oyaj te. Ten nim tk'inumabl ex nimbilte. 6Nim tgan tu'n tbet tuj tbe Kman, ex e el ti'n ke lugar tuj Judá jatum in che c'ulun ke xjal cywi' ke witz, cyuc'ix ke tilbilal xu'j dios Asera. 7Tej otok bant ox abk'i ttzyetlen tcawin Josafat, e je'x t-sama'n ke xjal ma' cyoclen ttxlaj, ex atzun ke jlu: Ben-hail, Abdías, Zacarías, Natanael, ex Micaías, tu'n t-xi cyk'o'n xnak'tzbil cye ke xjal cyuj ke tnam at tuj Judá, 8ex cyuc'il ke jlu e je'x ke aj Leví lu: Semaías, Netanías, Zebadías, Asael, Semiramot, Jonatán, Adonías, Tobías ex Tobadonías, ex cyuc'ix ke pal Elisama ex Joram e je'x cyuc'il. 9E je'x t-sama'n ex k'i'ntok aju libro cyu'n jatum tz'iban tley Kman tuj, tu'ntzun t-xi cyk'o'n xnak'tzbil cye aj Judá, ex baj cybetin cyuj cycyakil tnam at tuj Judá, in cyk'o'ntok xnak'tzbil cye tnam xjal. 10Cycyakil keju in che cawin cyuj ke nasyon ate' ti'jele Judá tzaj nim cyxobil twitz Kman ex minti' e oc ten k'ojlel ti'j Josafat. 11Nokpe at junjun cyxol aj Filistey pon cyi'n oyaj te Josafat ex pon cyi'n sak pwak te chojenj, ax icx ke aj Arabia pon cyi'n wuk mil tuc'il wuk syent tman ẍne'l, ex wuk mil tuc' wuk syent tman chip. 12Nok cyja' o ch'iy tipumal tcawbil Josafat. E jaw tbincha'n ke ja ma' cywa'l te xk'ukbil cye tnam at tuj Judá, ax icx e jaw tbincha'n ke tnam jatum tu'n t-xi c'u't twitz awal cyuj. 13Ex o ten nim tk'inumabl cyuj ke tnam at tuj Judá, ax icx tuj Jerusalén e ten nim t-soldad cyuw cyc'u'j tuj k'oj, 14ex atzun cyajlal jlu ic tza'nx junjun c'loj cyiyjil: Cyxol tiyjil Judá, aju comandant cye ke nejenel at jun milchak soldad tuj cycwent, atzun Adnas, ex attok ox syent mil soldad tuj tcwent, cyuw cyc'u'j tuj k'oj. 15Aju tcabin comandant, atzun Johanán; ate Johanán at cab syent tuc'il 80 mil soldad tuj tcwent, 16aju toxin comandant, atzun Amasías aju tcy'ajal Zicri; ate xjal lu tu'n tex tgan otok txi tk'on tib tu'n tajben te Kman, ex at cab syent mil soldad tuj tcwent, cyuwxix cyc'u'j tuj k'oj. 17Cyxol ke tiyjil Benjamín, aju comandant atzun Eliada; aju xjal lu cyuw tc'u'j tuj k'oj ex attok cab syent mil soldad tuj tcwent, banin cyten tuc'il xobl cyplech ex cymakbil, 18atzun juntl comandant, atzun Jozabad, ex attok jun syent tuc'il 80 mil soldad tuj tcwent, banin cyten tu'n cyxi' tuj k'oj. 19Atzun ke jlu in che ajben te rey ex minti' e oc te tajlal akeju otok che cub tk'o'n rey cyuj cycyakil tnam toc muro cyi'j at tuj Judá.

will be added

X\