2 CRÓNICAS 13

1Tzyettzun tcawin Abías tuj Judá tej otok bant wajxak laj abk'i ttzyetlen tcawin Jeroboam cyibaj aj Israel, 2ex o cawin Abías ox abk'i tuj Jerusalén. Aju ttxu', Micaías tbi, ex tme'jel Uriel aju aj Gabaa. Oc k'oj cyxol Abías tuc'il Jeroboam. 3Tzyettzun k'oj tu'n Abías cyuc'ix cyaje syent mil soldad otok che jaw t-sc'o'n. Ax icx te Jeroboam bant tten tu'n tk'ojin ti'j Abías, cyuc'ix wajxak syent mil soldad sc'o'maj tu'n. 4Tejtzun cypon ke soldad aj Judá twi witz Zemaraim aju tcub tuj tiwitz tx'otx' cye aj Efraín, xi sch'in rey Abías ti'j rey Jeroboam ex cyi'j aj Israel ex xi tma'n cyja': Chin cybintze: 5¿Minti'pe ba'n cyu'ne, ate Kman aju Cydios aj Israel o txi tk'o'n ju cawbil te jumajx te David ex cye ke tiyjil, ex aju yol o tzaj ttziyan Dios te David mlay ch'expet? 6Pero ate Jeroboam aju tcy'ajal Nabat ex tmajen Salomón, jaw ti'n tib ti'j Salomón aju tcy'ajal David, 7ex oc cychmon cyib junjun xinak tuc'il, cy'aj ke ex mya ba'n cymod, ex mas ic' nej cyyol twitz tyol Roboam aju tcy'ajal Salomón, porque ate Roboam matok cu'xunx ex na'nxtok tbant t-ximan ti'j alcye tu'n tbant tu'n. Cyja'tzun minti' ten tipun tu'n twe' cywitz. 8Atzun ja'lo cyaje tu'n tcub ti'j tcawbil Kman cyu'ne, aju at tuj cyk'ab ke tiyjil David, nok tu'nju nimxix cyeye cybet ex tu'nju at ke cyilbilal tal wacẍ k'an pwak cyuc'ile, akeju e cub tbincha'n Jeroboam tu'n cyoc te cydiose. 9Ax icx o tz'ex cylajo'ne ke pal te Kman, akeju tiyjil Aarón, cyuc'ix ke aj Leví, ex o tz'oc cyk'o'ne cyoclen junjun xjal te pal tu'n cyajben cyxole ic tza'n in cybincha'n ke nasyon mya nimal Dios. Nok alcye jun xjal ma tzul xjansal tib k'i'n jun tal wacẍ tu'n tuc'ix wuk ẍne'l, jacu tz'oc te pal tu'n tajben cye ke tilbilal nno'c cydiosine. 10Atzun keye, aju Kdiose a Kman, ex minti' ma cyaj kcoline. Akeju keye kpal in che ajben te Kman, tiyjil Aarón ke ex atzun ke aj Leví in che onin cye; 11tcyakil prim ex tcyakil kale in xi cyk'o'n ke oyaj patun in che cub te Kman, tuc'ix storac, ex in che cub cyk'o'n ke pan twi mes xjansamaj, ex tcyakil kale nno'c cytxako'n ke candil tu'n cyc'ant twi cycubil k'an pwak cytx'otx'il. Porque keye in japun ku'ne aju in tzaj tma'n Kman aju Kdiose, atzun cyeye ma cyaj cycoline. 12Tz'elx cynic'e ti'j, ate Dios at kuc'ile tu'n tcub nej kwitze, ex ke pal in che ajben te banin cyten tu'n toc cyk'ajtza'n ke chun tu'n toc k'oj ku'ne cyuc'ile. Cyja'tzun, akeye aj Israel, mi'n che k'ojine ti'j Kman aju Cydios ktzan kxe'chel, porque mlay cub ti'j cyu'ne, chi Abías. 13Pero e je'x t-sama'n Jeroboam txkan soldad cyi'jxi aj Judá tu'ntzun cytzaj k'ojlel cyi'j, atzun txkantl t-soldad Jeroboam e cyaj ten cywitz aj Judá tu'ntzun cyoc tzokpaj k'ojlel cyi'j. 14Tejtzun cylonte aj Judá cyja'tok cyoc tzokpaj t-soldad Jeroboam k'ojlel cyi'jxi ax icx cywitz, e cubsan twitz Kman ex e octzun ten ke pal k'ajtzalte chun. 15Tejtzun cyjaw sch'in aj Judá tu'n toc k'oj, cub ti'j Jeroboam cyuc'ix cycyakil aj Israel tu'n Abías ex cyu'n aj Judá, nok tu'n tipumal Dios. 16E eltzun ok aj Israel cywitz aj Judá, porque ax te Dios otok txi k'onte cye tuj cyk'ab aj Judá. 17Nimxix xjal cyim tu'n Abías ex cyuc'ix ke t-soldad, cub cybyo'n jwe' syent mil soldad, akeju mejor che k'ojin ate' cyxol aj Israel. 18Cyja'tzun tten cub cyi'j aj Israel tuj tk'ijlalil lu, ex ake aj Judá e camban porque oc ke' cyc'u'j ti'j Kman aju Cydios ktzan cyxe'chel. 19Cucx oc ten Abías k'ojlel ti'j Jeroboam ex el ti'n ke tnam lu tuj tcwent: Betel, Josana ex Efraín, cyuc'ix ke cy-aldey. 20Minti'tl oc tipun tcawbil Jeroboam tej itz'xtok Abías. Te tibajxi oc c'ixbisa'n Jeroboam tu'n Kman ex bi'x cyim, 21atzunte Abías oc mastl tipun tcawbil. O ten cyajlaj t-xu'jil ex tzaj 22 tcy'ajal ex kaklaj tme'jel. 22Aju ch'intl tx'olbaben ti'j Abías ex ti'j tcyakilju o tbincha tuj tank'ibl, atzun tz'iban tuj u'j cyaj ttz'iban Iddo aju t-sanjel Dios.

will be added

X\