2 CRÓNICAS 12

1Tej tcyuwset tcawbil Roboam ex tej tna'nte attok nim tipun tuj tcawbil, cyaj tcolin tu'n tjapun tley Kman tu'n, ax icx o cybincha cycyakil aj Israel. 2Ex tu'nju el cypa'n cyib ti'j Kman, cyja'tzun tuj tjwe'yin abk'i ttzyetlen tcawin rey Roboam oc tzokpaj Sisac aju rey te Ejipt ti'j Jerusalén, 3pon tuc'il jun mil tuc'il cab syent carwaj in che ajben tuj k'oj, tuc'ix 60 mil soldad cyjax cyibaj chej ex cyuc'ix mastl soldad nimxix cyajlal tzaj cyuc'in cyib tuj Ejipt; ake jlu aj Libia, aj Suquín ex aj Etiopía ke. 4Ke tnam toc muro cyi'j tuj Judá cub cyi'j tu'n ex pon max nikayin ttxlaj Jerusalén. 5Pontzun Semaías aju t-sanjel Dios tuc'il Roboam ex cyuc'il ke nejenel cye aj Judá, akeju otok pon cychmon cyib tuj tnam Jerusalén tu'nju in che xobtok twitz Sisac, ex xi tma'n cye: —Chi Kman cyja': Tu'nju ma chin cyaj cycoline, cyja'tzun ma che cyaj nk'o'ne tu'n tcub cyi'je tu'n Sisac. 6Atzun cye nejenel cye aj Israel tuc'ix rey el cynic' ti'j, cyja'tzun cub cymansin cyib ex cyma: —Tuj tumelxix ma tbincha Kman jlu ki'j. 7Tejtzun tque'yinte Kman otok cub cymansin cyib, tzaj yolin juntl maj tuc'il Semaías ex tzaj tma'n cyja': Tu'nju ma cub cymansin cyib nwitze, mlay che naj wu'ne, che cletel naj wu'ne ex mlay txi nk'o'ne ambil te Sisac tu'n tcub tk'o'n cycastiw aj Jerusalén; 8pero che cyjel ten tjak' tcawbil Sisac, ex c'elel cynic' ti'j alcye mas ba'n, ka tu'n cyajben weye, ex ka tu'n cyajben cye ke rey cye mastl nasyon, chi Dios te Semaías. 9Oc tzokpaj Sisac aju rey tuj Ejipt ti'j Jerusalén ex xi ti'n ke k'inumabl ate' tuj tja Kman ex tuj tja rey. Tcyakil xi ti'n, ax icx e je'x ti'n tcyakil makbil k'an pwak cytx'otx'il, akeju tu'n Salomón e cub tbincha'n. 10Te cyxel ke makbil lu e cub tbincha'n rey Roboam ke makbil k'an c'uxbil, ex e cyaj tk'o'n tuj cycwent ke nejenel cye xk'ukil ttzi tja rey. 11Teyle junjun maj oc t-xi' rey tuj tja Dios, ke xk'ukil in xi cyi'n ke makbil, ex nna'jtz cyi'n juntl maj tu'n cyten tuj ja jatum ate' ke xk'ukil. 12Cyja'tzun nok tu'nju cub tmansin tib Roboam o chewix tk'oj Kman ti'j, ex minti' e naj aj Judá tu'n te jumajx. Ax icx ba'n e ten xjal tuj Judá. 13Oc tipun tcawbil rey Roboam tuj Jerusalén ex cucx o cawin. Toctok twi' 41 abk'i tej ttzyet tcawin, ex o cawin wuklaj abk'i tuj Jerusalén aju tnam jaw t-sc'o'n Kman cyxol cycyakil c'loj cyiyjil aj Israel tu'n ttzaj na'n tbi tuj. Aju ttxu' Roboam, Naama tbi ex aj Amón. 14Ke tbinchben Roboam mya ba'n e e'la tuj twitz Kman, porque minti' o tz'ajben te Dios tu'n tcyakil tc'u'j. 15Aju tx'olbaben ti'j tbinchben Roboam atxix tej tke' tcawin ex tejxi tpon baj, atzun tz'iban cyuj ke u'j jatum tz'iban cybi ktzan t-xe'chel. A jlu tu'n Semaías cyaj cytz'iban, aju t-sanjel Dios, tuc'ix Iddo aju ba'n nabin tu'n Dios. Cucx o ten k'oj cyxol Roboam tuc'il Jeroboam. 16Ex tejtzun tcyim Roboam cu'x maku'n cyxol ktzan t-xe'chel tuj tnam toc tbi Ttanmi David. Te tibajxi, aju o cawin te t-xel, atzun Abías aju tcy'ajal.

will be added

X\