2 CRÓNICAS 10

1Xi'tzun Roboam tuj Siquem, porque cycyakil aj Israel otok che pon ma chixin tu'n toc cyk'o'n te rey. 2Pero o tbi Jeroboam aju tcy'ajal Nabat, tej maxtok ta' tuj Ejipt jatum otok pon tej tel ok twitz rey Salomón, ex ajtz meltz'aj tuj Ejipt tu'n tul tuj ttanmi. 3Xitzun txocbaj Jeroboam cyu'n aj Israel. Tejtzun tul, xi' cyuc'ix cycyakil aj Israel yolil tuc'il Roboam ex xi cyma'n te cyja': 4—Puro cyuwxix tley ktzan tmana cub tk'o'n kibaje, atzun teya ja'lo mi'n cub tk'o'na jun ak'untl cyuwxix kibaje, k'i'n ela aju ley ponin ta'w wen cub tk'o'n ktzan tmana kibaje. Katzun ma txi tnimana kyole octzun ko ajbele teya. 5Atzunte Roboam xi ttzak'we'n: —Bix che ule juntl maj wuc'ile tuj ox k'ij ja'lo. E ajtzun cycyakil xjal cyja. 6Atzunte rey Roboam oc ten kanil jun tumel cye ke tij xjal, akeju otok che ajben te rey Salomón aju ktzan tman tej itz'xtok, ex xi tkanin cye: —¿Alcye jun nconseje ctzajel cyk'o'ne tu'n t-xi nma'ne cye xjal lu? 7Atzun cye tij xjal xi cytzak'we'n: —Ka ma tbinchaya ba'n cye xjal lu, ex ka ma txi tnimana alcye cyajbil, ex ka ma che'x ttzak'we'na tuc'il jun yol puro ba'n, cucxtzun che ajbel ke xjal lu teya. 8Pero minti' xi tniman Roboam cyconsej ke tij xjal, nok o'cx xi' kanil tconsej cyuc'il ke cu'xun, akeju junx e tzaj ch'iy tuc'il ex in che ajben te, 9ex xi tkanin cye: —¿Alcye jun nconseje ctzajel cyk'o'ne tu'n t-xi nma'ne cye xjal lu, porque ma tzaj cykanin weye tu'n mi'n tcub nk'o'ntle ak'untl cyuwxix cyibaj, ic tza'nju cub tk'o'n ktzan nmane? 10Atzun cye cu'xun, akeju junx e tzaj ch'iy tuc'il, xi cytzak'we'n cyja': —Ke xjal ma tzaj cykanin teya tu'n mi'n tcub tk'o'na ak'untl cyuwxix cyibaj ic tza'n cub tk'o'n ktzan tmana, atzun teya k'manxa cye cyja': Ka puro cyuwxix o cawin ktzan nmane cyibaje, atzun weye c'ic'el mastl wu'ne ic tza'n te; 11ka cyuw tcawbil ktzan nmane cub tk'o'n cyibaje, atzun weye c'ic'el mastl wu'ne, ex ka xi jato'n ti'j cyc'u'je tu'n asyal tu'n, atzun weye cxel njato'ne ti'j cyc'u'je tu'n tz'u'm xpotx'imaj tocx c'uxbil ttxa'n; chicuya cye, che chi ke cu'xun. 12Tujtzun toxin k'ij xi' Jeroboam juntl maj cyuc'ix cycyakil tnam xjal aj Israel tu'n cyyolin juntl maj tuc'il Roboam, ic tza'nx otok tma cye. 13Atzunte rey Roboam cyuwxix o yolin wen cye tnam xjal; minti' xi tniman aju consej otok tzaj cyk'o'n tij xjal te. 14Ex ax yol xi tma'n cye xjal ic tza'nju yol otok tzaj cyma'n ke cu'xun te, xi tma'n: Ka cub k'o'n jun ak'untl cyuwxix cyibaje tu'n ktzan nmane, atzun weye c'ic'el mastl wu'ne ic tza'n te, ex ka xi jato'n ti'j cyc'u'je tu'n asyal tu'n ktzan nmane, atzun weye cxel njato'ne cyasyale tu'n tz'u'm xpotx'imaj tocx c'uxbil ttxa'n, chi Roboam. 15Minti' xi tniman rey cyyol tnam xjal porque tu'n Kman bant jlu, tu'ntzun tjapun aju yol otok txi ttziyan Kman te Jeroboam aju tcy'ajal Nabat. Aju yol lu tu'n Ahías aju aj Silo otok tzaj tma'n. 16Tejtzun cyque'yinte cycyakil tnam xjal aj Israel minti' xi niman cyyol tu'n rey, xitzun cytzak'we'n cyja': Minti' ke koclen ti'j tiyjil David, minti' ke kxilen tuc'il tcy'ajal Isaí. Akeye aj Israel, teylex te junjun cu taj tja, atzun cye tiyjil David e toc cycwentin keju ate' tuj tja, che chi. Textzunju or lu cycyakil aj Israel e aj cyja. 17Atzun ke aj Israel, akeju najlke cyuj ke tnam ate' tuj Judá, cucx e cyaj ten tjak' tcawbil rey Roboam. 18Xi t-sama'n Roboam aju xjal Adoram tbi, aju toc te nejenel ti'j ak'untl lajwers in bant, atzun cye aj Israel oc cyxo'n tu'n abj ex bi'x cyim cyu'n. Atzunte rey Roboam jax naj tuj tcarwaj ex xi ok tuj tnam Jerusalén. 19Cyja'tzun tten e etz aj Israel tjak' cycawbil ke tiyjil David, ex cucx cyten ja'lo.

will be added

X\