1 Timoteo 6

1Cycyakil keju bi'x tzyu'n ke te majen, che ximan cyi'j cypatrón tu'n tten tchiyilal cypatrón tuj cywitz, tu'ntzun mi'n cyyolin xjal mya ba'n ti'j Dios, ax icx ti'j ju xnak'tzbil in kk'o'n. 2Akeju majen ocslal cypatrón, mya tu'n mi'n t-xi cyniman cypatrón tu'nju cyerman cyib tuj ocslabl, nok o'cx tu'n cyajbenxix cye; porque akeju patrón jatum in che ajben, ocslal ke ex at cyc'u'j majen cyi'j. Xnak'tzanxa jlu cye ex k'onxa cynabl. 3Ka at jun xjal in tk'o'n junxitl xnak'tzbil, ex minti' taj ti'j ju tbanil yol aju tyol Kajaw Jesucrist, ex minti' taj ti'j ju xnak'tzbil aju in tma'n tu'n kniman te Dios, 4jun xjal icju in jaw tniman tib, ex minti' ch'in ba'n tu'n. Toc tyab twi', nok o'cx taj tu'n tk'ojin ti'j yol; tu'ntzun jlu in tzaj tlo'ch cyc'u'j xjal, tuc'ix k'oj, tuc'ix yasbil, tuc'ix cyximbetz mya ba'n. 5Nok in che jaw cub tuc'il yol, ex mya tuj tumel ta' cynabl; ma che el tzpet ti'j ju yol axix toc, tuj cynabl aju tu'n cyniman te Dios tu'n cycambante nim. [Pa'mil tiba cyi'j xjal lu.] 6Pero ka ma ko niman te Dios ex in ko tzalaj ti'j ju in tzaj tk'o'n ke, atzun jlu jun cambabl ma'xix. 7Porque minti' ch'in k'i'n ku'n tej kul itz'j, ex minti' ch'in cxel ki'n oc kic' twitz tx'otx'. 8Cyja'tzun, ka at kwa ex at kxbalun, ko tzalaj ti'j jlu. 9Porque akeju cyaj tu'n cyoc k'inun, in che oc tuj joybil cyi'j ex in che cub tz'ak tuj c'obil, tu'nju in pon cyc'u'j ti'j nimcu minti' tajben, ex in che c'ixbi tu'n; tu'ntzun jlu in tzaj xitbil cyibaj ex in che'x tuj najen. 10Porque aju tu'n tpon kc'u'j ti'j pwak, atzun tloc' tcyakil mya ba'n; ic tza'n junjun o che el txalpuj ti'j cyocslabl ex nim o che c'ixbisanjtz tu'nju o pon cyc'u'j ti'j pwak. 11Atzun teya, tel oka ti'j tcyakil jlu porque ajbela te Dios. Tz'oc tililx tu'na tu'n tbinchanteya aju tz'aklxix, ex tu'n tnimana te Dios, ex tu'n tten tocslabla, ex tu'n tten tc'ujlalila, ex tu'n tten tpasensa, ex tu'n toca mans. 12Tz'oc tililx tu'na ic jun soldad tu'n tcub ti'j mya ba'n tu'na tu'n tocslabla; tzyuma aju chwinklal te jumajx, porque o txconjtza tu'n tten tchwinklala te jumajx tej t-xi tchic'ba'na tocslabla cywitz nimcu testiw. 13Cxel ncyuwsa'ne teya twitz Dios aju in tzaj k'onte cychwinklal cycyakil, ex twitz Jesucrist aju xi chic'bante ti'j ju yol axix toc twitz Ponsio Pilat, ex tuj tumelxix tyol. 14Cxel ncyuwsa'ne teya tu'n tjapun tu'na aju ma txi nma'ne teya, miwt baj tch'expu'na, ex cucx tu'n ttena minti' tpaltila ocxi tul Kajaw Jesucrist. 15Tujxix tk'ijlalil ctzajel yec'un Jesucrist tu'n Dios. Ate Dios in tzalaj te jumajx, ex o'cx te at tipumal tibaj tcyakil. Ate Dios Rey in cawin cyibaj cycyakil rey, ex ate Dios Cyajaw cycyakil keju at cyoclen. 16O'cx te Dios mlay cyim, atzun najl tuj spic'un aju mlay ko pon lak'e' ttxlaj. Mi jun xjal o tz'oc que'yinte Dios ex mlay bant tu'n toc tque'yin xjal twitz Dios. O'cxwit te Dios tu'n tnimanjtz ex tu'n tten tipumal te jumajx. Icxwitju. 17K'manxa cye k'inun ate' tuj tk'ijlalil ja'lo tu'n mi'n tjaw cyniman cyib, ex tu'n mi'n toc ke' cyc'u'j ti'j k'inumabl porque mya segur te jlu; nok o'cx tu'n tke' cyc'u'j ti'j jun Dios itz', porque tcyakil in tzaj tk'o'n Dios ke ex nimxix in tzaj tk'o'n tu'n ktzalaj ti'j. 18K'manxa cye tu'n cybinchante aju ba'n, tu'ntzun tchmet cyak'unben ba'n ic tza'n jun k'inumabl; k'manxa cye tu'n cybinchante xtalbil ex tu'n t-xi cysipan ch'in cye mastl. 19Atzun jlu tu'n tbaj cychmo'n ic tza'n jun k'inumabl tu'n tajben cye tuj tk'ijlalil tzul, tu'ntzun cytzyunte ju chwinklal axix toc. 20Aya Timotey, c'u'nxa aju ma tzaj okxenan teya tu'n Dios. Pa'mil tiba ti'j cyyol ke xjal mya nimal Dios, ex mi'n txi tbi'na aju cyyol nokx gan. Pa'mil tiba ti'j cyxnak'tzbil keju in cyma'n ka at cyojtzkibl pero mya ax toc cyu'n. 21Porque at junjun o che oc lpe' ti'j ju ojtzkibl lu mya ax toc, cyja'tzun ma che el txalpuj ti'j cyocslabl. Tenwt t-xtalbil Dios tuc'ila. Icxwitju.

will be added

X\