1 Timoteo 4

1Pero clarxix in tma'n Xewbaj Xjan, tuj mancbil tk'ijlalil at junjun xjal cyjel cycolin cyocslabl, cxel cybi'n cyyol ke xjal sbul at ju'ẍ tuj cyanmi ex cxel cybi'n cyxnak'tzbil. 2Cxel cybi'n cyyol ke xjal xmletz' ex nic'al yol ke. Akeju xjal lu tuj najen ta' cyanmi, minti'tl nne'l cynic' ti'j alcye ju ba'n ex alcye ju mya ba'n, mer ic tza'n ma tz'e'y tuj cyanmi tu'n c'uxbil in c'ant, ma tz'el tnabl cyanmi. 3Ke xjal lu cxel cymayo'n tu'n mi'n cymoje' xjal, ex cxel cyma'n tu'n mi'n t-xi cychyo'n xjal chibj aju cyaj tk'o'n Dios tu'n t-xi cychyo'n ocslal ex tu'n t-xi cyk'o'n chjonte ti'j, akeju ma tz'el cynic' ti'j ju yol axix toc. 4Porque tcyakilju cyaj tbincha'n Dios, ba'n, ex mi jun tu'n tel kic'un ka ma txi kk'o'n chjonte ti'j oc t-xi kchyo'n; 5porque cy'iwla'maj tu'n tyol Dios ex tu'n kna'j Dios. 6Ka ma txi tk'o'na xnak'tzbil lu cye erman, c'oquela jun ajbel ba'nxix te Jesucrist, c'oquel tipuna tu'nju yol ocsla'n ku'n ex tu'nju xnak'tzbil ba'n ma tz'oc lpe'ya ti'j. 7Ic'un ela aju la'jbil mya ba'n ex ju cyla'jbil tij xu'j. Xnak'tzam tiba tu'n tnimana te Dios. 8Porque aju tu'n tnukpaj kximlal, nok ch'in tajben, pero aju tu'n kniman te Dios, at tajben tuj tcyakil, porque in tk'o'n aju ba'n tuj kchwinklal ja'lo, ax icx tuj juntl ank'ibl. 9Ax toc ju yol lu ex ba'n tu'n t-xi cyniman cycyakil xjal. 10Tu'n tlaj jlu in ko ak'nan ex nno'cxix tilil ku'n, porque k'ukl kc'u'j ti'j ju Dios itz', atzun clol cye cycyakil xjal, tnejelxix cye keju ma che ocslan. 11Atzun jlu k'manxa cye ex xnak'tzanxa cye. 12Mi'n tak'a ambil tu'n tel ic'una cyu'n ocslal tu'nju cu'xuna; nok o'cx tu'n toca te jun yec'bil cyxol ocslal tu'n tyola, ex tu'nju in beta tuj tumel, ex tu'nju at tc'ujlalila, ex tu'nju at tocslabla, ex tu'nju sak tuj tanmiya. 13Binchama jlu, sch'inxa tyol Dios cywitz ocslal, k'onxa cynabl, ex k'onxa xnak'tzbil cye, acutzun cyja' nxi'ye tuc'ila. 14Mi'n cub tyajina aju toclena at, aju tzaj k'o'n teya tej tcub cyk'o'n ansyan cyk'ab tibaj twi'ya, ax Dios tzaj yec'unte cye tu'n tc'monteya toclena. 15Cucx binchama tcyakil jlu. O'cx k'o'nc tc'u'ja ti'j tu'ntzun cyque'yinte cycyakil xjal nim in bant tu'na. 16Cwentin oc tiba, ex k'o'nca cwent ti'j ju xnak'tzbil in tk'o'na, tz'oc tililx tu'na ti'j jlu; ka ma tbinchaya jlu, axa oc cletel cyuc'ix keju in che bin ti'j tyola.

will be added

X\