1 Timoteo 3

1Lu jun yol axix toc: Ka at jun erman taj tu'n toc te nejenel cyxol ocslal, ba'n ju ak'untl lu ka taj tu'n tak'nan ti'j. 2Pero aju nejenel il ti'j tu'n tten minti' tpaltil, ex nok jun t-xu'jil tu'n tten. Il ti'j tu'n tjac'unte tib, ex tu'n tten tnabl, ex tu'n tten ba'n tmod, ex tu'n tk'onte cyposad xjal, ex atwit tnabl tu'n tk'onte xnak'tzbil. 3Mlay tz'oc jun xjal c'al k'e'n te nejenel, ex ka in k'ojin, [ex ka in pon tc'u'j ti'j tu'n tcambante pwak mya tuj tumel.] Nok o'cx ba'n toc te nejenel aju xjal ba'n tmod ex mans, ex minti' in pon tc'u'j ti'j nimcu; 4ex ba'n cawin tuj tja, ex ba'n che niman ke tc'wa'l ex ba'n che bin. 5Porque jun xjal miban cawin tuj tja, ¿tza'ntzun tten tu'n tbant tcwentin cye ocslal etzan ke tu'n Dios? 6Mlay tz'oc te nejenel jun ac'aj ocslal, mya yajcu jaw tniman tib ex cbel t-sentens ic tza'n te tajaw il cub t-sentens. 7Ex ilxix ti'j tu'n tten nejenel ba'nxix cywitz xjal mya ocslal, tu'ntzun cyyolin ba'n ti'j, tu'ntzun mi'n ttzaj jun yol ti'j ex tu'n mi'n tcub tz'ak tuj tc'obil tajaw il. 8Ax icx ba'n tu'n cyoc te diácono akeju in che yolin tuj tumelxix, ex minti' in meltz'aje' cyyol, ex mya c'al k'e'n ke, ex minti' in pon cyc'u'j ti'j jun cambabl mya tuj tumel. 9Ex ilxix ti'j cucx tu'n tten cyocslabl aju o tzaj tyec'un Dios ke, ex in tma'n cyanmi ka ba'n in cybincha'n. 10Ex ilxix ti'j tu'n tic' witzbaj cyi'j tnejel ka ba'n ate', ba'ntzun tu'n cyoc te diácono ka minti' cypaltil. 11Ax icx ke xu'j, ba'n tu'n cyajben ka in che yolin tuj tumel, ex ka mya si'mil yol ke, ex ka in cyjac'un cyib, ex ka in japun cyu'n tuj tcyakil. 12Ke diácono junx cyxu'jil tu'n tten, ex tu'n tbant cycawin cye cyc'wa'l ex cye keju ate' tuj cyja. 13Porque akeju diácono ka in che ajben tuj tumel, in cyc'mo'n jun cyoclen ma'xix ex in ke'xix cyc'u'j ti'j tu'n cyyolin ti'j cyocslabl ti'j Jesucrist. 14Ximan wu'ne tu'n nxi' naje que'yil teya, pero mya yajcu mi'n chin pon naje, 15cyja'tzun in xi ntz'ibane jlu teya, tu'n tbinteya tza'n tten tu'n tajbena cyxol ke ocslal etzan tu'n Dios; akeju xjal lu ocslal ke ti'j Dios, aju Dios itz', tzyu'n ju yol axix toc cyu'n ex cwentin cyu'n. 16Ax toc ma' t-xilen aju kocslabl ma tzaj yec'un: Oc Dios te xjal tu'n ttzaj yec'un ke, el chic'e' tu'n Xewbaj Xjan ka tz'aklxixte, ex oc que'yin cyu'n anjel. O pacbanjtz tkanil ti'j cyuj mastl nasyon, ex e ocslan xjal ti'j, ex jax k'i'n tuj cya'j.

will be added

X\