1 Timoteo 1

1Akine Pablo, apostl kine te Jesucrist, tu'n Dios tzaj tma'n aju Clol ke, ex tu'n Kajaw Jesucrist aju k'ukl kc'u'j ti'j. 2In xi ntz'ibane jlu teya Timotey, axix toc aya nc'wa'le tuj ocslabl. Awt Kman Dios tuc'ix Kajaw Jesucrist, che k'onte xtalbil teya ex tu'n ttzaj k'ak'an cyc'u'j ti'ja ex tu'n tke'xix tc'u'ja. 3Waje ax tu'n tcyaj tena tuj tnam Efeso, ic tza'n xi nma'ne teya tej cyja'tok nxi'ye tuj tx'otx' Macedonia. Waje tu'n t-xi tma'na cye junjun xjal tu'n mi'n t-xi cyk'o'n junxitl xnak'tzbil mya ax toc, 4ex tu'n mi'n t-xi cybi'n ju yol la'jbil tuc'ix ju yol ti'j cybi cyxe'chel xjal ojtxi minti' bajsbil te. Porque ti'j ju yol lu in tzaj cyk'oj xjal, nok in che jaw cub tuc'il yol, ex minti' jun onbil ke tu'nju yol lu tza'n tten tu'n tjapun aju ximamaj tu'n Dios te ke, aju nne'l knic' ti'j tu'n kocslabl. 5Pero aju tnabl yol ma txi nma'ne teya, atzun tu'n kc'ujlante kib kxolx tuc'il kc'ujlalil tzajni jlet tuj kanmi sak ta', ex ka in kbincha'n aju ba'n in tma'n kanmi, ex ka ax toc ocslal ko' ex mya nok tten ku'n. 6At junjun xjal o che el txalpuj ex ma tz'el cypa'n cyib cyi'j jlu, ma txi cyk'on cyib tu'n cyyolin ti'j ju yol nokx gan. 7Cyajbil tu'n cyoc chic'bal ti'j tley Dios, pero minti' nne'l cynic' ti'j ju in cyma'n ex ti'j ju in cycyuwsa'n. 8Ba'n ku'n, ate ley ba'n ka ma tz'ajben ku'n tuj tumelxix. 9Ba'n jlu ku'n, ate ley tcub mya cye ke xjal tz'aklxix, nok o'cx tcub ley cye keju miban che niman ley ex cyc'i' tu'n cyten tjak' ley, ex cye keju minti' tchi Dios cye ex aj il ke, ex cye keju minti' cyaj ti'j Dios ex minti' cyocslabl, ex cye keju in cub cybyo'n cyman ex cytxu', ex cye keju byol xjal ke, 10ex cye ke yaẍil, ex cye xinak in pon cyc'u'j ti'j juntl xinak, ex cye keju elk'al xjal, ex cye keju nic'al yol, ex cye keju in xi cytziyan jun yol tuc'il nic'aj yol, ex ka at juntl in cybincha'n tu'n tmaket aju xnak'tzbil ba'n. 11Aju xnak'tzbil ba'n ma tzaj okxenan weye in yolin ti'j tkanil colbil tbanilxix in tzaj tk'o'n Dios, aju Dios at-xix tzalajbil tuc'il. 12Cxel nk'o'ne chjonte te Kajaw Jesucrist tu'nju ma tzaj k'o'n wipumale tu'n, porque ma ke' tc'u'j wi'je ex ma chin oc k'o'ne tu'n, tu'n wajbene te. 13Ojtxi in yasune ti'j, ex in yajlane cyi'j ocslal, ex o nbinchaye mya ba'n cyi'j; pero o tzaj k'ak'an tc'u'j Dios wi'je, porque minti' el nnic'e ti'j ju o nbinchaye na'nxtok wocslane. 14Pero tzaj tk'o'n Kajaw nimxix t-xtalbil weye tuc'ix wocslable ex nc'ujlalile, tu'nju at kmojbabl kib tuc'il Jesucrist. 15Lu jun yol lu axix toc ex ba'n tu'n tke' kc'u'j ti'j ex ba'n tu'n t-xi cyocsla'n cycyakil xjal: ul aj Jesucrist twitz tx'otx' tu'n cyclet ke xjal aj il tu'n, ex akine mas aj ilxix cywitz cycyakil. 16Cyja'tzun tzaj k'ak'an tc'u'j Jesucrist wi'je, tu'ntzun ttzaj tyec'un tnejelxix wi'je ka at nim tpasens, ex tu'n woque te jun yec'bil cye keju che ocslal ti'j tu'n tten cychwinklal te jumajx. 17Cyja'tzun, ba'n tu'n kk'onte nimbil te Dios ex tu'n tjaw knimsa'n tbi tuj tcyakil tabk'iyil te jumajx. Porque ate Dios Rey tuj tcyakil tabk'iyil, mlay naj, ex mya k'ancha'l, o'cx ate jun Dios [ex nim tnabl.] Icxwitju. 18Aya nc'wa'l Timotey cxel ncyuwsa'ne jun yol teya, tu'n tk'ojina ba'n tuj k'oj, ic tza'nx ju yol o k'manjtz ti'ja nej cyu'n ke t-sanjel Dios. 19Ex tenx tocslabla, ex binchama aju ba'n in tma'n tanmiya. Porque at junjun ma cyaj cycolin jlu ex ma naj cyocslabl. 20Icxte Himeneo tuc'ix Alejandro ma cyaj cycolin cyocslabl, cyja'tzun ma che'x nk'o'ne tuj tcwent Satanás, tu'ntzun tel cynic' ti'j, tu'n mi'n cyyolin mya ba'n ti'j Dios.

will be added

X\