1 Tesalonicenses 4

1Ja'lotzun erman, ko cubsale cywitze ex cxel kk'o'ne cynable tu'nju kmojbabl kib tuc'il Kajaw Jesús: Ic tza'n ju xnak'tzbil xi kk'o'ne cyeye tza'n tten tu'n cybete twitz Dios ex tu'n ttzalaj Dios cyi'je, icxtzun cybinchame ex tu'n tjapunxix cyu'ne. 2Porque bi'maj cyu'ne aju xnak'tzbil xi kk'o'ne cyeye, aju tzaj tma'n Kajaw Jesús. 3Porque aju tajbil Dios tu'n t-xi cyk'on cyibe o'cx te Dios, ex tu'n mi'n cybinchanteye aj pajil. 4Teyle junjun cyeye tu'n tten tex t-xu'jil, atwit toclen t-xu'jil tuj twitz ex mi'n pon tc'u'j ti'j juntl, 5ex mya tu'n t-xi cytzokpin cyibe teju cyajbile mya ba'n ic tza'n in cybincha'n txkantl xjal minti' ojtzki'n Dios cyu'n. 6Ex mi'n cybinchaye jun mya ba'n te cyermaniye ex mi'n che cub cysbu'ne, porque ate Kajaw ctzajel k'onte castiw ti'j tcyakil jlu, ic tza'n o txi kma'ne cyeye ex o txi kchic'ba'ne. 7Porque minti' ma ko txconjtz tu'n Dios tu'n kbinchante aju ttz'ilil, nok o'cx tu'n t-xi kk'on kib o'cx te. 8Cyja'tzun alcye jun xjal nne'l tic'un ju yol lu, mya jun xjal nne'l tic'un, ate Dios nne'l tic'un, aju ma tzaj k'onte Xewbaj Xjan ke. 9Mya il ti'j tu'n t-xi ntz'ibane cyeye tza'n tten tu'n cyc'ujlanteye cycyakil erman, porque ax Dios ma xnak'tzan cyeye tu'n cyc'ujlante cyibe cyxolxe. 10Ax icxtzun in cybincha'ne, at cyc'ujlalile cyi'j cycyakil erman ate' tuj tx'otx' Macedonia. Pero ko cubsale cywitze, erman, cucx tu'n tch'iy cyc'ujlalile, 11ex tu'n toc tilil cyu'ne tu'n cyank'ine tuj txubtxaj ex tu'n cyak'nane ti'j cyak'une, ex tu'n cyak'nane tu'n cyk'abe, ic tza'nx xi kma'ne cyeye. 12Tu'ntzun cyxi nimane cyu'n xjal, ex tu'n cytene minti' atx taj cyeye. 13Ax icx kajbile erman, tu'n tel cynic'e cyi'j keju in che cyim, tu'n mi'n ttzaj cybise ic tza'n ke mastl xjal minti' jatum tu'n toc ke' cyc'u'j. 14Porque ma kocsla ju yol ti'j Jesús, ate Jesús o cyim ex jatz ank'in, ax icxtzun keju o che cyim ocslal ke ti'j Jesús, che tzajel ti'n Dios junx tuc'il Jesús. 15Cyja'tzun cxel kma'ne jlu cyeye, aju tyol Kajaw: ako' itz'x ko' ex ato'x oc tul Kajaw, mlay ko'x nej cywitz keju otok che cyim. 16Porque axte Kajaw cbeletz tuj cya'j, ctzajel tk'o'n orden, tuc'ix tnejel anjel ctzajel k'ajt, ex ck'ajtel ju chun te Dios. Entons keju otok che cyim ocslal ke ti'j Crist oc che jawil ank'in nej. 17Lepchixtzun ko' ako' itz'x ko' ato'x tzalu, ko jawil jubcha'n junx cyuc'il tuj muj tu'n kc'lunte kib tuc'il Kajaw tuj cyk'ik', cyja'tzun ax ko tel tuc'il Kajaw te jumajx. 18Cyja'tzun cyk'ukbam cyc'u'je cyxolxe tu'nju yol lu.

will be added

X\