1 Tesalonicenses 3

1Minti' ic'x ti'j ku'ne tu'n kbinteye cyi'je, cyja'tzun cub kximane tu'n kcyaj tene tuj tnam Atenas o'cx keye, 2ex xi ksama'ne kerman Timotey cyuc'ile tu'ntzun cycyuwsanjtze tu'n ex tu'n t-xi k'ot cynable tuj cyocslable, porque ate Timotey ajbel te Dios ex ak'nal kuc'ile tu'n tpacbanjtz tkanil colbil in tzaj tk'o'n Crist. 3Xi ksama'ne tu'n mi'n tel tzpet cynable tu'n tlaj ju yajbil cyeye, porque ax keye ba'n cyu'ne ka il ti'j tu'n tic'x ku'n. 4Porque tej ktene cyuc'ile, bi'x xi kma'ne cyeye ka il ti'j tu'n kyajlanjtz, ex cyja'tzun tten in baj ki'j, ba'n jlu cyu'ne. 5Cyja'tzun tten, minti' ic'x tu'n nc'u'je cyi'je, xi nsama'ne Timotey tu'n nbinteye tza'n cytene tuj cyocslable, mya yajcu o che oque tuj joybil cyi'je tu'n tajaw il, ex mya yajcu nokx gan kak'unbene. 6Pero tej tul meltz'aj Timotey kuc'ile tzaj tma'n tkanil ba'n ka at cyocslable ex at cyc'ujlalile, ex ka cucx in ko tzaj cyna'ne in che tzalaje ki'je, cyajbile tu'n toc cyque'yine kwitze, ax icx keye kajbile tu'n toc kque'yine cywitze. 7Cyja'tzun erman, tej ktene tuj bis ex tuj yajbil keye, o k'ukbanjtz kc'u'je cyu'ne nok tu'nju wa'lke'xixa tuj cyocslable; 8porque ja'lo ma tz'el kbise ex ma ke' kc'u'je tu'nju wa'lke'xixe tuj cyocslable ti'j Kajaw. 9¿Alcyetzun tumel tu'n t-xi kk'o'ne chjonte te Dios cyi'je tu'nju nimxix in ko tzalaje cyu'ne twitz Dios? 10In ko na'ne Dios cyi'je k'ijl ex konic'an, in ko cubsane wen tu'n toc kque'yine cywitze ex tu'n t-xi ktz'aksa'ne aju atx taj cyeye tuj cyocslable. 11Awt Kman Dios tuc'ix Kajaw Jesucrist che'x ẍaklunte keye tuj kbeye tu'n kpone cyuc'ile. 12Awt Kajaw k'onte t-xtalbil cyeye tu'n cych'iye tu'n tten nim cyc'ujlalile cyxolxe ex cyuc'il cycyakil xjal, ic tza'n keye at-xix kc'ujlalile cyi'je. 13Awt Kajaw cyuwsante cynable ex tu'n cytene sak tuj cyanmiye ex minti' cypaltile twitz Kman Dios oc tul Kajaw Jesucrist cyuc'il cycyakil ocslal ti'j.

will be added

X\