1 SAMUEL 9

1Cyxol tiyjil Benjamín attok jun xinak ma' toclen cyxol xjal, Cis tbi, tcy'ajal Abiel, atzunte Abiel tcy'ajal Zeror; atzunte Zeror tcy'ajal Becorat, ex atzunte Becorat tcy'ajal Afía. 2Attok jun tcy'ajal Cis, Saúl tbi, otok tz'oc cu'xun ex tbanilxix que'yin. Misicyer juntl aj Israel ic tza'n te, mi a'l juntl in pon twa'l ic tza'n te, nok o'cx in japun cywa'l twi' t-semil. 3At jun k'ij e je'x tzpet ke ttxu tbur Cis, ex xi tma'n te tcy'ajal aju Saúl tbi: —Bincham ttena ex txi'ya jyol cye bur. Ex uc'inx jun tuc'ila cyxol ke majen xinak. 4Xi'tzun Saúl ex ic' aj tuj tiwitz tx'otx' cye aj Efraín ex tuj lugar Salisa, pero minti'x e cnet ke bur tu'n. Ax icx ic' aj tuj lugar Saalim tbi, ex tuj cytx'otx' aj Benjamín, ax icx minti' e cnet tu'n. 5Tej cypon tuj lugar Zuf tbi, xi tma'n Saúl te majen aju uc'in tu'n: —Ko aj meltz'aj, mya yajcu in bisun nmane ki'j, ex balo minti'tl in bisun cyi'j ke ttxu bur. 6Atzunte majen xi ttzak'we'n: —Tuj tnam lu at jun t-sanjel Dios, ex puro niman cyu'n cycyakil xjal, porque tcyakilju in tzaj tma'n in japun. Ko' tuc'il, balo jacu tzaj tma'n ke alcye be tu'n t-xi ki'n. 7Xi ttzak'we'n Saúl: —Ko', pero ¿titzun ch'in cxel ki'n teju xinak lu? Minti'tl wabj tuj kpa. Minti' jun ti'xti ba'n tu'n t-xi kk'o'n te t-sanjel Dios. 8Xitzun ttzak'we'n majen: —At jun tal sak pwak wuc'ile. Jacu txi kk'o'n te t-sanjel Dios tu'ntzun ttzaj tma'n ke alcye be tu'n t-xi ki'n. 9(Tuj tk'ijlalil ojtxi, ka at jun aj Israel tajbil tu'n t-xi tkanin jun t-xjel te Dios, in xi tma'n: Ko' tuc'il ju xjal ba'n nabin tu'n Dios, che chi; porque aju toc tbi ja'lo “t-sanjel Dios”, atzun ojtxi “jun xjal ba'n nabin tu'n Dios” tbi.) 10—E tbant ic tza'n ma tmaya, ko'tzun tuc'il, chi Saúl. Cubtzun be cyu'n cycabil tu'n cyxi' tuj tnam jatum najltok t-sanjel Dios, 11ex tej matok in che jax twitz jawl tjak' tnam, oc cyc'ulban cyib cyuc'il junjun txin cyja' cyxi' k'il a', ex xi cykanin cye: —¿Ape ta' ju xjal ba'n nabin tu'n Dios tuj lugar lu? 12Atzun cye txin tzaj cytzak'we'n: —Atzunju, pero max ta' ma jawnix. Tz'oc tililx cykane, yaque ma tzul tuj tnam lu tu'n t-xi tk'o'n jun chojbil tibaj altar tjax twi witz. 13Oc cypone ma chixin cnetel cyu'ne, na'nxtok t-xi wa'l tuj lugar te c'ulbil. Mlay che oc ten xjal wa'l ka na'nxtok tpon, porque a in cub cy'iwlante chojbil. Te tibajxi jlu che oqueltzun ten xjal wa'l, akeju otok che tzaj txco'n. Cyja'tzun, cyxi'ye ja'lo, porque a or jlu jacu cnet cyu'ne, che chi txin. 14E jaxtzun bet tu'n cyjapun tuj tnam ex tej ch'ixtok cycanun tuj tnam, cyja' ttzaj Samuel tuj be k'i'n cyu'n tu'n t-xi' tuj lugar te c'ulbil. 15Te ewtok, tej na'nxtok tpon Saúl, otok tzaj tma'n Kman te Samuel: 16Ax or jlu nchi'j tzul nsama'ne jun xinak tuc'ila, tzajni tuj cytx'otx' tiyjil Benjamín, ex atzun jlu c'oquel tk'o'na toclen te cawil cyibaj aj Israel akeju etzan wu'ne. Atzun jlu oc clolte cye tjak' cycawbil aj Filistey, porque ma tzaj tz'e'y nc'u'je cyi'j ke xjal etzan wu'ne. Aju tk'ajk'ajel cywi' tu'n ta'w c'ixc'oj ma japun wuc'ile, chi Dios te Samuel. 17Tejtzun tilwaj Saúl tu'n Samuel tzaj tma'n Kman te: Atzunju xinak lu aju xi nma'ne teya. Atzun jlu c'oquel te cawil cyxol ke xjal etzan wu'ne. 18Tej cyocx ttxa'n tnam, xi lak'e' Saúl tuc'il Samuel, ex xi tma'n te: —Binchama xtalbil, yec'untza weye jatum ta' tja ju xjal ba'n nabin tu'n Dios, chi Saúl. 19—Akine ju xjal ba'n nabin tu'n Dios. Nejcuya nwitze tu'n kjax tuj lugar te c'ulbil ex jacu wa'na wuc'ile ja'lo ma chixin. Ex nchi'j te prim cxel ntzak'we'ne tcyakilju taja tu'n ttzaj t-xjelina weye, ex cxel nk'o'ne ambil teya tu'n tcub be tu'na. 20Akeju ttxu tburra, ma bant-xi ox k'ij cyxilen naj, mi'n bisuna cyi'j, porque ma che cnet. Ax icx tcyakilju mas tbanil at cye aj Israel c'oquel te teya, ex te cye keju ate' tuj tjaya, chi Samuel. 21Xitzun ttzak'we'n Saúl: —Pero tiyjil Benjamín we kin, aju mas tal ch'in cyxol mastl c'loj cyiyjil aj Israel. Ex mya nok o'cx jlu, ax icx keju at t-xilen nmane cyuc'il, mas ch'in cyoclen cywitz mastl xjal cyxol tiyjil aj Benjamín. ¿Tiku'ntzun in tzaj tma'na tcyakil jlu weye? 22Tzajtzun k'i'n Saúl tu'n Samuel tuc'ix tmajen, e je'xtzun ti'n ma tuja, ex xi tk'o'n ju lugar mas ba'n te cye twitzju cye mastl xjal otok che txquet tu'n, porque balo 30 cybet ke xjal ate'tok. 23Xitzun tma'n Samuel teju binchal chibj: —K'intza chibj aju xi nk'o'ne teya ex xi nma'ne teya tu'n tel tpa'na. 24Tzajtzun ti'n naj ju binchal chibj junca tcux chibj ex xi tk'o'n te Saúl, ex xi tma'n Samuel te Saúl: —Aju chibj lu pa'maj te teya wu'ne. Chux chyo'na, porque tej ẍe tzaj ntxco'ne ke xjal, ma tz'el npa'ne jlu tu'n tajben te tchi'ya ja'lo, chi Samuel. O wa'n Saúl tuc'il Samuel tuj k'ij lu. 25Tej cycu'tz tuj ju lugar te c'ulbil, e ul tuj tnam ex oc ten Samuel yolil tuc'il Saúl ma twi ja. 26Tujtzun juntl k'ij atx kwitz e jaw we', ex tej ttzaj t-xe cya'j cu'tz txco'n Saúl twi ja tu'n Samuel, ex xi tma'n te: —We'ctza tu'n t-xi tlajo'ntl tbeya k'i'n. Jawtzun we' Saúl. Te tibajxi etz tuj cay tuc'ix Samuel, 27ex tej ch'ixtok cycu'pun ttxa'n tnam, xi tma'n Samuel te Saúl: —K'manxa te tmajena tu'n t-xi' nej, ex atzun teya, ayon jurata nej, porque il ti'j tu'n t-xi nma'ne teya aju o tma Dios weye.

will be added

X\