1 E tzajtzun ke aj Quiriat-jearim ex xi cyi'n ju cax c'ubl tley Dios, ex ocx cyk'o'n tuj tja Abinadab aju tcubsa'n twi' jun tal witz, ex baj cyxjansa'n Eleazar aju tcy'ajal Abinadab tu'n toc tcwentin cax. 2 Eltzun winkin abk'i tponlen cax tuj Quiriat-jearim, ex cycyakil aj Israel in che bisuntok ex in che cubsantok twitz Kman; 3 cyja'tzun xi tma'n Samuel cye cycyakil aj Israel: Ka ma che ajtz meltz'aje tuc'il Kman tu'n tcyakil cyanmiye, il ti'j tu'n tex cyxo'ne ke tilbilal nno'c cydiosin xjal cyuj mastl nasyon, cyuc'ix ke tilbilal cydios xjal Astarot tbi, ex o'cxtzun tu'n cyajbene te Kman ex tu'n cyc'ulune o'cx te. Ka ma cybinchaye jlu, ate Kman c'onil cyeye tu'n cyetze tjak' cycawbil aj Filistey, chi Samuel. 4 Extzun cyxo'n aj Israel nimcu txcaj tilbilal Baal, ex tuc'ix Astarot akeju cydios, ex o'cxtzun e c'ulun te Kman. 5 Xi tma'ntl Samuel cye: Cychmon baje cycyakil ke aj Israel tuj lugar Mizpa, ex jacu chin na'ne Dios cyi'je. 6 Octzun cychmon cyib aj Israel tuj lugar Mizpa, ex jatz cyi'n a' tuj lugar ma chixin ex cub cyko'n te jun techal ka otok txi cyk'o'n cyanmi te Kman. Tuj k'ij lu cub cyyo'n we'yaj ex jatz cypa'n cyil twitz Kman. Atzun tuj lugar Mizpa oc Samuel te nejenel cyxol ke aj Israel. 7 Tejtzun cybinte aj Filistey ka otok tz'oc cychmon cyib aj Israel tuj Mizpa, cub be cyu'n ke nejenel cye tu'n cyoc ten k'ojlel cyi'j. Tej cybinte aj Israel jlu, tzaj nim cyxobil cywitz aj Filistey, 8 ex xi cyma'n te Samuel: Mi'n txi tcolina tu'n tcubsana ki'je twitz Kman aju Kdios, tu'ntzun kcolpete tu'n tuj cyk'ab aj Filistey. 9 Tzajtzun ti'n Samuel jun tal ẍne'l cucx tch'u'n, ex cub tpatun tcyakil te jun chojbil te Kman, ex oc ten cubsal twitz Kman cyi'j aj Israel, ex tzaj tbi'n Dios aju tkanbetz. 10 Tej matok in cub tpatun Samuel tal ẍne'l, e pon aj Filistey tu'n cyoc ten k'ojlel cyi'j aj Israel; tzajtzun tk'o'n Kman jun k'ancyok matij wen cyi'j aj Filistey, ex bi'x e xob tu'n, ex cyja'tzun tten cub cyi'j cyu'n aj Israel. 11 E je'tztzun naj ke aj Israel tuj lugar Mizpa tu'n cyoc lpe' cyi'j aj Filistey, e oc tzokpaj tu'n cyk'ojin cyi'j, ex maxtzun e we' tjak'xi lugar Bet-car. 12 Tzajtzun ti'n Samuel jun abj ex cub tk'o'n t-xol lugar Mizpa tuc'il lugar Sen, oc tk'o'n tbi abj Eben-ezer ex tma: Atzun tbi c'oquel porque cucx tonin Kman ki'j ja'lo. 13 Cyja'tzun cub cyi'j aj Filistey ex minti'tl e ocx juntl maj tuj cytx'otx' aj Israel tu'n cyk'ojin cyi'j. Tuj tcyakil tank'ibl Samuel o che mayet ke aj Filistey tu'n Kman. 14 Akeju tnam otok che el cyi'n aj Filistey cye aj Israel, tzajnix ke' ti'j tnam Ecrón ex ponin baj max ti'j tnam Gat, e oc juntl maj te cye aj Israel. Cyja'tzun tten cyaj co'pj juntl maj cytx'otx' aj Israel tuj cyk'ab aj Filistey. Ax icx minti' k'oj o ten cyxol aj Israel cyuc'il aj Amorrey. 15 O ten Samuel te nejenel cyxol aj Israel tuj tcyakil tank'ibl, 16 ex tcyakil abk'i in xi aj Samuel tuj Betel, ex tuj Gilgal, ex tuj Mizpa, tu'n tnuc'et ti'j alcye tu'n tbant cyxol aj Israel cyuj ke lugar lu. 17 Te tibajxi nna'jtz tu'n tul tuj Ramá jatum ta'tok tja, ex axtzun in cawin cyibaj aj Israel. Ax icx jaw tbincha'n jun altar te Kman tuj lugar lu.
