1 SAMUEL 6

1Tbajlenxi wuk xjaw tponlen cax c'ubl tley Dios tuj cytx'otx' aj Filistey, 2e tzajtzun cytxco'n aj Filistey ke cypal ex keju ba'n che k'ijin, ex xi cykanin cye: —¿Ti c'oquel ti'j cax c'ubl tley Dios ku'ne? Cyk'mantze keye alcye tumel tu'n taj kk'o'ne aju cax c'ubl tley Dios tuj tlugar, che chi. 3Atzun cye xi cytzak'we'n: —Ka ma tz'aj cyk'o'ne cax c'ubl tley Cydios aj Israel, mi'n tz'aj cyk'o'ne junx te, nok o'cx cyk'onxe ch'in oyaj te Dios te chojbil cyile ex octzun che banixele, ex atzun c'elel cynic'e ti'j tiku'n na'nx tel k'i'n cycastiwoye, che chi pal. 4—¿Titzun ba'n tu'n t-xi kk'o'ne tu'n tchjet kile? Che chi aj Filistey xi cykanin. Atzun cye pal xi cytzak'we'n: —Jwe' tilbilal cyakc'u k'an pwak cytx'otx'il, jun te junjun nejenel cye aj Filistey, tuc'ix jwe' tilbilal ich', ax k'an pwak cytx'otx'il, tu'nju aylex yabil in che c'ixbisanjtze tu'n, ax icx ke nejenel cyeye. 5Cyja'tzun cybinchame ke tilbilal cyakc'u ex ke tilbilal ich', porque cyu'ntzun ke jlu ma naj cyawale. Ex cynimsan jawe tbi Cydios aj Israel; balo mlay tzaj tk'o'ntl castiw cyibaje ex cyibaj ke cydiose, ex tibaj cytx'otx'e. 6¿Tiku'n ma cub cycyuwsa'n cyanmiye ic tza'n cybincha aj Ejipt ex Faraón, porque tej cyc'ixbisanjtz cyuwxix wen tu'n Cydios aj Israel, maxitzun e etz tzokpi'n aj Israel cyu'n. 7Atzun ja'lo cybinchan baje jun carret ac'aj; ex cyi'ntze cabe vac cucx tch'u'n cyal, akeju vac na'nx tjax ten yuw ti'j cykul, ex che cyk'on oque te jawol carret, pero mi'n che'x cytzokpi'ne ke cyal tu'n cyxi lpe' cyi'j, nok o'cx che cylamo'n cyaje tuj pe'n. 8Ex cyi'ntze cax c'ubl tley Cydios aj Israel, cyk'on jaxe tuj carret, ex atzun keju k'an pwak aju cxel cyk'o'ne te chojbil cyile, cyk'on cu'xe tuj jun cajón, ex cyk'on cube ttxlaj cax, ex e cyxi bet ke vac cyjunal cye tuc'ix carret jawo'n cyu'n. 9Pero lpex cywitze ti'j; ka a ma txi' carret tumlal tnam Bet-semes jatum tzajni cax, atzun c'elel knic' ti'j ka tu'n Dios ma tzaj tk'o'n mya ba'n lu kibaj; ex katzun mi'n, atzun c'elel knic' ti'j ka mya tu'n Dios ma cub tk'o'n kcastiw, nok o'cx minaben ma tzaj jlu kibaj, che chi pal. 10Banttzun cyu'n keju xinak icju. Tzaj cyi'n cabe vac cucxtok cych'u'n cyal, e oc cyc'alo'n te jawolte carret, ex e cyaj cylamo'n ke cyal tuj pe'n; 11jaxtzun cyk'o'n cax c'ubl tley Dios tuj carret, tuc'ix ju cajón jatum cycu'x ke tilbilal ich' k'an pwak cytx'otx'il ex ke tilbilal cyakc'u. 12Te tibajxitzun jlu e ic'tzun bet ke vac, ex atzun e je'x tuj be in xi' tu'n tpon tuj tnam Bet-semes, in che muyin ex jikun e je'x, minti' xi cyi'n juntl be. E oc lpe' ke nejenel cye aj Filistey cyi'j tejxi cypon tuj tmojonil Bet-semes. 13Atzun cye aj Bet-semes in jawtok triw cyu'n tuj chk'ajlaj, ex tej t-xi cyque'yin, o cyil aju cax c'ubl tley Dios, ex e jaw tzalaj nimxix. 14Tejtzun tpon carret tuj tcojbil Josué aju aj Bet-semes, axtzun o we', ex tuj lugar lu attok jun nintz abj. Atzun cye aj Bet-semes baj cytx'emin carret te si', ex cub cybyo'n ke vac, ex e cub cypatun te jun chojbil te Kman. 15Atzun cye aj Leví cu'tz cyi'n cax c'ubl tley Dios, ex aju cajón jatum cycu'x ke ti'xti k'an pwak cytx'otx'il, ex e jax cyk'o'n twi' ju nintz abj. Atzun cye aj Bet-semes cub cypatun ke alumaj te jun chojbil, ex xi cyk'o'n mastl oyaj te Kman tuj k'ij lu. 16Tejtzun cybaj que'yin ke jwe' nejenel cye aj Filistey ti'j jlu, e ajtzun meltz'aj tu'n cypon tuj tnam Ecrón ax k'ij lu. 17Akeju jwe' tilbilal cyakc'u k'an pwak cytx'otx'il xi cyk'o'n aj Filistey te Cydios aj Israel te chojbil cyil: Jun ti'j tnam Asdod, juntl ti'j tnam Gaza, juntl ti'j tnam Ascalón, juntl ti'j tnam Gat, ex juntl ti'j tnam Ecrón. 18Aju cyajlal ke tilbilal ich' k'an pwak cytx'otx'il junx ta' ic tza'n cyajlal cytanmi aj Filistey jatum in che cawin ke jwe' nejenel, tza'nx ke tnam toc muro cyi'j ax icx ke aldey minti' muro toc cyi'j. Aju nintz abj jatum jax k'o'n cax c'ubl tley Dios ax ta' ja'lo tuj tcojbil Josué, aju aj Bet-semes. 19Pero e cyim junjun aj Bet-semes tu'n Kman tu'nju tcu'xlen cyque'yin tuj cax c'ubl tley Dios. 70 xinak e cyim, atzun ke mastl xjal e oc ten ok'el tu'n tlaj otok che cyim nim xjal cyxol tu'n Kman. 20Ex cymatzun ke aj Bet-semes: ¿Alcye jun jacu bant twe' twitz Kman aju Dios xjan? Ex ¿jatum ba'n tpon tu'n mi'n ttentl kxol? 21Xitzun cysama'n ke sanjel cyuc'il ke xjal tuj tnam Quiriat-jearim tu'n t-xi cyma'n cyja': Ma tz'ajtz k'o'n cax c'ubl tley Dios cyu'n aj Filistey; cyja'tzun cytzaje tu'n t-xi cyi'ne.

will be added

X\