1 SAMUEL 5

1Tejtzun t-xi cyi'n ke aj Filistey ju cax c'ubl tley Dios tuj Eben-ezer, pon cyi'n tuj tnam Asdod. 2Tzajtzun cyi'n ex ocx cyk'o'n tuj tja cydios Dagón tbi, ex junx cub cyk'o'n ttxlaj Dagón. 3Te prim tuj juntl k'ij tej cypon aj Asdod o cyil lu te Dagón mutzl tcub twitz tx'otx' twitz cax c'ubl tley Dios. Jawtzun cyi'n ex cub cyk'o'n tuj tlugar. 4Ax icx tuj juntl k'ij te prim tej cypon aj Asdod, lu Dagón mutzl tcubtl twitz tx'otx' twitz cax c'ubl tley Dios. Aju twi' ex ke tk'ab otok che el tokj ex cycub tibaj tmarquil ttzi ja twitz tx'otx'. Nok o'cx ju t-ximlal minti' pax. 5Cyja'tzun, oc cyocx ke pal ex ka mastl xjal tuj tja Dagón tuj Asdod, minti' in cub cyk'o'n cykan tibaj ttzi tmarquil ja, ex cucx tbant cyu'n ja'lo. 6Atzunte Kman cub tk'o'n jun castiw cyuwxix cyibaj aj Asdod, ex nimxix xobajil tzaj cyi'j, ex jaw jlet cyakc'u cyi'j cycyakil xjal tuj tnam Asdod ex cyi'j xjal cyuj cycyakil lugar te tnam lu. 7Tejtzun cylonte aj Asdod aju in bajtok, cymatzun: Aju cax c'ubl tley Cydios aj Israel mya ba'n cucx tu'n tten kuc'il, porque ma tzaj jun kcastiw cyuwxix tu'n, ax icx ti'j Dagón aju kdios, che chi. 8Tu'ntzun jlu xi cyma'n cye cycyakil ke nejenel cyxol aj Filistey tu'n toc cychmon cyib cyuc'il, ex xi cykanin cye: —¿Ti c'oquel ti'j ju cax c'ubl tley Cydios aj Israel? Atzun cye nejenel cye aj Filistey xi cyma'n: —Cyi'nxe tuj tnam Gat. Xitzun cyi'n aj Filistey cax c'ubl tley Dios ma chixin. 9Tejtzun tpon cyk'o'n tuj tnam Gat, e c'ixbisettzun ke aj Gat tu'n Kman tu'n cyakc'u e jaw jlet cyi'j cycyakil xjal, tza'nx ke tij xjal ax icx cyi'j ke c'wa'l, tzajtzun nim xobajil tuj tnam cyxol ke xjal. 10Cyja'tzun ic' cyi'ntl aj Filistey cax c'ubl tley Dios tu'n tpon tuj tnam Ecrón, pero tej tcanun cax ma chixin, ke xjal najl tuj tnam Ecrón jaw tk'ajk'ajel cywi' ex cyma: Ma tzul k'i'n cax c'ubl tley Cydios aj Israel kuc'il tu'n kcyim kcyakil, che chi xjal. 11Tuj tcyakil tnam e baj sec'paj cycyakil xjal tu'n tlaj castiw cyuwxix otok tzaj t-sama'n Dios cyi'j. Ex tu'n tlaj nimcu xjal in che cyim, e je'xtzun txocbaj cycyakil ke nejenel cyxol aj Filistey, ex xi cyma'n cye: Cyi'nxe cax c'ubl tley Cydios aj Israel ex cyk'on aje tuj tlugar, tu'ntzun mi'n kcyime kcyakile tu'n, che chi. 12Ex aju tk'ajk'ajel cywi' ke xjal japun max twitz cya'j, porque akeju minti' in che cyim, jumajx nojni cyi'j tu'n cyakc'u.

will be added

X\