1 SAMUEL 30

1Tujxi toxin k'ij e pon David cyuc'ix ke xinak ate' tuc'il tuj tnam Siclag, pero tej cypon otok che ocx aj Amalec tuj tx'otx' Néguev, ex otok che oc tzokpaj ti'j tnam Siclag; bi'x otok baj naj tcyakil cyu'n ex otok tz'oc cyk'o'n tk'ak'al. 2Ax icx otok txi cyi'n ke xu'j, ke c'wa'l ex ke tij xjal ate' ma chixin, pero mi jun otok cub cybyo'n. 3Tej tpon David tuj tnam cyuc'ix ke xinak ate' tuc'il, ex tej tcyil otok baj tz'e'y tnam ex otok che'x k'i'n ke cyxu'jil cyuc'ix ke cycy'ajal ex ke cyme'jel, 4e oc ten ok'el cyuwxix wen max tejxi tel baj cyipun. 5Ax icx otok che'x k'i'n keju cabe t-xu'jil David ex atzun ke jlu; Ahinoam aju aj Jezreel, ex Abigail aju t-xu'jilben ktzan Nabal aju aj Carmel. 6Tzaj nim t-xobil David tu'nju in che yolintok xjal tu'n toc cyxo'n abj ti'j, porque cycyakil otok tz'oc ta'w cyi'j tu'nju otok che'x k'i'n ke cyc'wa'l. Masque icju, pero o'cx oc ke' tc'u'j David ti'j Kman aju Tdios, 7ex xi tma'n te pal Abiatar aju tcy'ajal Ahimelec: —Binchama xtalbil, k'intza aju capiẍay in ajben cyu'n ke pal. Tejtzun tpon ti'n Abiatar aju xbalun tuc'il David, 8oc ten kanilte te Kman ex tma: —¿Ba'npe tu'n woc lpe'ye cyi'j ke elek' lu? ¿Jacupe chin pon canune cyi'j? Atzunte Kman tzaj ttzak'we'n: —Ba'n tu'n toc lpe'ya cyi'j, porque jacu pon canuna cyi'j ex jacu che colpaj ke xjal ma che'x cyi'n. 9Jurat naj cub be tu'n David cyuc'ix ke kak syent xinak ate' tuc'il, ex e pon ttzi' jun tk'ab xak Besor tbi. Ax tuj lugar lu e cyaj ten cab syent xinak, 10ex ya minti' e ic'x tuj tk'ab xak porque otok che sict; atzun juntl cyaje syent xi cylajo'ntl cybe junx tuc'il David tu'n cypon canun cyi'j ke elek'. 11Yajxi ch'intl cnet jun xjal aj Ejipt tuj cojbil cyu'n, ex xi cyi'n twitz David ex xi cyk'o'n twa ex tc'a: 12xi cyk'o'n jun piẍ tlo' higo betz'a'maj ex cabe rasim uva tzkijsa'maj. Tbajlenxi wa'n aj Ejipt o tna' oc mas tipun, porque tuj ox k'ij ex ox konic'an minti' ch'in wabj otok txi' tu'n, ex mi ch'in c'abj. 13Xitzun tkanin David te: —¿Alcye tpatrona? ¿Jatum tzajniya? Atzunte aj Ejipt xi ttzak'we'n: —Aj Ejipt kine ex tmajen jun xjal aj Amalec, pero ma bant-xi ox k'ij in cyaj coline tu'n npatrone tu'nju in yabte, 14porque o ko'x aje elk'al tuj cytx'otx' aj Seretey, tuj cytx'otx' aj Judá, ex tjak' cytx'otx' aj Caleb akeju cycubsa'n tuj tx'otx' Néguev. Ax icx o tz'oc kk'o'ne tk'ak'al tnam Siclag. 15—¿Jacupe txi'ya yec'ulte weye jatum ate' ke elek' lu? Chi David xi tkanin. Atzunte aj Ejipt xi ttzak'we'n: —Ka ma tzaj tma'na weye jun tyola axix toc twitz Dios, tu'n mi'n ncub tbyo'na ex tu'n mi'n nxi' tk'o'na tuj tk'ab npatrone, jacutzun chinxe yec'ulte teya jatum ate' ke, chi xjal. 16Xi'tzun aj Ejipt yec'ulte jatum ate' ke elek', ex tej cypon, lu ke otok baj cysputun cyib tuj cojbil, in che wa'ntok, in che c'antok ex in che ic'santok jun nink'ij ti'j tcyakilju otok txi cyelk'a'n tuj cytx'otx' aj Filistey ex tuj cytx'otx' aj Judá. 17Octzun tzokpaj David cyi'j, tzyet-x tu'n te kale ex maxi xi tcolin te kale te juntl k'ij tejxi cycub baj cycyakil, masque at cyaje syent cu'xun e tzokpaj, cyjax ke cyibaj chej camey. 18Cyja'tzun tten, el ti'n David juntl maj tcyakilju otok txi cyelk'a'n aj Amalec, cyuc'ix ke cabe t-xu'jil. 19Mi jun ti'xti cyaj ten masque tal ch'in, ex mi jun c'wa'l ex mi tij xjal atxtok taj, porque otok tz'el tcyakil tu'n David juntl maj. 20Ax icx tzaj ti'n David ke cyẍne'l ex ke cywacẍ, ex in cyma'ntok keju lajol cye cyja': Atzun jlu ma tcamba David. 21Tejtzun tpon meltz'aj David ttzi tk'ab xak Besor jatum otok che cyaj ten cab syent xinak minti' e je'x tuc'il tu'n tlaj otok che sict, e je'tz naj canul ti'j cyuc'ix cyi'j keju otok che'x aj tuc'il. Tejtzun tpon lak'e' David cyuc'il, xi k'olben cye. 22Pero ke xjal mya ba'n cynabl ex jawni ke ate' cyxol keju otok che'x aj tuc'il David xi cyma'n cyja': Mi'n txi kk'o'n jun ti'xti cye ti'j ju ma kcamba tuj k'oj, tu'nju minti' ma che'x aj kuc'il, nok o'cx cyxu'jil ex cyc'wa'l ba'n tu'n t-xi cyi'n ex tu'n cyaj meltz'aj, che chi. 23Atzunte David xi tma'n cye cyja': —Mi'n cybinchaye jlu akeye wermaniye, porque tu'n Kman ma tzaj tk'o'n jlu ke, ex tu'n ma ko clet tu'n mi'n kcyim, ex tu'n ma che cub tz'ak ke elek' tuj kk'ab, porque otok che oc tzokpaj ki'j. 24Mi a'l jun jacu txi binte aju in cyma'ne, porque oc tcub sipet aju ma cambet, parej che k'il keju e cyaj ten cwentil macbil, ic tza'n keju otok che'x aj k'ojlel, chi David. 25Atxix tuj k'ij lu, iclex in bant cyu'n aj Israel, ax icx tuj tk'ijlalil ja'lo. 26Tej tpon David tuj tnam Siclag, xi t-sama'n ch'in cye ke tamiw akeju tij xjal aj Judá, ti'j ju otok tcamba cyi'j aj k'oj, ex xi tma'n cye: Lu jun oyaj lu te cyeye ti'j ju ma ncambaye cyi'j aj k'oj ti'j Kman, chi David. 27Xi t-sama'n oyaj cye keju ate' cyuj ke tnam lu: Betel, Ramot aju ta' tuj tx'otx' Néguev, Jatir, 28Aroer, Sifmot, Estemoa, 29Racal, tuc'ix cye keju ate' cyuj ke tnam ate' tuj tcwent Jerameel ex cye keju ate' cyuj ke cytanmi aj Quenit, 30cye keju ate' tuj tnam Horma, tuj Corasán, tuj Atac, 31tuj Hebrón, ex cyuj cycyakil lugar jatum otok tzic' aj David cyuc'ix ke xinak tuc'il.

will be added

X\