1 SAMUEL 29

1Octzun cychmo'n aj Filistey cycyakil ke cysoldad tuj lugar Afec, atzun ke aj Israel e cub ten ttxlaj jun twi a' at tuj lugar Jezreel. 2Nejni ke aj Filistey tuj c'lojin te jun syentchak ex te jun milchak cybet, ex teyle junjun c'loj atlex nejenel cye; atzunte David cyuc'ix ke xinak ate' tuc'il ex tuc'ix Aquis lepch ke cyi'j. 3Xitzun cykanin ke nejenel cye aj Filistey te Aquis: —¿Ti nbaj cye aj Hebrey tzalu? Atzunte Aquis xi ttzak'we'n: —A David jlu aju o ten ttxlaj Saúl aju rey cye aj Israel. Pero ma bant-xi ela' k'ij ax ta' wuc'ile, ex atxix tuj k'ij tej tpon wuc'ile ax icx ja'lo minti' jun tbinchben mya ba'n o wile, chi Aquis. 4Tzajtzun cyk'oj ke nejenel cye aj Filistey ti'j Aquis ex xi cyma'n te: —K'manxa te tu'n taj meltz'aj tuj lugar o txi tk'o'na te ex tu'n mi'n ttzaj kuc'il tuj k'oj, porque jacu bant ax tz'oc te aj k'oj ki'j oc kk'ojin, porque ka ma che cub tbyo'n ke ksoldad, jaculo moje' juntl maj tyol tuc'il Saúl. 5Baka mya a David jlu, aju in che bitzantok xjal ti'j ex in che bixantok ti'j ex in cyma'ntok: Jun mil xinak ma che cub tu'n Saúl, atzunte David laj mil, che chi ke nejenel. 6Tzajtzun txco'n David tu'n Aquis ex xi tma'n te: —Cxel nma'ne jun yol teya axix toc twitz Kman, aya jun xinak tz'aklxix ex nim in chin tzalaje ti'j tbinchbena cyxol ke soldad. Mi jun tbinchbena mya ba'n o wile atxix tej tpona wuc'ile. Pero minti' in che tzalaj ke nejenel cye aj Filistey ti'ja, 7cyja'tzun taj meltz'aja ex mi'n bisuna, tu'ntzun mi'n tbinchanteya aju minti' in che tzalaj aj Filistey ti'j, chi Aquis. 8Atzunte David xi ttzak'we'n: —Pero, ¿ti ma nbinchaye? ¿Alcye mya ba'n o nbinchaye twitza tat rey atxix tej npone tuc'ila, tu'nju mi'n taja tu'n nxi'ye k'ojlel cyi'j aj k'oj ti'ja? 9Xitzun tma'n Aquis te: —Ba'n wu'ne ic ttena ic tza'n jun t-anjel Dios tu'nju ba'n tbinchbena, pero ke nejenel cye aj Filistey ma cyma tu'n mi'n t-xi'ya k'ojlel kuc'ile. 10Cyja'tzun, primx we'ctza nchi'j cyuc'ix ke xinak ma che tzaj tuc'ila, tu'n cyaj meltz'aje, chi Aquis. 11Te juntl k'ij primx jaw we' David cyuc'ix ke xinak ate' tuc'il ex e aj meltz'aj tuj cytx'otx' aj Filistey; atzun ke aj Filistey xi cylajo'n cybe tu'n cypon max tuj lugar Jezreel.

will be added

X\