1 SAMUEL 28

1Tuj tk'ijlalil lu baj cychmo'n aj Filistey ke cysoldad tu'n cyk'ojin cyi'j aj Israel, ex atzunte Aquis xi tma'n te David: —Ba'n tu'na il ti'j tu'n texa wuc'ile tuj k'oj cyuc'ix ke xinak ate' tuc'ila. 2Atzunte David xi ttzak'we'n: —Ba'n, tat rey. Ja'lo c'elel tnic'a ti'j alcye jacu bant wu'ne, akine tmajena. Atzunte Aquis xi tma'ntl te David: —C'oquel nk'o'ne te nejenel te jumajx cyxol ke soldad xk'ukil weye. 3Ya otok cyim Samuel ex otok che baj ok' cycyakil aj Israel ti'j, ex otok cu'x maku'n ax tuj ttanmi, tuj tnam Ramá. Atzunte Saúl otok che ex tlajo'n ke aj k'ij cyuc'ix keju in tzaj cytxco'n cyanmi cyimni. 4Oc cychmon cyib aj Filistey ex cub be cyu'n tu'n cycub ten tuj lugar Sunem, ex atzunte Saúl e oc tchmo'n cycyakil aj Israel ex atzun e cub ten twi witz Gilboa; 5pero tej ttil Saúl cycampament aj Filistey, tzaj nim t-xobil ex bi'x naj tnabl. 6Xitzun tkanin Saúl te Kman alcye tu'n tbant tu'n, pero minti' tzaj tzak'we'n tu'n Kman, mi tuj witzic', mi tu'n swert ex mi cyu'n ke t-sanjel Dios. 7Tu'ntzun jlu xi tma'n Saúl cye ke nejenel cyxol t-soldad: —Cyjyontze jun xu'j ba'n txocon cyi'j cyanmi cyimni, tu'ntzun t-xi nkanin jun nxjele te. —At jun xu'j tuj lugar Endor ba'n txocon cyi'j cyanmi cyimni, che chi ke nejenel cye soldad, xi cytzak'we'n. 8Eltzun tch'expu'n Saúl t-xbalun tu'n mi'n tel nic'baj ti'j ex junxitl t-xbalun oc tk'o'n; xi' tuc'il xu'j te konic'an ex xi tuc'in cabe xinak tu'n cyxi' tuc'il. Xitzun tma'n te xu'j: —In chin cubsane twitza tu'n tjaw ti'na jun nswerte ex tu'n tul tanmi jun cyimni tu'na, aju cxel nma'ne teya. 9Atzunte xu'j tzaj ttzak'we'n: —Ba'n tu'na aju o tbincha Saúl, o che etz tlajo'n ke aj k'ij tuj tnam, cyuc'ix keju in tzaj cytxco'n cyanmi cyimni. ¿Tiku'n in chin ocx tk'o'na tuj jun xobajil tu'n ncyime? 10Pero xi tma'n Saúl jun tyol axix toc twitz Kman te xu'j cyja': —Cxel nma'ne jun yol axix toc twitz Kman, mlay cub tcastiwoya tu'n tlaj jlu, chi Saúl. 11¿Alcyetzun taja tu'n ttzaj ntxco'ne? Chi xu'j xi tkanin. —Txconctza Samuel, chi Saúl. 12Minaben o til xu'j Samuel ex bi'x jaw sch'in; xitzun tma'n te Saúl: —¿Tiku'n ma chin cub t-sbu'na? Aya Saúl. 13Atzunte rey xi tma'n te: —Mi'n xoba. ¿Ti ma tila? —Ma wile tanmi jun cyimni cyja' tjatz tuj tx'otx', chi xu'j. 14¿Tza'n que'yin? Chi Saúl, xi tkanin. —Jun xinak tij xjal, tocsa'n jun t-ẍjo'w, chi xu'j. Eltzun tnic' Saúl ti'j ka a Samuel, ex cub ẍmeje' ex max pon tacl tibaj twitz twitz tx'otx'. 15Xitzun tma'n Samuel te Saúl: —¿Tiku'n ma labta wi'je tu'n ntzaj ttxco'na? Xi ttzak'we'n Saúl: —Tu'nju ma tzaj nimxix nbise, porque ma che oc tzokpaj aj Filistey tu'n cyk'ojin wi'je ex ma chin cyaj coline tu'n Dios. Minti' in chin tzaj tzak'we'ne tu'n, mi cyu'n ke t-sanjel ex mi tuj witzic'. Cyja'tzun ma tzaj ntxco'ne tu'n ttzaj tma'na weye alcye tu'n nbinchanteye. 16Atzunte Samuel tzaj ttzak'we'n: —¿Tiku'n in tzaj tkanina weye ka ma cyaj colina tu'n Kman ex ka ma tz'oc te aj k'oj ti'ja? 17Ma tbincha Kman ti'ja aju tzaj tma'n weye. Ma tz'el ti'n toclena te rey ex ma txi tk'o'n te David aju tuc'ila. 18Tu'nju minti' xi tnimana aju tyol tzaj tma'n teya tu'n cynaj aj Amalec tu'na, cyja'tzun ma bant jlu tu'n Kman ti'ja. 19Ex mya o'cx jlu, ax icx che xel k'o'n aj Israel tuc'ix aya tu'n Kman tuj cyk'ab aj Filistey, ex nchi'j cpola wuc'ile cyuc'ix ke tcy'ajala. Icx cxel tk'o'n Kman cycyakil soldad aj Israel tuj cyk'ab aj Filistey, chi Samuel. 20Bi'x cub tz'ak Saúl twitz tx'otx' ex cub tx'ile'. Nimxix t-xobil tzaj tu'n tyol Samuel ex otok baj tipun tu'n tlaj na'nxtok twa'n tuj enter k'ij ex enter konic'an. 21Tejtzun toc tque'yin xu'j otok naj tnabl Saúl, pon lak'e' ttxlaj ex xi tma'n te: —Akine tmajena ma txi nnimane aju xtkaniya, ex ma wak' wibe tu'n ncyime nok tu'n t-xi nnimane aju saj tma'na weye. 22Ja'lo in chin cubsane twitza tu'n nxi tnimana: Cxel nk'o'ne ch'in twaya tu'n toc tipuna ex tu'n tcub be tu'na. 23Minti' cub tuj twitz Saúl tu'n twa'n, pero akeju nejenel cye t-soldad ate' tuc'il ex ju xu'j e oc ten lajwersilte maxi tej t-xi tniman tu'n twa'n. Jawtzun we' twitz tx'otx' ex cub ke' twi' jun watbil. 24Atzunte xu'j cub tbyo'n jun tal tor ulni tnabl almi'n tu'n tja, ex baj t-xyok'in ch'in arin minti' t-samel tuj tu'n tjaw mal tc'u'j tu'n tocx ttxo'n. 25Xitzun ti'n jlu te Saúl tuc'ix cye ke nejenel cye t-soldad, ex tej cybaj wa'n, baj cyk'olben cyib ex cub be cyu'n ax konic'an lu.

will be added

X\