1 SAMUEL 27

1Masque icju, in ximantok David ti'j cyja': Cpol jun k'ij chin bel byo'ne tu'n Saúl. Cyja'tzun aju mas ba'n tu'n nbinchanteye, chin xel oke tuj cytx'otx' aj Filistey tu'ntzun ntene tuj txubtxaj ex tu'ntzun t-xi tcolin Saúl tu'n tjyon wi'je tuj cytx'otx' aj Israel. Ka ma nbinchaye icju, chin cletele tu'n mi'n ncub byo'ne tu'n, chi David. 2Cubtzun be tu'n David cyuc'ix kak syent xinak ate' tuc'il, tu'n cypon tuj cytx'otx' aj Filistey ex xi cyk'on cyib tuj tcwent Aquis, aju rey tuj tnam Gat. Ate Aquis tcy'ajal Maoc. 3E pontzun bant David najal cyuc'ix ke xinak ate' tuc'il ex e ten junx tuc'il Aquis tuj tnam Gat, ex teyle junjun najan junx cyuc'il keju ate' tuj tja. Xi ti'n David keju cabe t-xu'jil ex atzun cybi jlu: Ahinoam aju aj Jezreel, ex Abigail aju t-xu'jilben ktzan Nabal aju aj Carmel. 4Tej tbinte Saúl ka otok pon ok David tuj tnam Gat, ya minti'tl xi lpe' ti'j. 5Xitzun tma'n David te Aquis: —Ka tajbila tu'n tbinchanteya xtalbil weye tat rey, in chin cubsane twitza tu'n ttzaj tma'na weye tu'n nxi'ye najal nok alcyex tnam tuj tx'otx' lu, porque akine ajbel teya mya ba'n tu'n nnajane junx tuc'ila tzalu tuj tnam jatum in cawina. 6Ax k'ij lu xi tk'o'n Aquis tnam Siclag te David tu'n tnajan tuj. Cyja'tzun aju tnam Siclag cucx tcyaj tjak' cycawbil ke rey cye aj Judá ja'lo. 7Jun abk'i tuc' cyaje xjaw najan David tuj cytx'otx' aj Filistey. 8Tej cyten tuj tx'otx' lu, ate David cyuc'ix ke xinak ate'tok tuc'il, in che oc tzokpajtok k'ojlel cyi'j aj Gesur, aj Gezer ex aj Amalec, akeju otok tz'elxi nim abk'i cycublen ten najal tuj tx'otx' ma chixin, in tzyet-x tu'n jatum ta' tbeyil Shur ex max in pon baj tuj Ejipt. 9Oc in che oc tzokpajtok k'ojlel cyi'j, mi jun xinak ex mi jun xu'j in cyaj ten cyu'n, cycyakil in che cyim cyu'n. Ax icx in xi cyi'n ke ẍne'l, ke wacẍ, ke bur, ke chej camey ex ke xbalun. Octzun t-xi cycolin tu'n cyoc tzokpaj, in che ajtz meltz'aj jatum ta' Aquis, 10atzunte Aquis in xi tkanintok cye: ¿Alcye tnam ma che oc tzokpaje ti'j ja'lo? Atzunte David in xi ttzak'we'n: Ma ko oc tzokpaje cyi'j ke tnam tcub tuj tnayaj k'ij te Judá ex tuj tnayaj k'ij te Jerameel, ex tuj tnayaj k'ij te cytx'otx' aj Quenit, chi David. 11Mi jun xinak ex mi jun xu'j in cyaj ank'intok tu'n David, tu'ntzun mi jun tu'n t-xi k'malte ti'j jlu tuj tnam Gat. Tuj tcyakil tk'ijlalil tej tten David tuj cytx'otx' aj Filistey iclex o bant tu'n. 12Atzunte Aquis, k'ukltok tc'u'j ti'j David ex in ximantok ti'j cyja': Niban toc David te aj k'oj cyi'j aj Israel akeju t-xjalil, cyja'tzun cucx c'ajbel weye te jumajx, chi Aquis.

will be added

X\