1 SAMUEL 24

1Tej tul meltz'aj Saúl t-xilenxi tcolin tu'n toc lpe' cyi'j aj Filistey tu'n tcub cyi'j tu'n, pon tkanil tuc'il ka atzun ta'tok David tuj tzkij tx'otx' En-gadi. 2Jawtzun t-sc'o'n Saúl ox mil xinak cyxol aj Israel ex xi' jyolte David, atzun e je'x ke t-soldad cywi' ke nmak pic jatum ate' ke chip te tjak' c'ul. 3Tuj be k'i'ntok tu'n Saúl lu jun tpe'n ẍne'l tcub, ex nikayin ttxlaj attok jun toy' pic jatum tewan tib David cyuc'ix ke xinak ate' tuc'il. Ocx Saúl tuj toy' pic lu tu'n ttxa'n. 4Xitzun cyma'n ke xinak te David, akeju ate'tok tuc'il: —Matzun ma japun ju yol tzaj tma'n Kman teya chi cyja': Cxel nk'o'ne aj k'oj ti'ja tuj tk'aba, binchama nok alcye taja tu'n tbant ti'j, chi Kman, che chi. Jawtzun we' David ex chebaxix el tkesin jun piẍ ttxa'n t-ẍjo'w Saúl, 5pero tej tbant jlu tu'n, tzaj tbis tu'nju otok tz'el tkesin jun piẍ ttxa'n t-ẍjo'w Saúl, 6ex xi tma'n cye ke xinak ate' tuc'il: —Miwt tak' Kman ambil weye tu'n toc nk'o'ne nk'abe ti'j npatrone aju rey, porque rey te, ex ax Kman o jaw sc'onte te tu'n toc te rey, chi David. 7Cyja'tzun e mayet ke xinak tu'n David, akeju ate'tok tuc'il, ex minti' xi tk'o'n ambil cye tu'n cyoc tzokpaj ti'j Saúl. Etztzun Saúl tuj toy' pic ex xi ti'ntl tbe. 8Pero tzaj lpe' David ti'j ex xi sch'in ti'j cyja': —Tat Rey, Tat Rey. Ajtztzun tque'yin Saúl ti'jxi, atzunte David cub ẍmeje' ex pon tacl tibaj twitz max twitz tx'otx' te jun techal te nimbil, 9ex tma: —Aya Tat Rey ¿tiku'n in xi tnimana cyyol xjal, akeju in che k'mante teya ka in chin jyone tumel tu'n tbant jun mya ba'n ti'ja wu'ne? 10Pero aya Tat Rey matzun tila tu'n twitza, masque ate Kman xcub k'onte teya tuj nk'abe tuj toy' pic, pero minti' xwajbeye tu'n tcub nbyo'ne, nok o'cx cucx ma cyaj ank'ina wu'ne ex nchiye tuj nximbetze: Mlay tz'oc nk'o'ne nk'abe ti'j, porque reyte, ex tu'n Kman jaw t-sc'o'n. 11Aya Tat Rey, que'yintza aju k'i'n tuj nk'abe, jun piẍ ttxa'n t-ẍjo'wa ma tz'el nkesine, ex tiltzun cabalxwitlo xcuba wu'ne. Tu'ntzun jlu jacu tz'el tnic'a ti'j, misicyer ch'in in chin ximane tu'n nbinchanteye jun mya ba'n ti'ja, minti' ma jaw wi'n wibe tu'n nk'ojine ti'ja, ex minti' wile ma nbinchaye twitza; atzun teya, Tat Rey, in jyo'na wi'je tu'n ncub tbyo'na. 12Awt Kman txi binchante ki'j kcabil ex awt Kman k'onte t-xel teya, Tat Rey, ti'j ju ma tbinchaya wi'je, atzun weye mlay tz'oc nk'o'ne nk'abe ti'ja. 13At jun tal twitz yol in cyma'n ojtxi xjal cyja': O'cx ke xjal mya ba'n in che ximan ti'j tu'n cybinchante jun mya ba'n, atzun weye mlay tz'oc nk'o'ne nk'abe ti'ja, Tat Rey. 14¿Al setz lpe'ya aya Rey cye aj Israel? ¿Al lepcho'ca tu'n tcub ti'j tu'na? Wi'je tzaj lpe'ya, ic ntene tuj twitza ic tza'n jun cyimni tx'yan ex ka ic tza'n jun cy'ak. 15Cyja'tzun, awt Kman tz'oc te jwes ex awt txi binchante ki'j kcabil, ex awt Kman baj xpich'unte wile ex awt k'mante ka minti' wile, ex awt colin wi'je tuj tk'aba Tat Rey, chi David. 16Tejtzun tbaj tma'n David ke yol lu, tma Saúl: —¿Apetzuna ncy'ajale David in yolina wuc'ile? Jawtzun ok' Saúl, 17ex xi tma'n te David: —Ax toc mas ba'n teya tmod nwitze, ma tbinchaya ba'n weye te t-xel ju mya ba'n ma bant ti'ja wu'ne. 18Ma tzaj tyec'una ja'lo ka at tbis tc'u'ja tu'n tbinchanteya ba'n weye, porque otok chin cub k'o'ne tuj tk'aba tu'n Kman, pero minti' ẍin cub tbyo'na. 19Ax toc oc toc noj jun xjal ti'j aj k'oj ti'j, minti' in xi ttzokpi'n tu'n mi'n tcub tbyo'n, cyja'tzun awt Kman k'onte t-xel teya ti'j ju ba'n ma tbinchaya weye ja'lo. 20Ja'lo ma tz'el nnic'e ti'j ka aya c'oquel te rey, ex oc toca te rey cyibaj aj Israel segurxix ctel tcawbila. 21K'mantza jun yol weye axix toc twitz Kman, ka mi'n che cub tbyo'na ke wiyjile ex mi'n cub tyupina nbiye cyxol wermaniye, chi Saúl. 22Xitzun tma'n David jun yol axix toc te Saúl, ex te tibajxi jlu ajtz Saúl tu'n tul tja, ax icx te David cyuc'ix ke xjal uc'in tu'n e je'x tu'n cypon tuj lugar te cycolbil cyib.

will be added

X\