1 SAMUEL 23

1At jun k'ij e oc tzokpaj aj Filistey ti'j tnam Keila, ex xi cyelk'a'n aju triw c'itzketok baj xupet tuj. Tejtzun tbinte David jlu, 2xi tkanin te Kman ex tma: —¿Ba'npe tu'n nxi'ye k'ojlel cyi'j aj Filistey? Atzunte Kman tzaj ttzak'we'n: —Ba'n tu'n t-xi'ya porque cbel cyi'j tu'na tu'n cyclet ke xjal ate' tuj tnam Keila. 3Pero ke xinak ate' tuc'il David xi cyma'n te: —Nokpe in ko xob tzalu tuj Judá, pyortzun ka ma ko'x tuj Keila k'ojlel cyi'j ke soldad aj Filistey. 4Xitzun tkanintl David juntl maj te Kman, atzunte Kman tzaj ttzak'we'n: —K'oncuya be ex txi'ya tuj tnam Keila, porque che xel nk'o'ne aj Filistey tuj tk'aba tu'n tcub cyi'j tu'na. 5Xi'tzun David cyuc'ix ke xinak ate' tuc'il, tu'n cypon tuj tnam Keila; atzun e oc tzokpaj cyi'j aj Filistey ex cub cyi'j cyu'n, ex e oc te cyajwil ke alumaj. Cyja'tzun tten e clet ke xjal ate' tuj tnam Keila tu'n David. 6Tuc'ixtok Abiatar aju tcy'ajal Ahimelec otok pon ok tuc'il David tuj Keila, ex k'i'n jun tcapiẍay pal tu'n. 7Tej t-xi k'ma'n te Saúl ka atok ta' David tuj tnam Keila, cub t-ximan cyja': Ax Dios ma tzaj k'onte te tuj nk'abe tu'n tcub ti'j wu'ne, porque tu'nx ma tz'ocx tk'on tib tuj jun tnam at tlamel ex at pasador ti'j, chi Saúl. 8Te tibajxi e tzaj ttxco'n Saúl cycyakil ke t-soldad tu'n cyxi' tuj tnam Keila, ex tu'n tbaj cytxolban cyib ti'jele tnam tu'ntzun ttzyet David cyu'n cyuc'ix ke xinak ate' tuc'il. 9Pero tej tbinte David ka cyja'tok toc tzokpaj Saúl ti'j, xi tma'n te pal Abiatar tu'n ttzaj ti'n aju capiẍay in ajben cyu'n pal, tu'ntzun toc ten kanilte te Kman alcye tu'n tbant tu'n. 10Tmatzun David: —Aya Kman Dios aju Cydios aj Israel, akine tmajena, ba'n wu'ne taj Saúl tu'n ttzaj tzalu tuj Keila tu'n tbaj t-xitun tnam nok tu'n nlaje. 11¿Axpe toc tzul Saúl jyolte weye ic tza'n o nbiye? ¿Chin xelpe k'o'ne cyu'n ke xjal aj Keila tuj tk'ab? Aya Kman Dios aju Cydios aj Israel, in chin cubsane twitza tu'n ttzaj tma'na weye, akine tmajena. Atzunte Kman tzaj ttzak'we'n: —Ax toc tzul Saúl. 12Xitzun tkanin David: —¿Ko xelpe k'o'ne tuj tk'ab Saúl cyu'n ke xjal tuj Keila, akine cyuc'ix ke xinak ate' wuc'ile? Atzunte Kman tzaj ttzak'we'n: —Che xel k'o'ne cyu'n tuj tk'ab Saúl. 13Ic'tzun David tuj tnam Keila cyuc'ix ke xinak ate' tuc'il, balo at kak syent cybaj, ex nok in che betje' cyuj ke lugar. Tejtzun tbinte Saúl ka otok tzic' ok David tuj tnam Keila, ya minti' xi' jyolte te. 14Axtzun cyaj ten David najal tuj junjun lugar te tcolbil tib cywi witz tuj Zif tuj lugar minti' cynajbil xjal tuj, ex masque tcyakil k'ij in jyontok Saúl ti'j David, minti' tak' Dios ambil tu'n tcnet tu'n. 15Tejtzun tel tnic' David ti'j ka otok tz'etz Saúl jyolte te tu'n tcub tbyo'n, ax cyaj ten tuj lugar Hores tuj Zif, tuj lugar minti' cynajbil xjal tuj. 16At jun k'ij xi' Jonatán aju tcy'ajal Saúl que'yilte David tuj lugar Hores, tu'n t-xi tcyuwsa'n te tu'n o'cx tu'n toc ke' tc'u'j ti'j Dios. 17Ex xi tma'n te: —Mi'n xoba, porque mlay cneta tu'n nmane Saúl. Cpol jun k'ij aya c'oquel te rey cyxol aj Israel, atzun weye chin oquele te jun xjal mas ma' toclen ttxlaja. A jlu ya ba'n tu'n nmane. 18Cyajtzun bant ti'j jun cyyol cycabil, ex a Dios oc cyk'o'n te testiw ti'j cyyol. Te tibajxi ajtz meltz'aj Jonatán, atzunte David ax cyaj ten tuj lugar Hores. 19Pero ke xjal najl tuj tnam Zif e je'x tuj tnam Gabaa k'malte te Saúl: —Lu David in ewan tuj ktx'otx'e, tuj junjun lugar te tcolbil tib at twi witz Haquila tuj lugar Hores, aju tcub tuj tnayaj k'ij tuj lugar minti' cynajbil xjal tuj. 20Cyja'tzun, ka taja Tat Rey, ba'n tu'n t-xi'ya, ex jacu txi kk'o'ne tuj tk'aba. 21Atzunte Saúl tzaj ttzak'we'n: —Awt Dios cy'iwlante cyeye, tu'nju ma tzaj k'ak'an cyc'u'je wi'je. 22Ja'lo chin cubsale cyeye tu'n cyxi'ye jyolte te jatum ta' ex jatum in tewan tib, ex alcye o lonte te ma chixin, porque bi'n wu'ne jawni twitz tu'n t-sbun. 23Cheba cyque'yinxe cycyakil lugar jatum nno'cx tewan tib, ex cyajtz meltz'aje wuc'ile k'malte jun tkanil cabalxix tu'ntzun nxi'ye cyuc'ile. Katzun ax toc max ta' tuj cytx'otx'e, cxel njyo'ne cyxol cycyakil tiyjil Judá, chi Saúl. 24E ajtzun meltz'aj ke aj Zif tu'n cypon tuj cytanmi, ex te tibajxi xi lpe' Saúl cyi'j. Atzunte David cyuc'ix ke xinak tuc'il otok che pon tuj lugar Maón tbi, aju lugar minti' cynajbil xjal tuj, aju tcub tuj chk'ajlaj tuj tnayaj k'ij te tzkij tx'otx'. 25Atzunte Saúl cyuc'ix mastl xjal tuc'il cub be cyu'n tu'n tjyet David cyu'n. Tej tpon tkanil tuc'il David ti'j jlu, cu'x naj cyxol ke nmak pic cycub tuj lugar Maón tbi, aju lugar minti' cynajbil xjal tuj. Tejtzun tbinte Saúl, xi' tuj lugar Maón tu'n toc lpe' ti'j David tu'n tcub tbyo'n. 26Ate Saúl cyuc'ix ke xinak ate' tuc'il in che bettok ti'j jun pac' witz, atzunte David ex ke tuc'il ti'j juntl pac' witz in che kelan wen tu'n cyel ok twitz Saúl. Tej otok baj cytxolban cyib ke t-soldad Saúl ti'j David ex cyi'j keju ate'tok tuc'il, ex ch'ixtok cytzyet cyu'n, 27pon jun xjal k'olte jun tkanil tuc'il Saúl ex tma: —Jurat naj taj meltz'aja Tat Rey, porque ma che ocx aj Filistey k'ojlel tuj ktx'otx'. 28Xitzun tcolin Saúl tu'n toc lpe' ti'j David, ex xi' tu'n toc tzokpaj cyi'j aj Filistey. Cyja'tzun aju lugar lu oc tbi: Aju matij pic jatum o tzokpaj. 29Tbajlenxitzun jlu xi' David najal tuj lugar te tcolbil tib tuj lugar En-gadi.

will be added

X\