1 SAMUEL 21

1Xi'tzun David tuc'il pal Ahimelec tuj tnam Nob, ex bi'x naj tnabl pal tej tetz canul ti'j David ex xi tma'n te: —¿Tiku'n saja tjunala ex mi a'l jun tuc'ila uc'in? 2Atzunte David xi ttzak'we'n: —Ate rey ma tzaj tma'n jun mandar weye ex ma tzaj tma'n tu'n mi a'l jun tu'n tbinte tiku'n ẍin tzaj sama'ne tu'n, ex alcye mandar k'i'n wu'ne. Atzun ke xinak ate' tjak' ncawbile ma cyaj nma'ne cye alcye lugar tu'n nc'ulbante wibe cyuc'il. 3Atzun ja'lo: ¿ti ch'in nic'bebl at tuc'ila? K'ontza jwe' pan weye ex ka nok alcye at tuc'ila. 4Atzunte pal xi ttzak'we'n: —Minti' pan at wuc'ile aju nok elaj pan; at pan, pero cy'iwla'maj, jacu txi nk'o'ne teya ka ikan ti'j cyu'n ke xinak ate' tuc'ila. 5Atzunte David xi tma'n jun yol te cyuwsabl: —Ic tza'n in ko etze tuj kbeye syempr ikan ti'j ku'ne masque nok ch'in t-xilen ju kbeye, pero akeju xinak ate' wuc'ile syempr ikan ti'j cyu'n, pyortzun tej xko etze ja'lo. 6Xitzun tk'o'n pal ke pan cy'iwla'maj porque minti'tok juntl pan at tuc'il, nok o'cx ju pan cy'iwla'maj te Kman at, ex ax k'ij lu tej cyjaw k'i'n pan tibaj altar tu'n tcub k'o'n mastl ac'aj pan te t-xel. 7Attok jun tmajen Saúl otok cyaj ten tuj tja Dios tuj k'ij lu, Doeg tbi, aj Edom te ex nejenel cye ke tpastor Saúl. 8Xitzun tma'n David te Ahimelec: —¿Atpe jun lans ex ka jun spad at tuc'ila? Porque tej saj tk'o'n rey aju orden weye, minti' xtak' ambil tu'n ttzaj wi'ne nspadiye ex ke mastl macbil in che ajben wu'ne. 9Atzunte pal xi ttzak'we'n: —Ax ta' t-spad Goliat wuc'ile, aju aj Filistey cub ti'j tu'na tuj chk'ajlaj Ela tbi. Atzun tcub ti'jxi capiẍay in ajben cyu'n pal, tocx tuj jun piẍ xbalun. Ka taja, ba'n tu'n t-xi ti'na, porque o'cxcu jlu at wuc'ile ex minti' mastl. Xitzun tma'n David te pal: —Balo minti' juntl mas ba'n twitz jlu. K'ontza, cxel wi'ne. 10Texju k'ij lu xi tlajo'n David tbe tu'n tel ok twitz Saúl, ex pon max tuc'il Aquis aju rey tuj tnam Gat. 11Atzun keju at cyoclen ttxlaj Aquis xi cyma'n te: —¿Myapetzun a David jlu aju rey tuj tx'otx' ma chixin? ¿Myapetzun ti'j in cyma'ntok xjal tej matok in che bitzan ex in che bixan, ka jun mil xjal otok cub tu'n Saúl atzunte David otok che cub laj mil tu'n? 12Tej tbinte David ke yol lu, tzaj t-xobil twitz Aquis aju rey tuj tnam Gat. 13Cyja'tzun cywitzx ke jlu ch'expet tmod ex oc tk'on tib ic tza'n jun loc, ex oc ten scatil twitz tlamel ja ex cu'tz bekin ta'l ttzi' tuj txmaltzi'. 14Xitzun tma'n Aquis cye keju at cyoclen ttxlaj: —¿Minti'pe soc cyque'yine ka loc ju xinak lu? ¿Ti tiltzun saj cyi'ne wuc'ile? 15¿Baka minti' loc at tzalu, tu'nju ma tzaj cyi'ne juntl loc tuj njaye tu'ntzun toc nque'yine ju tloc-yil?

will be added

X\