1 SAMUEL 19

1Xi tma'n Saúl te Jonatán aju tcy'ajal, ex cye cycyakil aj sanjelal ate' ttxlaj, tu'n tcub byo'n David cyu'n, pero tu'nju nimxix in tzalaj Jonatán ti'j David, 2xi tma'n aju t-ximbetz tman te David cyja': —Taj nmane Saúl tu'n tcub byo'na tu'n. Cyja'tzun ten tcwenta ti'ja; te prim nchi'j bix txi tewan tiba tuj jun lugar jatum mlay cneta. 3Chin xe'le junx tuc'il nmane tuj cojbil jatum ta'ya. Chin yolile twitz nmane ti'ja, aver chi toc tu'n, ex cxel nma'ne teya alcye ctzajel tma'n weye, chi Jonatán te David. 4Octzun ten Jonatán yolil tuc'il Saúl ti'j David ex xi tma'n te: —Aya Tat Rey, mya tuj tumel tu'n tbinchanteya jun mya ba'n ti'j David aju tmajena, porque misicyer jun mya ba'n ma tbincha ti'ja, nokpe jun ba'n ma tbincha cywi' ke puy. 5porque o tak' tib tu'n tk'ojin tuc'il aj Filistey ex o cub tu'n, cyja'tzun e clet cycyakil aj Israel tu'n Kman. O tila jlu Tat Rey, ex nimxix o tzalaja ti'j. ¿Tiku'ntzun taja tu'n tcyim jun xjal minti' til ex tu'n tcub tbyo'na David nokx gan? 6Tej tbinte Saúl tyol Jonatán tma: —Cxel nma'ne jun yol axix toc twitz Kman; mi'n cub nbyo'ne David. 7Tzajtzun txco'n David tu'n Jonatán ex xi ttx'olba'n tcyakilju yol otok tma Saúl te. Te tibajxi xi k'i'n David tu'n Jonatán twitz Saúl, ex axtzun cyaj tentl David te ajbel te ic tza'nx tej tten nej. 8Tzyet juntl maj k'oj ex xi'tl David tu'n tk'ojin cyi'j aj Filistey, cub cyi'j tu'n ex nimxix e cub tbyo'n, cyja'tzun tten e bje'l ok. 9Atzunte Saúl tzyet juntl maj tu'n ju'ẍ sama'n tu'n Kman, tej k'ukltok tuj tja tuc'ix tlans tuj tk'ab. Matok in k'o'n David chnab 10tej t-xi t-xayu'n Saúl tlans ti'j David twitz tcajonil ja. Pero cub jokpaj David ex aju tlans Saúl bi'x xi xuyl tuj tcajonil ja. Texju konic'an lu ex ok David tuj tja Saúl ex o clet. 11Xitzun tk'o'n naj Saúl orden cye ke tmajen tu'n cyxi' ma tja David, tu'n cycub ten cwentil ti'j ex tu'n tcub cybyo'n te prim tuj juntl k'ij. Pero ate Mical aju t-xu'jil David o k'onte tkanil ex xi tma'n te: —Ka mi'n ma tcol tiba tuj konic'an ja'lo, ax toc cymela prim nchi'j. 12Cu'tztzun k'o'n David ti'j sakbak ttzi' jun ventan tu'n Mical ex cyja'tzun o colpaj. 13Te tibajxi tzaj ti'n Mical jun tilbilal ex jax tk'o'n twi twatbil David, cub tmuk'an tibaj tu'n jun xbalun, ex jax tk'o'n jun piẍ ttz'umal chip tuc'ix ttzmal ti'j twi'. 14Tejtzun cypon t-sama'n Saúl ke tmajen tu'n ttzyet David cyu'n, xi tma'n Mical cye ka yabtok ta'. 15Atzunte Saúl xi tma'ntl cye tmajen tu'n cyxi' juntl maj ex tu'n ttzyet cyu'n: —Masque yab David, pero cyi'n etze ex cyi'ntze tzalu tu'n tcub nbyo'ne, chi Saúl xi tma'n cye. 16E ocxtzun ke tmajen Saúl tuj tja David, pero o'cx ju tilbilal cnet cyu'n tuc'ix ju ttzmal chip tjax tuj twi'. 17Xitzun tma'n Saúl te Mical: —¿Tiku'n ma chin cub t-sbu'na tu'n jlu ex ma tz'ex ttzokpi'na aju aj k'oj wi'je? Atzunte Mical xi ttzak'we'n: —Porque ma tma jun yol weye cyja': Ka mi'n ma chin ex ttzokpi'na, cbel nbyo'ne, chi Mical. 18Cyja'tzun tten el ok David ex o colpaj. Xi'tzun David tuc'il Samuel max tuj tnam Ramá, ex xi ttx'olba'n tcyakilju otok baj ti'j tu'n Saúl. Te tibajxi e je'x najal tuc'ix Samuel tuj lugar Naiot. 19Tej tbinte Saúl ka atzun ta'tok David tuj lugar Naiot, aju ta' tuj tcwent tnam Ramá, 20e je'x t-sama'n ke tmajen tu'n ttzyet David cyu'n. Tejtzun cypon ke tmajen Saúl tuj lugar lu, o cyil lu jun c'loj t-sanjel Dios in che yolin ti'j yol in tzaj tma'n Dios cye, ex a Samuel toc te nejenel cye. Cubtzun ten T-xew Dios cyibaj ke tmajen Saúl ex e oc ten yolil ti'j yol in tzaj tma'n Dios cye. 21Tejtzun tbinte Saúl jlu, xi t-sama'n juntl c'loj tmajen, pero ax icx cye e oc ten yolil ti'j yol in tzaj tma'n Dios cye. Tuj toxin maj xi t-sama'ntl Saúl juntl c'loj tmajen, pero ax icx cye e oc ten yolil ti'j yol in tzaj tma'n Dios cye. 22Xi'tzun Saúl twitzelcu tuj tnam Ramá, ex tej tpon jatum ta' jun nintz xoch tuj lugar Secú tbi, xi tkanin jatum ta'tok Samuel ex David, ex tzaj k'ma'n te ka atzun ate' tuj lugar Naiot aju ta' tuj tcwent tnam Ramá. 23Entons xi' Saúl tuj lugar lu. Pero ax icx te cub ten T-xew Dios tibaj, ex oc ten yolil ti'j yol in tzaj tma'n Dios te tej in bettok, max tejxi tpon tuj lugar Naiot aju ta' tuj tcwent tnam Ramá. 24Ex mya nok o'cx oc ten yolil ti'j yol in tzaj tma'n Dios te, ax icx el ti'n t-xbalun ex cucx skitl ti'j twitz tx'otx' twitz Samuel tuj enter k'ij ex enter konic'an. Atzun tzajni jlet ju tal twitz yol lu: ¿Maj tuc'ix Saúl toc te t-sanjel Dios?

will be added

X\