1 At jun k'ij xi tma'n Samuel te Saúl: —Akine in tzaj sama'ne tu'n Kman tu'n tjaw nsc'o'na, tu'n toca te rey cye aj Israel akeju etzan tu'n. Cyja'tzun bintza aju in tma'n Kman teya: 2 Chitzun Kman aju Tajaw Tcyakil: Cbel cycastiw aj Amalec wu'ne tu'n tlaj ju mya ba'n cybincha cyi'j aj Israel, tu'nju e cub ten tuj cybe tu'n cyoc ten k'ojlel cyi'j tej cyetz tuj Ejipt. 3 Cyja'tzun txi'ya ex toc tzokpaja cyi'j; xitun baja tcyakilju at cye ex mi'n tzaj k'ak'an tc'u'ja cyi'j. Byoncuya ke xinak, ke xu'j, ke c'wa'l ex ke ne' cucx cych'u'n, ax icx ke wacẍ, ke ẍne'l, ke chej camey ex ke bur, chi Kman. 4 Xitzun tma'n Saúl tu'n cyxi txocbaj ke xinak, ex jaw ti'n cyajlal tuj lugar Telaim. Attok cabe syent mil xinak in che bet tu'n cykan ex laj mil xinak aj Judá. 5 Te tibajxi jlu xi' Saúl tuj ju nintz tnam cye aj Amalec, ex e cub tk'o'n ke t-soldad tuj jun tk'ab xak, 6 ex xi tma'n cye aj Quenit: —Cypa'n el cyibe, cyexe cyxol aj Amalec tu'ntzun mi'n cynaje wu'ne junx cyuc'il, porque o cybinchaye ba'n cyi'j aj Israel tej lajo'ntok cybe cyetzlen tuj Ejipt. Eltzun cypa'n cyib aj Quenit cyi'j aj Amalec. 7 Octzun tzokpaj Saúl k'ojlel cyi'j aj Amalec ex cub cyi'j tu'n, tzajx ke' k'oj cyu'n tuj lugar Hávila, ex max pon baj twi' tuj lugar Shur aju tmojon tib tuc'il Ejipt. 8 Tzyettzun rey Agag tu'n Saúl ex e cub tbyo'n cycyakil ke t-soldad. 9 Atzunte Agag minti' cub byo'n tu'n Saúl ex cyu'n ke t-soldad; ax icx minti' e cub cybyo'n ke tbanil ẍne'l, mi ke tbanil wacẍ, mi ke tal wacẍ mas ulni cynabl, mi ke tal ẍne'l, ex minti' e baj naj ke ti'xti wi'yilxix cyu'n, o'cx baj naj cyu'n tcyakilju mya'xix tbanil ex mya wi'yil. 10 Tzajtzun yolin Kman tuc'il Samuel ex tma cyja': 11 —Miwt oc nk'o'ne Saúl te rey, porque ma tz'el tpa'n tib wi'je ex minti' ma japun tu'n aju yol xi nma'ne te, chi Dios. Tu'ntzun jlu tzaj nim tbis Samuel ex enter konic'an o cubsan twitz Kman. 12 Tejtzun kskix tuj juntl k'ij, jaw we' Samuel primxix wen tu'n t-xi' tuc'il Saúl, pero tzaj k'ma'n te ka otok txi' Saúl tuj lugar Carmel ex atzun ma chixin otok jaw twaban jun abj matij te nablte, ex tbajlenxi jlu txuc otok txi' tuj Gilgal. 13 Xi'tzun Samuel jatum ta' Saúl ex xi tma'n Saúl te: —Awt Kman cy'iwlan teya. Ma japun tyol Kman wu'ne. 14 Atzunte Samuel xi tkanin te: —¿Ti t-xilen tk'ajk'ajel cywi ẍne'l ex cywi wacẍ in nbi'ne? 15 Atzunte Saúl xi tma'n: —Max ma che tzaj ke tuj cytx'otx' aj Amalec, porque ma che cyaj cyclo'n xjal ke tbanil ẍne'l cyuc'ix ke tbanil wacẍ, tu'n t-xi k'ot te chojbil te Kman Dios, atzun ke mastl bi'x ma che cub kbyo'ne, chi Saúl. 16 —Mi'n k'ajta, porque cxel nma'ne teya aju saj tma'n Kman weye konic'an may', chi Samuel. —Yolina, chi Saúl, xi ttzak'we'n. 17 Xitzun tma'n Samuel te: —Masque nej nok ch'in toclena tuj twitza, pero ma tz'oc k'o'na te nejenel cye cyiyjil aj Israel, ex ma tz'oc k'o'na te cyrey tu'n Kman. 18 Ex at jun orden cyuwxix o txi tk'o'n Kman teya, tu'n cynaj ke aj Amalec tu'na tu'nju aj ilxix ke, ex tu'n toc tzokpaja cyi'j max oc cycub baj. 19 ¿Tiku'ntzun minti' ma txi tnimana aju orden tzaj tma'n Dios teya, ex tza'n tten ma tz'oc tzokpaja tu'n ttzaj ti'na aju ma tz'el cyi'ne cye aj k'oj, ex ma tbinchaya mya ba'n twitz Kman? 20 Atzunte Saúl xi ttzak'we'n: —Ma txi nnimane aju orden tu'n Kman, ex ma japun wu'ne aju tzaj tma'n weye tu'n nbinchanteye: Ma tzyet Agag wu'ne aju rey cye aj Amalec, ex ma tzaj wi'ne, ex ma che baj naj aj Amalec wu'ne. 21 Pero ake soldad ẍe tzaj k'inte ke ẍne'l ex ke wacẍ akeju iltok ti'j tu'n cynaj, ex akeju mas tbanil ma jaw cysc'o'n tu'n cycub byet tuj Gilgal, ex tu'n cyxi k'ot te jun oyaj te Kman Dios, chi Saúl. 22 Xitzun tma'n Samuel cyja': —Mas ba'n nne'l tuj twitz Kman tu'n t-xi kniman tyol twitzju tu'n t-xi kk'o'n ke chojbil te, ex ke oyaj patun in che cub; mas ba'n tu'n t-xi kniman tyol ex tu'n t-xi kk'o'n kwi' ti'j ju in tma'n, twitzju tu'n cyxi kk'o'n ke chojbil te ex cysebyil ẍne'l. 23 Ax il in tbincha'n jun xjal ka minti' in xi tniman tyol Kman ic tza'n ju mya ba'n in tbincha'n jun xjal ba'n k'ijin; ex aju xjal chcyinwi' junx ta' ic tza'n jun xjal in c'ulun cywitz ke tilbilal. Ic tza'n teya minti' ma txi tnimana tyol Kman, ax icxtzun te ma tz'el ic'una tu'n, tu'n mi'n ttentla te rey, chi Samuel. Xitzun tma'n Saúl te Samuel cyja': 24 —Ax toc ma chin binchane il, minti' ma che japun ke tmandamyent Kman wu'ne ex ke yol e tzaj tma'na weye, porque tzaj nxobile cywitz ke xjal ex xi nnimane aju o cyma. 25 Pero in chin cubsane twitza tu'n tcub tnajsa'na wile ex ko' wuc'ile tu'n nc'ulune te Kman. 26 Atzunte Samuel xi ttzak'we'n te Saúl: —Mlay chinxe tuc'ila, porque ma tz'el tic'una aju yol tzaj tma'n Kman teya, ex ja'lo icx teya ma tz'el ic'una tu'n Kman, tu'n mi'n ttentla te rey cye aj Israel. 27 Tej cyja'tok taj meltz'aj Samuel tu'n tcub be tu'n, tzyet ttxa'n t-ẍjo'w tu'n Saúl, ex bi'x xi sbit'j ju ẍjo'w. 28 Xitzun tma'n Samuel te Saúl: —Icxtzun ma tenba tcawbila cyxol aj Israel ja'lo, ma tz'el sbit'un tu'n Kman. Ma tz'el ti'n teya tu'n t-xi tk'o'n te juntl t-xjalila mas ba'n tmod ic tza'n teya. 29 Porque ate Dios, aju toc te cyajwalil aj Israel, miban nic'an yol ex misicyer in baj tch'expu'n t-ximbetz, porque mya ic tten ic tza'n jun xjal jacu baj tch'expu'n t-ximbetz. 30 Atzunte Saúl xi tma'n juntl maj: —Ma chin binchane il, pero chin cubsale twitza tu'n cucx tnimana weye ic tza'n rey cywitz ke cytijil xjal aj Israel, ex cywitz cycyakil aj Israel. Cyja'tzun tzaja wuc'ile tu'n nc'ulune twitz Kman Dios. 31 Ajtzun meltz'aj Samuel tuc'il Saúl ex oc ten Saúl c'ulul te Kman. 32 Xitzun tma'n Samuel cye xjal: —Cyi'ntze Agag nwitze, aju cyrey aj Amalec. Pontzun k'i'n Agag twitz Samuel in tzalaj wen, ex ximan tu'n ka otok tzic'x ti'j tcamic xobajilxix. 33 Atzunte Samuel xi tma'n te: —Tu'n t-spadiya nimcu xu'j ma che cyaj tk'o'na minti' cyal, cyja'xtzun ctembil ttxu'ya cyxol mastl xu'j, minti'tl tal cyjel. Ex cub tpaẍu'n Samuel t-ximlal Agag tuj Gilgal twitz Kman. 34 Tbajlenxi jlu aj Samuel tuj tnam Ramá, ex atzunte Saúl aj meltz'aj tja ma tuj tnam Gabaa, aju ttanmi. 35 Ex minti'tl oc tque'yin Samuel twitz Saúl juntl maj tuj tcyakil tank'ibl, masque nim o bisun Samuel ti'j Saúl. Atzunte Kman tzaj tbis tu'nju otok tz'oc tk'o'n Saúl te rey cyxol aj Israel.
