1 SAMUEL 13

1Otok tz'oc tc'u'j Saúl tej ttzyet tcawin cyibaj aj Israel, ex tej tjapun cab abk'i ttzyetlen tcawin, 2e jaw t-sc'o'n ox mil soldad cyxol aj Israel. Cabe mil cyaj ten tuc'il tuj tnam Micmas ex tuj tiwitz tx'otx' ti'jele tnam Betel, ex atzun juntl mil cyaj ten tuc'il Jonatán tuj tnam Gabaa tuj cytx'otx' aj Benjamín. Atzun cye txkantl xjal xi tma'n Saúl cye tu'n cyaj cyja. 3Oc tzokpaj Jonatán k'ojlel cyi'j ke soldad akeju cycubsa'n te xk'ukil cyu'n aj Filistey tuj tnam Gabaa, ex o cybi aj Filistey jlu. Xitzun tma'n Saúl tu'n toc k'ajtza'n chun tuj tcyakil tx'otx' Israel, tu'ntzun cybinte aj Hebrey. 4Cycyakil aj Israel o cybi ka otok tz'oc tzokpaj Saúl cyi'j aj Filistey, ex noktzun tu'n tlaj jlu e el ic'un aj Israel cyu'n aj Filistey; cyja'tzun tten oc tchmo'n Saúl ke t-soldad tuj lugar Gilgal. 5Ax icx baj cychmon cyib aj Filistey tu'n cyk'ojin cyi'j aj Israel. Attok ox mil cycarwaj in che ajben tuj k'oj, ex kak mil soldad cyjax cyibaj chej, ex txkantl soldad in che bet tu'n cykan, nim cyajlal wen ic tza'n ttxa tz'a'n ttzi mar. Cubtzun be cyu'n tu'n cyxi' tuj tnam Micmas, ex e cub ten ti'jxi tnam Bet-avén tuj tjawitz k'ij. 6Tejtzun cyque'yinte aj Israel ka ate'tok tuj nim xobajil porque cyja'tok cyoc tzokpaj aj k'oj cyi'j, cyja'tzun e je'x ewal cyib tuj toy' pic, ex tuj jul ex cyxol ke pic, ex tuj tk'ab xak ex tuj tjulil a'. 7Ex at txkantl e ic'x jlajxi nima Jordán tu'n cypon tuj cytx'otx' aj Gad ex tuj cytx'otx' aj Galaad; atzunte Saúl max cyaj ten tuj Gilgal, ex cycyakil ke t-soldad lepchke'c ti'j in che xob wen. 8Cub tyo'n Saúl wuk k'ij ic tza'nx otok tma Samuel te; pero ate Samuel ntz'inix tpon tuj Gilgal, ex cyja'tzun cub be cyu'n junjun tu'n cyaj cyja. 9Xitzun tma'n Saúl cye xjal: —Cyi'ntze ke alumaj tzalu wuc'ile tu'n cycub patit, ex tuc'ix oyaj te mojbabl tibil, chi Saúl. Ex ax Saúl cub patunte cye alumaj. 10Tej matok in cub baj tpatun Saúl ke alumaj, pontzun Samuel. Etz Saúl canul ti'j Samuel ex oc ten k'olbel te, 11pero xi tma'n Samuel te: —¿Tiku'n ma tbinchaya jlu? Atzunte Saúl tzaj ttzak'we'n: —Tej soc nque'yine nibantok cyaj ok xjal cyja, ax icx teya minti' sula tuj tajlal xjaw banimaj ti'j, ex ke aj Filistey otok baj cychmon cyib tuj tnam Micmas; 12entons nchiye cyja': Mya yaj in che cu'tzcu aj Filistey tuj Gilgal tu'n cyk'ojin wi'je, ex atzun weye na'nx t-xi wokxenan wibe tuj tk'ab Kman; cyja'tzun ax kine ẍin oc ten patul cye alumaj, chi Saúl. 13Xitzun tma'n Samuel te: —Aju ma bant tu'na misicyer ch'in tnabl, nokwit ma txi tnimana aju tma Kman teya, mawtlo cyuwsanjtz toclena te rey cyxol aj Israel te jumajx. 14Atzun ja'lo mya cucx ctel toclena te rey. Ctzajel tjyo'n Kman juntl xjal aju in tzalaj ti'j ex c'oquel tk'o'n te nejenel cyxol ke xjal etzan tu'n, porque ma tzic'a tibaj orden tzaj tma'n Kman teya, chi Samuel. 15Ic' Samuel tuj Gilgal ex xi ti'ntl tbe. Atzun ke mastl soldad e oc lpe' ti'j Saúl tu'n ttzyet k'oj cyu'n, e etz tuj Gilgal tu'n cypon tuj tnam Gabaa tuj cytx'otx' aj Benjamín. Atzun e baj tajla'n Saúl ke t-soldad, akeju lepchke'ctok ti'j, balo nok kak syent cybet. 16Ate Saúl tuc'ix Jonatán aju tcy'ajal, ex cyuc'ix ke soldad lepchke'c ti'j, e cub ten tuj tnam Gabaa tuj cytx'otx' tiyjil Benjamín, ex atzun cye aj Filistey e cub ten tuj tnam Micmas. 17At ox c'loj soldad cye aj Filistey e etz tuj cycampament tu'n cyxi' elk'al, jun c'loj cyja' e je'x tuj tnam Ofra tuj lugar toc tbi Sual, 18atzun juntl c'loj cyja' e je'x tuj tnam Bet-Horón ex atzunju toxin c'loj cyja' e je'x ttxa'nile witz tibaj chk'ajlaj Zeboim, tlugaril tzkij tx'otx'. 19Tuj tcyakil cytx'otx' aj Israel misicyer jun tx'inol c'uxbil at, porque atzun cyximbetz aj Filistey tu'n mi'n tten jun tx'inol c'uxbil cyxol aj Hebrey, tu'ntzun mi'n cybant spad ex lans cyu'n. 20Cycyakil aj Israel in che'x cyuc'il aj Filistey tu'n tjuket ttzi cypunt, ex ttzi cych'oc ex ttzi cysi'wbil c'uxbil, ex ttzi cypic. 21Cabe tal sak pwak nne'l k'i'n tu'n tjuket cytzi punt ex cytzi cych'oc, ex jun tal sak pwak nne'l k'i'n tu'n tjuket cytzi cysi'wbil c'uxbil ex tu'n cybaj ju'xit cywi' ke puy. 22Tu'ntzun jlu, mi jun spad ex mi jun lans k'i'n cyu'n xjal lepchke'c ti'j Saúl ex Jonatán tej toc k'oj tuj k'ij lu. Nok o'cx te Saúl ex Jonatán k'i'n spad ex lans cyu'n. 23Ex matok cyja' cyic' jun c'loj soldad cye aj Filistey tuj be nne'x t-xol witz ttxlaj tnam Micmas.

will be added

X\