1 SAMUEL 12

1Xitzun tma'n Samuel cye cycyakil xjal aj Israel: —Ma cyile ma bant wu'ne tcyakilju tzaj cykanine weye, ex ma tz'oc nk'o'ne jun rey tu'n tcawin cyibaje. 2Ex lutzun aju rey lu, aju cbel nej cywitze. Bay weye ma chin tijine ex ma sakix nwi'ye, ex ate' ke ncy'ajale cyxole. Akine in cub nej cywitze ojtxi atxix tuj ncu'xumale ax icx ja'lo, 3ex lu kine atine cywitze: Katzun ma tz'el wi'ne twacẍ jun xjal ex ka tchej, ex ka at jun cyeye ma baj nyajla'ne, ex ka at jun ma nbinchaye mya ba'n ti'j, ex ka at jun ma tz'el nkanine tpwak nok tu'n mi'n tcub t-sentens tu'n tlaj mya ba'n otok tbincha, ba'n tu'n ttzaj cyma'ne jlu twitz Kman ex twitz ju rey ma jaw t-sc'o'n, ex jacu tz'aj nchjo'ne tcyakil, chi Samuel. 4Atzun cye xjal xi cyma'n: —Mi jun maj ma ko baj tyajla'na, ex minti' jun mya ba'n ma tbinchaya ki'je, ex minti' ma tzaj tc'mo'na tpwak jun xjal tu'n tcub tewana til. 5Atzunte Samuel xi tma'n cye: —Lu Kman te testiw cyi'je tuc'ix aju rey ma jaw t-sc'o'n, tu'nju minti' ma cnet jun wile cyu'ne, chi Samuel. —Ax toc jlu, che chi. 6Ex xi tma'ntl Samuel cye tnam xjal: —Ate Kman xi k'onte toclen Moisés ex Aarón tu'n cyetz ke cyxe'chele tuj Ejipt. 7Cyja'tzun cybincham cytene, porque twitz Kman chin yolile cyuc'ile ti'j tcyakilju ba'n ma tbincha cyeye ex cye ke cyxe'chele. 8Tej tpon Jacob cyuc'ix ke tiyjil tuj Ejipt, e octzun ten ke cyxe'chele cubsal twitz Kman; atzunte Kman xi t-sama'n Moisés tuc'ix Aarón, ex atzun ke e je'tz k'inte cye cyxe'chele tuj Ejipt, ex atzun e ul najal tuj lugar lu. 9Atzun cye el cypa'n cyib ti'j Kman aju Cydios, ex ate Kman xi k'onte cye tuj tk'ab Sísara aju nejenel cye t-soldad Jabín aju rey tuj Hazor, ex tuj cyk'ab aj Filistey, ex tuj tk'ab rey cye aj Moab, atzun ke jlu e oc ten k'ojlel cyi'j ke cyxe'chele. 10E cubsantzun twitz Kman ex cyma cyja': Ma ko binchane il twitza Kman, tu'nju ma cyaj kcolina ex ma ko oc tene c'ulul cywitz tilbilal Baal ex cywitz tilbilal Astarot. Ko tclomtzuna ja'lo tuj cyk'ab ke aj k'oj ki'je, ex ko ajbeltzune o'cx teya, che chi. 11Cyja'tzun, ate Kman xi samante Gedeón, tuc'ix Barac, tuc'ix Jefté, ex wuc'ixe akine Samuel, tu'ntzun cyclete tuj cyk'ab ke aj k'oj cyi'je, ex cyja'tzun ẍe ank'ine tuj txubtxaj. 12Atzun cyeye, tej cylonteye cyja'tok toc tzokpaj Nahas cyi'je, aju rey cye aj Amón, tzaj cykanine jun rey weye tu'n tcawin cyibaje, masque aju cyeye cyrey ate Kman aju Cydiose. 13Ex lutzun rey lu, aju ma jaw cysc'o'ne. Ate Kman ma tzaj k'onte rey aju xi cykanine. 14Atzun ja'lo, ka ma txi cynimane Kman ex ka ma che c'ulune te, ex ka ma txi cynimane tyol ex ka mi'n ma che ic'e cyibaj ke tmandamyent, tza'nx akeye ax icx aju rey in cawin cyibaje, ex ka ma che ank'ine ic tza'nx tajbil Kman aju Cydiose, octzun che ank'ile ba'n. 15Pero ka minti' ma txi cynimane, ex ka minti' ma che japun ke tmandamyent cyu'ne, cbel tk'o'n Kman cycastiwoye, ic tza'n o tbincha cyi'j cyxe'chele. 16Cyja'tzun ax che tencje, ex c'oquel cyque'yine ke techal ma'xix che bantel tu'n Kman cywitze. 17Aju tk'ijlalil ja'lo, atzun tu'n tjaw chmet triw ex minti' jbal, ¿jec ax? Pero akine chin xel kaninte te Kman tu'n ttzaj tk'o'n jbal tuc'ix k'ancyok, tu'ntzun toc cyque'yine ex tu'n tel cynic'e ti'j ka mya ba'n aju ma cybinchaye twitz Kman, tu'nju ma txi cykanine tu'n toc jun cyreye, chi Samuel. 18Octzun ten Samuel kanilte te Kman, jurattzun tzaj jbal ex k'ancyok; atzun cye cycyakil xjal tzaj nim cyxobil twitz Kman ex twitz Samuel. 19Cyja'tzun xi cyma'n cycyakil xjal te Samuel: —Cubsana ki'je twitz Kman Dios tu'ntzun mi'n kcyime ako'ye tmajena, porque mas ma ch'iytl kile tu'nju ma txi kkanine jun rey. 20Atzunte Samuel xi ttzak'we'n: —Mi'n che xobe. Ax toc o cybinchaye mya ba'n; atzun ja'lo mi'n tz'el cypa'n cyibe ti'j Kman, nok o'cx che c'ulune te tu'n tcyakil cyanmiye. 21Mi'n che'x lpe'ye cyi'j keju mya ax toc Dios ke, porque mlay che onin ex mlay che colin cyi'je, porque mya ax toc Dios ke. 22Atzunte Kman, mlay che cyaj coline tu'n nok tu'nju ma' toclen tbi; porque tajbil tu'n cyoque te jun tnam tecuxix. 23Ic tza'n weye, ka ma txi ncoline tu'n nna'ne Dios cyi'je, jun il jlu twitz Kman, pero cuchiwt tu'n mi'n ttzaj tk'o'n Kman ambil weye tu'n t-xi ncoline tu'n nna'ne Dios cyi'je. Ex che xel nxnak'tza'ne tza'n tten tu'n cybete tuj tumelxix ex tuj tjikumal ti'j. 24Cyja'tzun, cynimanxe Kman ex che c'ulune twitz axix toc ex tu'n tcyakil cyanmiye, ex cyna'ntze aju nimxix ma tbincha Kman cyeye. 25Pero ka cucx ma cybinchaye mya ba'n, che najele tuc'ix ju cyreye, chi Samuel, baj tma'n.

will be added

X\