1 Pon Nahas aju rey te Amón cyuc'ix ke t-soldad tuj tnam Jabes tuj tx'otx' Galaad, tu'n cyoc tzokpaj ti'j tnam. Atzun cye xjal najl tuj tnam Jabes xi cyma'n te: —E tbant ti'j jun kyol tuc'ila, ex jacu ko ajbene teya. 2 Atzunte Nahas aju aj Amón tzaj ttzak'we'n cye: —Jacu bant ti'j jun nyole cyuc'ile, pero o'cx ka jacu cub tuj cywitze tu'n tjatz wi'ne jun tbak' twitz tuj tbank'ab teyle junjun cyeye, tu'ntzun ttzaj cych'ixwi cycyakil aj Israel. 3 Atzun cye cytijil xjal tuj tnam Jabes xi cytzak'we'n: —K'ontza wuk k'ij ambil keye tu'n t-xi ksama'ne ke xjal k'ol tkanil tuj tcyakil tx'otx' cye aj Israel; katzun mi a'l jun jacu colin ki'je, jacutzun txi kk'on kibe tuj tcwenta. 4 E pontzun ke xjal k'malte tkanil tuj tnam Gabaa jatum najltok Saúl, ex xi cyma'n tkanil lu cye xjal. Cycyakiltzun ke xjal e oc ten ok'el cyuwxix wen tej cybinte jlu. 5 Ex lutok te Saúl cyja' ttzaj, otok tz'ajtz tuj cojbil cyuc'ix ke wacẍ k'i'n tu'n, ex xi tkanin cye: —¿Ti ma baj cyi'j xjal? ¿Tiku'n in che ok'? Atzun cye xjal xi cyma'n te aju tkanil otok pon cyu'n ke xinak tzajni ke tuj tnam Jabes. 6 Tejtzun tbinte Saúl jlu, o noj tu'n tipumal T-xew Dios ex tzajxix nim tk'oj. 7 Tzajtzun ti'n Saúl cabe wacẍ, e cub tpaẍu'n ex xi tk'o'n cye junjun sanjel tu'n t-xi cyi'n tuj tcyakil cytx'otx' aj Israel. E je'xtzun ke sanjel ex xi cyma'n cye xjal cyja': Ictzun cbajel paẍu'n cywacẍ ke xjal akeju cyc'i' che oc lpe' ti'j Saúl ex ti'j Samuel tuj k'oj. Tzajtzun jun xobajil ma'xix cyibaj xjal tu'n Kman; oc cychmon cyib tuc'il Saúl, mojl tak'pon cyu'n cycyakil. 8 Tej toc ten Saúl k'il cyajlal xjal tuj tnam Bezec, otok baj cychmon cyib ox syent mil xinak aj Israel, ex 30 mil aj Judá. 9 Ex xi tma'n cye ke xjal otok che pon k'ol tkanil: —Cymanxe cye xjal najl tuj Jabes: Nchi'j ko pone te chilcuk'ij ex oc che cletele ku'ne, chi Saúl, che chicuye. E ajtzun ke xjal ex xi cyma'n tkanil lu cye xjal najl tuj Jabes, atzun cye aj Jabes nimxix o che tzalaj tej cybinte ju tkanil lu, 10 ex xi cyma'n te Nahas: —Nchi'j txi kk'on kibe tuj tcwenta tu'ntzun tbinchanteya ki'je nok alcye ba'n tuj twitza. 11 Tujtzun juntl k'ij baj bant cyten ke t-soldad Saúl; tuj ox c'loj e je'l tu'n, ex na'nxtok tcub k'ij tej cyocx tzokpaj tuj tmijil cycampament aj k'oj; ex e cub byo'n aj Amón cyu'n, cucxtok toc k'oj tej tpon chilcuk'ij. Atzun junjun e cyaj ank'in baj cysputun cyib, cyja'tzun mi jun cye aj Amón cyaj ten tuc'in tib tuc'il juntl. 12 Xitzun cyma'n xjal te Samuel: —¿Alcye keju e k'mante ka mlay tz'oc Saúl te krey? Cyk'ontze ke xjal lu tu'ntzun cycub kbyo'ne. 13 Atzunte Saúl xi tma'n cye: —Tuj k'ij ja'lo mi jun ba'n tu'n tcyim, porque ate Kman ma clonte cye aj Israel. 14 Ex xi tma'n Samuel cye cycyakil xjal: —Ko'ke tuj Gilgal tu'ntzun tke' tcawin rey ma chixin. 15 Cyja'tzun tten, cycyakil xjal e je'x tuj Gilgal ex oc cyk'o'n Saúl te rey ma chixin twitz Kman. Ex axtzun xi cyk'o'n ke oyaj te mojbabl tibil te Kman; ex nimxix o tzalaj Saúl wen cyuc'ix cycyakil xjal aj Israel.
