1 Pedro 5

1Chin cubsale cywitz ke ansyan ate' cyxole, ax icx weye ansyan kine cyuc'il ex testiw kine ti'j tcyakilju ic'x tu'n Crist, ax icx at woclene tu'n njaw nimsa'ne junx tuc'il Crist oc tul tuj tajwalil. 2Akeye ansyan, cypastorin oque ke t-ẍne'l Dios o che cyaj k'o'n tuj cycwente, ex cycwentin oque ke; pero mya lajwers tu'n cyxi'ye, cyu'nx cyibe tu'n cyxi'ye ic tza'n tajbil Dios, ex mya tu'n cyc'monteye jun cambabl mya tuj tumel, nok o'cx tu'n cyajbene tu'n tcyakil cyc'u'je. 3Ex mi'n cub cyximane tu'n cyoque te cyajaw keju ate' tuj cycwente, nok o'cx tu'n cyoque te jun yec'bil tu'n cyoc lpe' ẍne'l cyi'je. 4Octzun tul ju Nejenel cye pastor, oc cyc'ma'ye jun oyaj mlay naj ex tbanilxix. 5Ax icx cyeye, akeye cu'xun, che tene tjak' cycawbil ansyan; ex cycyakile che oque mans tu'n cyajbene cyxolxe, porque in tma'n tuj Tu'jil: At tk'oj Dios cyi'j keju in jaw cyniman cyib, atzun keju mans in tzaj tk'o'n t-xtalbil cye, chi tuj Tu'jil. 6Cyja'tzun, cymansin cub cyibe tjak' tipumal tk'ab Dios, tu'ntzun cyjaw nimsa'ne tu'n oc tpon tk'ijlalil. 7Tcyakilju in baj cyc'u'je ti'j, cyk'onxe tuj tcwent Dios, porque ate Dios cwentil cyeye. 8Tenx cynable ex che xk'ukine porque ate tajaw il aj k'oj cyi'je, ex in bet cyi'jele, in tzanun ic tza'n jun balun, in jyon ti'j alcye jun tu'n t-xi tchyo'n. 9Che we'xixe twitz, cyuw cytene tuj cyocslable, porque ba'n cyu'ne, tuj tcyakil twitz tx'otx' nnic'x cyu'n cyermaniye ic tza'n cyeye nnic'x cyu'ne. 10Cybajlenxitzun yajla'ne cab k'ij, axte Dios ctz'aksalte cynable, ex tu'n cywe'xixe tuj cyocslable, ex ck'olte cyipumale, ex ccyuwsal cyeye. Axte Dios in tzaj k'onte nim t-xtalbil ke, ex ma ko txconjtz tu'n, tu'n kten tuj t-spic'umal te jumajx nok tu'n Jesucrist. 11Nimanxwit ju tbi, ex tu'n tcawin tuj tcyakil tabk'iyil te jumajx. Icxwitju. 12Ma txi ntz'ibane cab ox yol cyeye; ate Silvano cxel k'inte u'j, porque aju erman lu tuj nnable in japunxix tu'n tuj tak'un Dios. Ma txi ntz'ibane tu'n t-xi nk'o'ne cynable ex tu'n t-xi nchic'bane cyeye ka atzun t-xtalbil Dios jlu axix toc. Ax che tencje tuj t-xtalbil. 13In che'x k'olbe'ne cyu'n ocslal ate' tuj Babilonia, akeju ma che jaw sc'o'n junx cyuc'ile, ex in che'x k'olbe'ne tu'n Marcos aju ic tten ic tza'n jun nc'wa'le. 14Cyk'olbem cyibe cyxolxe, ex cytz'uban el cywitze tu'n tcyakil cyc'ujlalile. Awt Dios k'ukbante cyc'u'je cycyakile akeye ocslal ti'j Jesucrist. Icxwitju.

will be added

X\