1 Pedro 4

1O tzic'x tu'n Crist tuj t-ximlal ex cyim [tu'n tchjet kil], cyja'tzun icx cyeye tu'n tten cynable ic tza'n tnabl Crist; porque aju xjal otok tzic'x tu'n tuj t-ximlal minti'tl taj ti'j il. 2Cyja'tzun, jte' k'ijtl tu'n cytene twitz tx'otx', o'cx che ximane ti'j tu'n tbant tajbil Dios cyu'ne, ex mya tu'n cyximane ti'j aju in pon cyc'u'j xjal ti'j. 3Acux aju o cybinchaye ojtxi, o cybinchaye aju in che tzalaj txkantl xjal ti'j, akeju minti' ojtzki'n Dios cyu'n. Ojtxi minti' cyjuc'bil cyibe, in pon cyc'u'je ti'j mya ba'n, c'al k'e'n keye, in che achine tuj nink'ij, nno'c c'aj k'e'n cyu'ne, in che c'ulune cywitz ke tilbilal, ic'bilxix ke. 4Ke txkantl xjal in che labin cyi'je tu'nju mya mojl in che bete cyuc'il, ex mya cytzokpin cyibe cyuc'il ic tza'n cye minti' cyjuc'bil cyib, cyja'tzun in che yolin mya ba'n cyi'je. 5Pero ke xjal lu oc cyk'a' tajlal twitz Dios aju banin tten tu'n cyoc xjal tuj xjel tu'n, tza'nx ke xjal itz' icx ke xjal o che cyim. 6Porque tu'n tlaj jlu o pacbanjtz tkanil colbil cye keju o che cyim, tu'ntzun tank'in cyanmi ic tza'n te Dios itz'te, masque cub cysentens tu'n cycyim ic tza'n cycyakil xjal. 7In lak'ex ttzaj tk'ijlalil tu'n tbaj tcyakil; tenxtzun cynable ex che xk'ukine tuj na'j Dios. 8Pero aju mas il ti'j, tu'n ttenxix cyc'ujlalile cyxolxe, porque ka at cyc'ujlalile, cnajsetel nimcu cyil txkantl cyu'ne. 9Cyk'onxe posad cyxolxe ex mi'n tzaj jun cyyole ti'j. 10Aju toclen teyle junjun ma tc'am tz'ajbenxwit tu'n cye txkantl, tu'n cyoc te jun ba'n mayordom ti'j ju cyoclen junxilchak tten ma cyc'am tu'n Dios. 11Ka at jun in pacban, yolin ic tza'n in tma'n tyol Dios; ka at jun in ajben cye mastl, tz'ajbenx tu'n tipumal Dios, tu'ntzun tjaw nimsa'n tbi Dios ti'j tcyakil nok tu'n Jesucrist. Awt Dios tu'n tjaw nimsa'n tbi ex tu'n tcawin tuj tcyakil tabk'iyil te jumajx. Icxwitju. 12Erman, akeye at nc'u'je cyi'je, mi'n che jaw sec'paje tu'n tlaj joybil cyi'je in tzaj ic tza'n k'ak' tu'n tel nic'baj cyi'je; mi'n che ximane ti'j ka o'cx cyeye in tzaj joybil cyi'je. 13Nok o'cx che tzalajxe tu'n tic'x cyu'ne junx tuc'il Crist, tu'ntzun cytzalaje nimxix oc tul Crist in koptz'aj wen tuj tajwalil. 14Ka ma che oc yaso'ne tu'n tlaj ocslal keye ti'j Crist at tzalajbil cyeye porque tcub T-xew Dios cyibaje, aju Xewbaj tbanilxix. [Ax toc nno'c yaso'n Crist cyu'n xjal, atzun cyeye in jaw cynimsa'ne tbi.] 15Cyja'tzun ka at jun cyeye ma tzic'x tu'n, pero cuchiwt mya tu'n tlaj in biyun, ex mya tu'n tlaj in elk'an, ex mya tu'n tlaj in binchan mya ba'n, ex mya tu'nju nno'cx tlamon tib ti'j tyol juntl. 16Pero ka at jun ma tzic'x tu'n tu'n tlaj ju ocslal ti'j Crist, mi'n tzaj tch'ixwi, nok o'cx tu'n t-xi tk'o'n chjonte te Dios tu'nju ocslal ti'j Crist. 17Porque ma pon tk'ijlalil tu'n t-xe't castiw cyxol ke tc'wa'l Dios. Katzun nej ma xe't castiw kxol, ┬┐jatumtzun che pol keju minti' in xi cyniman tkanil colbil in tzaj tk'o'n Dios? 18Ex ka peni ma clet jun xjal tz'aklxix, ┬┐jatumtzun cpol ju xjal mya ba'n ex ju xjal aj il? 19Cyja'tzun, ka ma tzic'x cyu'ne ic tza'n tajbil Dios, cyokxe'nanx cyanmiye te Dios aju Ch'isal cyeye, aju ba'n tu'n tke' kc'u'j ti'j, ex cybinchame aju ba'n.

will be added

X\