1 Pedro 3

1Ax icx cyeye akeye xu'j, cynimanx cychmile tu'ntzun tocslan cychmile ka mya ocslal cychmile ti'j tyol Dios, mya tu'n yol tu'n tocslan, nok o'cx tu'nju cymodiye ba'n. 2Jaculo tz'ocslan cychmile oc tque'yinte minti' jun cyximbetze mya ba'n ex ba'n che nimane te. 3Aju cyyec'bil cyibe myawt aju k'ancha'l tu'n tbaj cybincha'ne ttzmal cywi'ye ax tu'n toc baj cywitz xjal ti'j, ex ka tu'n toc cyk'o'ne ganch k'an pwak cyi'je, ex ka tu'n toc cyk'o'ne cyxbalune wi'yilxix; 4nok o'cx tu'n cyyec'unteye aju at tuj cyanmiye, aju tbanilxix, tu'n tten cyanmiye mans ex txulch, atzun jlu tbanilxix ex mlay naj, ex atzun jlu wi'yilxix tuj twitz Dios. 5Cyja'tzun tten o cyyec'u cyib ke xu'j akeju in che ajben te Dios ojtxi; k'ukl cyc'u'j ti'j Dios, ex niman cychmil cyu'n. 6Ic tza'n te Sara xi tniman tyol Abraham, ex oc t-xi yolin tuc'il, tat, chi Sara. Ka ma cybinchaye ba'n ex ka minti' ma che xobe, che oquele ic tza'n te Sara. 7Ax icx cyeye akeye chmilbaj, atwit cynable tu'n cynajane cyuc'il cyxu'jile, porque ch'in cye xu'j cyc'u'j; ex cyk'onxe nimbil cye, porque ma cyc'am cychwinklal junx cyuc'ile tu'n t-xtalbil Dios. Tenxwit cynable tu'n cymoje'ye, tu'ntzun tc'met cyna'j Diose. 8Pero tu'n tcyakil jlu, junxwit cynable cycyakile, k'ak'anx cyc'u'je ti'j juntl, cyc'ujlam cyibe porque cyitz'in cyibe, ttzaj tz'e'y cyc'u'je ti'j juntl, che oque mans. 9Ka at jun mya ba'n ma binchanjtz cyi'je cyu'n xjal, mi'n tz'aj cyk'o'ne t-xel mya ba'n; ka ma che oc yaso'ne cyu'n xjal, mi'n tz'aj cymojtza'ne yasbil; atzun jlu cybinchame cye: Che yoline ba'n cyi'j, porque ba'n cyu'ne ma che txconjtze tu'n cyc'monteye tcy'iwbil Dios. 10Porque in tma'n tuj Tu'jil: Alcye taj tu'n ttzalaj tuj tchwinklal ex tu'n tten tuj txubtxaj, il ti'j tu'n tjac'unte ttzi' tu'n mi'n tyolin mya ba'n, ex tu'n tjac'unte ttzi' tu'n mi'n tnic'an yol. 11Pa'mil tib ti'j ju mya ba'n, ex bincham ju ba'n; tz'oc tililx tu'n tu'n cucx tu'n tten ba'n cyuc'il mastl. 12Porque cwentin ke xjal tz'aklxix tu'n Kman, ex in tzaj tbi'n cyna'j Dios. Atzun keju in cybincha'n mya ba'n, in k'ojl Kman cyi'j, chi tuj Tu'jil. 13¿Atpelo jun jacu tz'oc binchante mya ba'n cyi'je ka cucx in cybincha'ne aju ba'n? 14Pero ka at ch'in ma tzic'x cyu'ne tu'n tlaj ju in cybincha'ne ba'n, at tzalajbil cyeye. Cyja'tzun mi'n che xobe cywitz xjal, ex mi'n naj cynable, 15nok o'cx tu'n cynimane te Crist tuj cyanmiye, porque atzun Cyajawe. Nok banin cytene tu'n t-xi cytzak'we'ne ke xjal, akeju in che kanin jun rasón cyeye tiku'n ma ke' cyc'u'je ti'j Crist, cheba cymanxe cye ex atwit cychi tuj cywitze. 16Cybinchame aju ba'n ic tza'nx in tma'n cyanmiye, tu'ntzun ttzaj cych'ixwi keju in che yasun cyi'je tu'n tlaj ju ba'n in cybincha'ne ex tu'n tlaj ocslal keye ti'j Crist, in che yolin cyi'je ka mya ba'n keye. 17Porque ka ic tajbil Dios, mas ba'n tu'n tic'x cyu'ne tu'n tlaj ju ba'n in cybincha'ne, twitzju tu'n tic'x cyu'ne tu'n tlaj ju mya ba'n. 18Porque icx te Crist ic'x tu'n nok junx maj, cyim tu'n tchjet kil; ate Crist tz'aklxix, pero cyim tu'n klaj mya tz'aklxix ko', tu'n kpon ti'n tuc'il Dios. Ax toc, cub byo'n Jesús ex cyim t-ximlal, pero jatz ank'in tu'n tipumal Xewbaj Xjan. 19Ex ax tanmi Crist xi aj pacbal cye anmi lamo'n ke. 20Tuj tk'ijlalil ojtxi minti' xi cyniman xjal lu tyol Dios; nim o ayon Dios cyi'j ex at tpasens tuj tk'ijlalil Noé tej matok in bant aju matij barc. Xi tk'o'n Dios ambil cye, pero mya nim xjal e clet tuj barc, nok wajxak e clet tuj a'. 21Aju a' lu o yec'unjtz naj te jun yec'bil ti'j ju byabl, aju ma ko clet tu'n ja'lo. Minti' in tma'n jlu ka tu'n byabl nne'l ttz'ilil kximlal, nok o'cx te jun yec'bil ti'j ju kyol ma txi ktziyan te Dios, tu'n kank'in tuj tumelxix. Ate jlu in tzaj k'inte colbil ke tu'nju o jatz ank'in Jesucrist cyxol cyimni. 22Ate Jesucrist o japun tuj cya'j, tcub ttxlaj Dios tuj bank'abaj; ke anjel ex keju at cyoclen, ex keju at cyipumal ate' tjak' tcawbil Jesucrist.

will be added

X\