1 Pedro 1

1Akine Pedro, apostl kine te Jesucrist, in xi ntz'ibane cyeye akeye ma che pone najal cyuj junxitl nasyon, ex cysipan cyibe tuj tx'otx' Ponto ex tuj tx'otx' Galacia ex tuj tx'otx' Capadocia ex tuj tx'otx' Asia ex tuj tx'otx' Bitinia. 2Ma che jaw sc'o'ne tu'n Kman Dios tu'nju ximamaj tu'n ojtxi, ex pa'maj keye tu'n Xewbaj Xjan tu'n cyajbene o'cx te Dios, ex tu'n t-xi cynimane, ex tu'n t-sakix tuj cyanmiye tu'n tchc'el Crist. Awt Dios k'onte nimxix t-xtalbil cyeye tu'n tke'xix cyc'u'je. 3Nimanxwit tbi Dios aju tman Kajaw Jesucrist, tu'nju nimxix ma tzaj k'ak'an tc'u'j ki'j, ex ma ko itz'j tcabmaji'n tu'n, tu'n tten jun k'ukbabl kc'u'j mlay naj porque o jatz ank'in Jesucrist cyxol cyimni. 4Ax icx tu'n kc'monte jun etzbil mlay naj, ex mlay tz'ilix, ex mlay tzkij. Aju etzbil lu c'u'n tu'n Dios tuj cya'j te cyeye. 5Ex cwentin keye tu'n tipumal Dios ja'lo nok tu'n cyocslable, tu'ntzun cyc'monteye jun colbil, aju banimaj tu'n tyec'unjtz tuj mancbil tk'ijlalil. 6In che tzalaje ti'j tcyakil jlu, masque at maj il ti'j tu'n ttzaj junxilchak joybil cyi'je ex in che bisune ja'lo, pero nok te cab k'ij jlu. 7In che yajlanjtze tu'n tel nic'baj ti'j cyocslable ka ax toc, porque aju cyocslable mas wi'yilxix twitz k'an pwak; masque in naj k'an pwak, pero tu'n k'ak' nne'l nic'baj ti'j; octzun tel nic'baj ti'j cyocslable oc che jawil nimsa'ne, ex ctzajel k'o'n nim cyoclene ex nimbil cyeye oc tul Jesucrist. 8Na'nx cylonteye Jesucrist, pero at cyc'ujlalile ti'j. Masque minti' ma cyile ja'lo, pero ma che ocslane ti'j; cyja'tzun in che tzalaje nimxix, minti' juntl tzalajbil icju; 9ex ma cyc'ame colbil te cyanmiye tu'nju at cyocslable. 10Ke t-sanjel Dios ojtxi e yolin ti'j ju xtalbil ma cyc'ame; e cub ten ximal ti'j ju colbil lu ex o cyajbe tu'n tel cynic' ti'j. 11O che ximan ti'j alcye xjal c'oquel te Crist ex alcye tk'ijlalil tu'n tul; na'nxtok tyajlanjtz Crist in che yolin naj ti'j tu'n tyajlanjtz, ax icx e yolin naj ti'j tu'n tjaw nimsa'n tbajlenxi yajla'n; ax T-xew Crist k'mante jlu cye, aju najl tuj cyanmi. 12Tzaj tchic'ba'n Dios jlu cye, mya cye tu'n tajben, nok o'cx tu'n tajben ke ja'lo; axtzun jlu ma tzaj chic'ba'n cyeye ja'lo cyu'n keju in che pacban ti'j tkanil colbil, in che yolin nok tu'nju tipumal Xewbaj Xjan tzaj sama'n tuj cya'j. Ex ke anjel cyajbil tu'n tel cynic' ti'j tcyakil jlu. 13Cyja'tzun, che tencuye ximal ti'j alcye tu'n cybinchanteye. Tenx cynable, ex ke'cxix cyc'u'je ti'j t-xtalbil Dios aju ctzajel k'o'n cyeye oc tul Jesucrist. 14Ma che oque tc'wa'l Dios, cyja'tzun cynimanxe tyol; ex mi'n txi cyk'o'ntle ambil teju cyajbile mya ba'n, ic tza'n o cybinchaye ojtxi tej na'nxtok tel cynic'e ti'j tyol Dios. 15Ic tza'n te Dios xjante, aju txcon cyeye, icxtzun cyeye cypa'mil cyibe ti'j tcyakil mya ba'n, tu'ntzun cyoque xjan; 16porque tz'ibamaj ju yol lu tuj Tu'jil: Che ocxe xjan, porque weye xjan kine, chi Dios. 17Katzun nno'c cyk'o'ne Dios te Cymane, che xobtzune twitz tcyakil k'ij oc cytene twitz tx'otx', porque ate Dios in che oc cycyakil xjal tuj xjel tu'n, teyle junjun ic tza'nxju tak'unben, ex minti' nno'c tque'yin Dios ti t-xilen xjal. 18Ba'n cyu'ne ma che colpete tu'n mi'n cyank'intle tuj ju nokx gan, porque aju xnak'tzbil cyc'ame te cymane nokx gan; ex ba'n cyu'ne mya tu'n k'an pwak ex mya tu'n sak pwak ma che colpete, porque in che naj jlu. 19Nok o'cx tu'n tchc'el Crist ma che colpete, aju wi'yilxix; ic tten Crist ic tza'n jun tal ẍne'l minti' tpaltil ex minti' ttz'ilil. 20Ximamajtl tu'n Dios atxix na'nxtok tbant twitz tx'otx' tu'n tic'x tu'n Crist, pero matzun ja'lo tuj mancbil tk'ijlalil ma tzaj yec'un Crist tu'n cycolpete. 21Ex nok tu'n Crist ma che ocslane ti'j Dios; ate Crist jatz ank'in tu'n Dios cyxol cyimni, ex jaw nimsa'n tu'n Dios; cyja'tzun tten at cyocslable ti'j Dios ex ma ke' cyc'u'je ti'j. 22Tu'n tak'unben Xewbaj Xjan ma txi cynimane ju yol axix toc, cyja'tzun ma tx'jet tuj cyanmiye, ex in cyc'ujla'ne ke erman, ex ax toc cyu'ne, cyja'tzun cyc'ujlam cyibe cyxolxe tu'n tcyakil cyc'u'je ex tu'n tcyakil cyipune. 23Ma che itz'je tcabmaji'n; pero mya ti'j jun xjal cnajel ma che el itz'je, nok o'cx ma che el itz'je ti'j jun iyaj mlay naj; aju iyaj lu atzun tyol Diosju, itz' ex cucx tten te jumajx. 24Porque in tma'n tuj Tu'jil: Cycyakil xjal ic cyten ic tza'n c'ul, ex tcyakil cyoclen xjal ic tten ic tza'n t-xmacal c'ul. Ate c'ul in tzkij ex nne'l tz'ak t-xmacal; 25atzunju tyol Kman cucx tten te jumajx, chi tuj Tu'jil. Ex atzunju yol lu ma pacbanjtz cyeye tej cybinteye tkanil colbil.

will be added

X\