1 REYES 5

1Tej tbinte Hiram aju rey tuj tnam Tiro, ka otok tz'oc k'o'n toclen Salomón te rey te t-xel David aju ktzan tman, xi t-sama'n ke xjal at cyoclen ttxlaj yolil tuc'il Salomón, porque ate Hiram puro tamiwtok tib tuc'il David. 2Xitzun t-sama'n Salomón ke t-sanjel yolil tuc'il rey Hiram tu'n t-xi cyma'n te cyja': 3—Ba'ntl tu'na, minti' ten ambil ti'j David aju ktzan nmane tu'n tjaw tbincha'n jun tja Kman aju Tdios, tu'n tlaj k'oj oc tu'n, ex maxi twe' jlu tejxi cytzaj k'o'n ke aj k'oj ti'j tuj tk'ab tu'n Kman. 4Atzun ja'lo tuj tzalajbil ato'ye tu'n Kman aju Ndiose tuj tcyakil lugar. Ja'lo minti' aj k'oj ki'je ex minti' jun ti'xti mya ba'n in tzaj ki'je. 5Cyja'tzun ma cub nximane tu'n tjaw nbincha'ne jun tja Kman aju Ndiose, ic tza'n o tzaj tma'n te David aju ktzan nmane tej tmante cyja': Aju tcy'ajala c'oquel te rey te t-xela, atzunju cjawil binchante jun njaye tu'n tajben te c'ulbil weye, chi Dios te. 6Cyja'tzun k'manxa cye tmajena tu'n tjaw cytx'emin ke tze' wi'ten twi witz Líbano, ex jacu che onin ke nmajene cyuc'il ke tmajena, ex ba'n txi nchjo'ne twi cyc'u'j ke tmajena ic tza'nx ctzajel tkanina weye, porque ba'ntl tu'na misicyer jun keye ba'n xpe'lin tze' ic tza'n ke xjal aj Sidón, chi Salomón. 7Tejtzun tbinte Hiram tyol Salomón, jaw tzalaj nimxix ex tma: —Ja'lo nimanxwit tbi Kman, tu'nju ma tzaj tk'o'n jun tcy'ajal David nim tnabl tu'n tcawin tibaj ju nintz nasyon lu. 8Xitzun t-sama'n Hiram aju tkanil lu tuc'il Salomón: —Ma nc'ame tkanil tzaj t-sama'na, ex cbantel wu'ne aju ma tzaj tkanina weye ti'j tze' wi'ten ex tzaj. 9Ake nmajene che beletz k'inte tze' twi witz Líbano tu'n tpon cyi'n max ttzi mar, ex junx che bel nc'alo'ne ke tze' tu'ntzun cyxi nsama'ne tibaj mar, ex tu'n cypon alcye lugar ctzajel tma'na, ex atzun che bajel pajut ke tze' tu'n t-xi ti'na. Ax icx teya, cuchiwt tu'n tjapun tu'na tu'n ttzaj tk'o'na wabj ex chibj te cye keju ate' tuj njaye. 10Xitzun tk'o'n Hiram te Salomón ke tze' wi'ten tuc'ix tzaj, ic tza'nx otok tzaj tkanin. 11Ax icx te Salomón xi tk'o'n wabj ex chibj cye keju ate' tuj tja rey Hiram. Tcyakil abk'i xi tk'o'n Salomón 75 mil quintal triw, ex 115 mil galón chibj aseyt tbanilxix. 12Cyja'tzun tten tzaj k'o'n tnabl Salomón tu'n Kman, ic tza'nx otok tzaj ttziyan. Ex mya nok o'cx jlu, ax icx cyaj bant ti'j jun cyyol Hiram tuc'il Salomón, ex tuj tzalajbil e ten. 13Bant jun ley tu'n rey Salomón tu'n cyjaw chmet txkan xinak cyxol cycyakil aj Israel tu'n cyxi' ak'nal. Japun cyajlal xjal lu 30 mil xinak. 14Txolsa'n oc cyi'j ke xjal ti'j ak'untl: laj mil xinak tu'n cyxi sama'n tuj junjun xjaw twi witz Líbano, jun xjaw tu'n cyten twi witz Líbano, ex cabe xjaw tu'n cyten cyja. Ate Adoniram oc te nejenel cye ke xjal in che'x ak'nal. 15Ax icx oc tk'o'n Salomón 70 mil xjal ikal iktz ex 80 mil xjal xpe'lil abj twi witz, 16ex part ox mil tuc'il ox syent caporal cyi'j ke xjal e ak'nan ti'j ak'untl. 17Xi tma'n rey tu'n cyjatz lacut ke abj nmak ex tbanil, tu'n cyajben te t-simyentil tja Dios cyuc'ix ke abj tu'n tbaj xpe'lin cyi'j. 18Ke tmajen Salomón ex ke tmajen Hiram, cyuc'ix ke xjal aj Gebal, baj cybincha'n ke tze', ex baj cyxpe'lin ke abj tu'n tajben tu'n tjaw binchet tja Dios.

will be added

X\