1 REYES 22

1Baj ox abk'i minti' k'oj oc cyxol aj Siria cyuc'il aj Israel. 2Tujtzun toxin abk'i xi' Josafat aju rey cye aj Judá visitaril te Acab aju rey cye aj Israel. 3Otok txi tma'n rey Acab cye ke xjal at cyoclen ttxlaj: —Ba'n cyu'ne, aju tnam Ramot aju at tuj Galaad, ketok jlu nej. Ja'lo ¿myapelo ba'n tu'n tetz kcolpi'n tjak' tcawbil rey te Siria? 4Xitzun tkanin Acab te Josafat: —¿Jacupe txi'ya wuc'ile tu'n koc tzokpaj ti'j tnam Ramot aju at tuj Galaad? Atzunte Josafat xi ttzak'we'n: —Akine cyuc'ix ke nsoldadiye ex ke ncheje, lu ko'ye lu te onil teya ex te onil cye t-xjalila. 5Pero na'nxtok tbant jlu ku'n, kaninxa te Kman ka jacu ko camban, chi Josafat. 6E octzun tchmo'n rey Acab ke xjal otok tz'oc cyk'on cyib ic tza'n t-sanjel Dios, ch'ixmi cyaje syent cybet, ex xi tkanin cye: —¿Ba'npe tu'n woc tzokpaje ti'j tnam Ramot aju at tuj Galaad, ex ka mya ba'n? Atzun cye xi cytzak'we'n: —Toc tzokpaja ti'j, porque che tzajel tk'o'n Kman ke xjal tuj tk'aba tu'n tcub cyi'j tu'na. 7Atzunte Josafat xi tkanin te Acab: —¿Minti'pe juntl xjal at tzalu axix toc t-sanjel Dios, tu'n t-xi kkanin te? 8Atzunte rey Acab xi ttzak'we'n: —Atx juntl xjal ba'n tu'n t-xi kkanin te alcye tajbil Kman, atzun Micaías aju tcy'ajal Imla, pero ic'un jlu wu'ne porque minti' in tzaj tma'n jun yol ba'n weye, nok o'cx jun yol mya ba'n in tzaj tma'n. Atzunte Josafat xi tma'n te: —Mi'n tmaya icju. 9Tzajtzun ttxco'n rey Acab jun xjal at toclen ttxlaj ex xi tma'n te: —Txca'tza Micaías aju tcy'ajal Imla, tu'n tul naj wuc'ile. 10Tza'nxix te Acab aju rey cye aj Israel, ax icx te Josafat aju rey te Judá, tocsa'ntok t-xbalun rey cyi'j, ex k'uklke'tok tuj cyk'ukbil tuj plas nikayin ttzi tpwertil tnam Samaria; ex cycyakil xjal otok tz'oc cyk'on cyib ic tza'n t-sanjel Dios in cychic'ba'ntok aju nnu'l tuj cynabl cywitz ke cabe rey lu. 11Atzunte Sedequías aju tcy'ajal Quenaana otok che baj tbincha'n junjun c'uxbil mer ic tza'n tcach wacẍ, ex in jawtok tk'ajk'ajel twi' cyja': Chitzun Kman ma tma: Atzun ke cach lu che ajbel tu'na tu'n tbaj t-ẍu'yina ke aj Siria ocxi cybaj naj tu'na. 12Cycyakil keju otok tz'oc cyk'o'n cyib ic tza'n t-sanjel Dios ax yol in cyma'n: Toc tzokpaja ti'j tnam Ramot aju at tuj Galaad, ex cbel ti'j tu'na, porque ate Kman ctzajel k'onte tnam lu tuj tk'aba, che chi xi cyma'n te rey. 13Atzunte sanjel otok txi sama'n txcolte Micaías xi tma'n te: —Cycyakil mastl t-sanjel Dios ma cyma jun tzak'webl ba'n te rey. Cyja'tzun in chin cubsane twitza tu'n t-xi tma'na jun yol ba'n, ic tza'nx ma cyma cycyakil. 14Atzunte Micaías xi ttzak'we'n te: —Cxel nma'ne jun yol axix toc twitz Kman; o'cx cxel nma'ne aju yol ctzajel tma'n Kman weye. 15Pontzun Micaías twitz rey ex xi tkanin rey te: —Aya Micaías, ¿ba'npe tu'n koc tzokpaje ti'j tnam Ramot ex ka mi'n? Atzunte Micaías xi ttzak'we'n: —Toc tzokpaja ti'j ex cbel cyi'j xjal tu'na, porque tu'n Kman che tzajel tk'o'n tuj tk'aba. 16Atzunte rey xi ttzak'we'n: —¿Jte' maj cxel nma'ne teya tu'n ttzaj tma'na weye jun yol axix toc twitz Kman? 17Atzunte Micaías xi ttzak'we'n: Ma che wile cycyakil aj Israel cysputun cyib cyxol ke witz mer ic tza'n ẍne'l minti' pastor cyi'j. Ex chi Kman ma tma: Minti' cye jlu cyajwil; teyle junjun ba'n tu'n taj tja tuj txubtxaj. 18Xitzun tma'n rey Acab te Josafat: —¿Baka minti' ma txi nma'ne teya ti'j xinak lu, minti' in tzaj tma'n jun yol ba'n weye, o'cx mya ba'n in tzaj tma'n? 19Atzunte Micaías xi tma'ntl: —Bintza aju ma tma Kman: Ma wile Kman k'ukl tuj tk'ukbil, cyuc'ix cycyakil keju ate' tuj cya'j nim cyajlal wa'l ke junx tuc'il tuj tbank'ab ex tuj tnayaj. 20Ex chi Kman xi tkanin cye: ¿Alcye cxel to'yilte Acab tu'n toc tzokpaj ti'j tnam Ramot aju at tuj Galaad, ex ax tu'n tcyim ma chixin? At junjun in tzaj cyma'n jun tumel, atzun junjuntl in tzaj cyma'n juntl tumel. 21Pero minaben pon jun xewbaj ex xi tma'n te Kman ka a tu'n t-xi' to'yil te Acab. Atzunte Kman xi tkanin te: —¿Tza'n ctelba tu'na? 22Xi ttzak'we'n ju xewbaj: Chin xe'le ex chin yolile nic'aj yol tuj cytzi' cycyakil ke xjal nno'c cyk'on cyib te t-sanjel Dios ate' tuc'il Acab. Atzunte Kman xi tma'n: Cbel ti'j tnabl tu'na. Txi'ya ex binchama icju, chi Kman te xewbaj. 23Atzun ja'lo, ma tzaj tk'o'n Kman jun xewbaj nic'al yol tu'n tyolin tuj cytzi' cycyakil keju nno'c cyk'on cyib te t-sanjel Dios ate' tuc'ila, ex ma tma Kman tu'n tnaja. 24Pontzun lak'e' Sedequías aju tcy'ajal Quenaana ttxlaj Micaías, oc ttz'ajin jun twitz Micaías ex tma: —¿Baka ma tz'el tpa'n tib T-xew Kman wi'je, ex a tu'n tyolin tuc'ila? 25Atzunte Micaías xi ttzak'we'n: —C'elel tnic'a ti'j tuj k'ij oc t-xi'ya ewal tiba tujile cyja xjal. 26Xitzun tma'n Acab cye aj sanjelal: —Cytzyuntze Micaías ex cyi'nxe twitz Amón aju gobernador te tnam, ex twitz Joás aju ncy'ajale, tu'n tocx tuj pres. 27Cymanxe cye ka akine ma chin k'mante tu'n tocx tuj pres, ex mya nim twa ex tc'a tu'n t-xi k'o'n maxi oc wul meltz'aje tuj txubtxaj. 28Atzunte Micaías xi tma'n: —Katzun ba'n ma tzul meltz'aja tuj k'oj, entons aju yol ma txi nma'ne cyeye myatzun a Kman ma k'mante te. Cybintze aju yol lu, akeye tnam xjal, chi Micaías. 29Cyja'tzun, ate Acab aju rey cye aj Israel, tuc'ix Josafat aju rey cye aj Judá, e pon k'ojlel ti'j tnam Ramot aju at tuj Galaad. 30Atzunte rey Acab xi tma'n te Josafat: —C'elel nch'expu'nwe nxbalun tu'n mi'n tel nic'baj wi'je oc nk'ojine, atzun teya, ba'n tu'n toc tk'o'na t-xbaluna aju in ajben teya oc in cawina. Eltzun tch'expu'n Acab t-xbalun tu'n mi'n tel nic'baj ti'j, ex tzyettzun k'oj cyu'n. 31Pero otok txi tma'n rey te Siria cye 32 capitán cye tcarwaj akeju in che ajben tuj k'oj, o'cx tu'n cyk'ojin ti'j rey cye aj Israel ex mya ti'j junxitl. 32Tejtzun tilwaj Josafat cyu'n ke capitán, akeju ate'cx tuj carwaj in che ajben tuj k'oj, cub cyximan ka atzun rey cye aj Israel jlu, ex baj cytxolban cyib ti'j tu'n cyoc tzokpaj ti'j. Atzunte Josafat jaw sch'in ex oc ten kanil onbil. 33Eltzun cynic' capitán ti'j ka mya a rey cye aj Israel jlu, ex ya minti'tl e oc lpe' ti'j tu'n tcub cyu'n. 34Pero at jun soldad aj Siria nok elaj xi t-xo'n jun plech ex tc'ulbacu a Acab a'w tu'n, atzun xi' plech jatum ocni moje' chicyet c'uxbil toc ti'j. Xitzun tma'n Acab teju yucul tcarwaj: —Chux k'on welt carwaj tu'na, ex chin ti'n exe tzalu tuj k'oj porque nim weye ma tza'w. 35Cyuwxix k'oj oc tuj k'ij lu, atzunju rey otok tza'w ax cub walba'n tuj tcarwaj cywitz aj Siria. Pero tej toc kax cyimtzun, ex aju chic' tuj ẍil o bekin tel tuj carwaj. 36Tej ch'ixtok tex k'ij xi sama'n jun tkanil cyxol cycyakil soldad aj Israel chi in tma'n cyja': Teyle junjun cu taj tuj ttanmi, ex teyle junjun cu taj tuj ttx'otx' jatum tzajni, 37Cyja'tzun cyim rey Acab, ex xi k'i'n t-ximlal tuj Samaria ex atzun cu'x maku'n. 38Te tibajxi xi k'i'n ju carwaj tu'n tbaj tx'jet jatum ta' ju nintz pil tuj Samaria, jatum in che chin ke xu'j jawni cywitz cyuc'il xinak. Atzun ke tx'yan e baj lek'ante tchc'el Acab, ic tza'nx otok tma Kman. 39Aju ch'intl tx'olbaben ti'j Acab ex ti'j tcyakil aju o bant tu'n, ex ti'j marfil lo'tzin twitz tja te tujxi, ex cyi'j ke tnam e jaw tbincha'n, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel. 40Tej tcyim Acab, a Ocozías aju tcy'ajal cyaj ten te rey te t-xel. 41Otok bant cyaje abk'i ttzyetlen tcawin Acab cyxol aj Israel tej ttzyet tcawin Josafat aju tcy'ajal Asa tuj Judá. 42Otok japun Josafat twi' 35 abk'i tej ttzyet tcawin ex o cawin 25 abk'i tuj Jerusalén. Aju ttxu' Azuba tbi ex tme'jel Silhi. 43Tuj tumelxix o bet Josafat tuj tcyakil ic tza'n te Asa aju ktzan tman. Tz'aklxix e ela ke tbinchben tuj twitz Kman. Masque icju, pero minti' e baj tk'u'chin ke lugar cywi witz jatum in xi cyk'o'n tnam xjal ke chojbil, ex jatum in cub cypatun storac. 44Minti' o ten k'oj cyxol Josafat cyuc'il ke rey cye aj Israel. 45Aju ch'intl tx'olbaben ti'j Josafat ex cyi'j ke tbinchben ma'xix cyxilen, ex cyi'j ke k'oj e oc tu'n, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Judá. 46E ex tlajo'n Josafat ke xjal tuj cytanmi aj Judá, akeju in che yaẍin tuc'il juntl xinak ex a jlu in cybincha'n te jun c'ulbil cywitz ke tilbilal; akeju xjal lu otok che cyaj ank'in tuj tk'ijlalil tej tten Asa aju ktzan tman. 47(Tuj Edom minti'tok rey at, nok o'cx jun gobernador tocsa'n.) 48Ax icx e baj tbincha'n Josafat ke barc ic tza'n cye aj Tarsis, tu'n t-xi k'ibaj k'an pwak tuj tx'otx' Ofir; pero minti' e je'x porque e baj pax ke barc tu'n tipun a' tuj tnam Ezión-geber. 49Xi tma'n Ocozías aju tcy'ajal Acab te Josafat, tu'n ttzaj tk'o'n ambil cye keju yucul tbarc tu'n cyxi' cyuc'il ke te yucul tbarc, pero minti' xi tk'o'n Josafat ambil tu'n cyxi'. 50Cyimtzun Josafat ex ax cu'x maku'n tuj tnam Ttanmi David tbi, aju ktzan t-xe'chel. Te tibajxi aju o cawin te t-xel, atzun Joram aju tcy'ajal. 51Otok bant wuklaj abk'i ttzyetlen tcawin Josafat tuj Judá, tej ttzyet tcawin Ocozías aju tcy'ajal Acab cyibaj aj Israel tuj Samaria, ex cab abk'i o cawin. 52Pero aju tbinchben Ocozías mya ba'n ela tuj twitz Kman, porque ax xi lpe' ti'j tbinchben ktzan tman ex ttxu', ex ti'j tbinchben Jeroboam aju tcy'ajal Nabat, aju e binchan aj Israel il tu'n. 53O c'ulun twitz Baal ex ajben te ic tza'n otok tbincha ktzan tman, ex tu'n jlu tzaj tk'oj Kman ti'j, aju Cydios aj Israel.

will be added

X\