1 REYES 21

1Te tibajxi jlu, at jun xinak aj Jezreel Nabot tbi at jun piẍ tkan t-uva tcub tuj tnam Jezreel, nikayin ttxlaj tja Acab aju rey te Samaria. 2Pon jun k'ij xi tma'n Acab te Nabot: —K'ontza ju tx'otx' te weye, aju awa'n tkan uva tuj tu'na, tu'n toc wawa'ne itzaj tuj, tu'nju ax tcub ttxlaj njaye; ex jacu txi nk'o'ne juntl piẍ tx'otx' te t-xel at tkan uva mas tbanil tuj; ex ka mas ba'n tuj twitza jacu txi nchjo'ne tu'n pwak. 3Atzunte Nabot xi ttzak'we'n te Acab: —Mlay tzaj tk'o'n Dios ambil weye tu'n t-xi nk'o'ne teya aju wetzbile cyaj cyk'o'n ktzan nmane. 4Xi'tzun Acab tja in bisun ex in k'ojin tu'n tlaj aju ttzak'webl Nabot, tu'n mi'n t-xi tk'o'n aju tetzbil cyajni k'o'n tu'n ktzan tman. Pontzun ma tja ex cub coẍe' twi twatbil, cyja' aj tk'o'n twitz twitz ja ex minti' tajbe tu'n twa'n. 5Pontzun lak'e' Jezabel aju t-xu'jil ttxlaj, ex xi tma'n te: —¿Tiku'n in bisuna ex tc'i'ya wa'n? 6Atzunte Acab xi ttzak'we'n: —Ma chin yoline tuc'il Nabot aju aj Jezreel, ex ma txi nkanine aju ttx'otx' at tkan uva tuj, tu'n ttzaj tc'ayin weye ex ka mas ba'n tuj twitz tu'n t-xi nk'o'ne jun piẍ tx'otx' awa'n tkan uva tuj te t-xel tkan t-uva. Atzunte Nabot tc'i' tzaj tk'o'n weye. 7Atzunte Jezabel aju t-xu'jil, xi ttzak'we'n: —¿Myapetzun aya cawil cyibaj aj Israel? We'ctza, chux wa'na, ex mi'n bisuna. Jacu txi nk'o'ne ttx'otx' Nabot teya, aju at tkan uva tuj, aju tcub tuj Jezreel. 8Cubtzun ttz'iban Jezabel txkan u'j ex oc ttz'iban tbi Acab cyi'j ex oc tk'o'n t-sey rey cyi'j; e je'xtzun t-sama'n ke u'j lu cye ke tij xjal ex cye ke nejenel ax najlke tuj ttanmi Nabot. 9Ex chi ju yol in tma'n cyuj ke u'j: Cymanxe cye xjal tu'n toc cychmon cyib ex tu'n tcub cyyo'n we'yaj tuj jun k'ij, ex cyk'on cube Nabot cywitz tnam xjal. 10Cyk'on cube twitz Nabot cabe xjal jumajx mya ba'n ke, tu'ntzun cymante ka ax toc otok yolin Nabot mya ba'n ti'j Dios ex ti'j rey. Te tibajxi, cyi'n exe ti'jxi tnam ex cybyoncuye tu'n abj. 11O cybincha ke tij xjal ex ke nejenel ate' tuj ttanmi Nabot ic tza'nx tyol Jezabel in tma'n cyuj ke tu'j pon t-sama'n cye: 12Xi cyma'n cye xjal tu'n toc cychmon cyib, ex tu'n tcub cyyo'n we'yaj tuj jun k'ij, ex cub cyk'o'n Nabot cywitz tnam xjal. 13E pontzun keju cabe xjal jumajx mya ba'n ke tu'n cynic'an yol ti'j Nabot cywitz xjal, ex cyma ka otok yolin Nabot mya ba'n ti'j Dios ex ti'j rey. Extzun k'i'n Nabot ttxa'n tnam cyu'n, oc cyxo'n tu'n abj ex cyim. 14Xitzun cysama'n tkanil te Jezabel ka otok baj xo'n Nabot tu'n abj, ex ya otok cyim. 15Tejtzun tbinte Jezabel jlu, xi tma'n te Acab: —Bet-xtzuna ja'lo ex toca te tajwil tkan t-uva Nabot aju aj Jezreel, aju minti' o tcuya tu'n ttzaj tc'ayin teya. Ate Nabot mya itz'x, ya ma cyim. 16Tejtzun tbinte Acab ka otok cyim Nabot, xi'tzun ex oc te tajwil ttx'otx' ktzan Nabot, aju at tkan uva tuj. 17Tzajtzun yolin Kman te Elías aju aj Tisbe, ex tma: 18K'oncuya be ex txi'ya tuc'il Acab aju rey cye aj Israel, aju najl tuj tnam Samaria. Lu Acab ta' ja'lo tuj ttx'otx' ktzan Nabot, aju at tkan uva tuj, porque ma tz'el tetzan. 19K'manxa te: Chitzun Kman ma tma: Tu'nju ma cub tbyo'na Nabot ex ma tz'el ti'na ju tetzbil, cyja'tzun tujx ju lugar jatum ma txi cylek'an tx'yan tchc'el Nabot, axtzun lugar che lek'al ke tx'yan ti'j teya tchc'el, chicuya te. 20Atzunte Acab xi tma'n te Elías: —¿Mapetzun chin cnete tu'na, aya aj k'oj wi'je? —Ax toc ma cneta wu'ne porque ma txi tk'on tiba tu'n tbinchanteya mya ba'n twitz Kman. 21Tu'ntzun jlu ma tma Kman cyja': Tzul nsama'ne mya ba'n tibaja, che bajel naj cycyakil tiyjila wu'ne, ex che najel cycyakil ke tiyjila xinak cyxol aj Israel, tza'nx ke xjal majen ex ke mya majen. 22Ex keju ate' tuj tjaya ic che telba wu'ne ic tza'n e tenba keju ate'tok tuj tja Jeroboam aju tcy'ajal Nabat, ex ic che telba ic tza'n e tenba keju ate'tok tuj tja Baasa aju tcy'ajal Ahías, tu'n tlaj ma chin octz tic'le'na tu'n ttzaj nk'oje; porque tu'na ma che binchan ke aj Israel il, chi Kman in tma'n teya. 23Ax icx ma tma Kman alcye cbajel ti'j Jezabel: Che chyo'l ke tx'yan ti'j t-ximlal Jezabel ttxlaj muro te tnam Jezreel. 24Ex atzun ke mastl tiyjila, akeju che cymel tuj tnam, tx'yan cxel chyo'nte cyximlal, ex atzun keju che cymel tuj cojbil, c'utz cxel chyo'nte cyximlal, chi Elías te Acab. 25(Mi a'l juntl xjal o pon tbinchben mya ba'n ic tza'n te Acab, porque xi tk'on tib tu'n tbinchante mya ba'n twitz Kman, porque a Jezabel aju t-xu'jil oc tenxix k'malte te tu'n tbinchante mya ba'n. 26Ic'bilxix aju tbincha twitz Kman, porque oc ten c'ulul cywitz ke tilbilal ic tza'n in cybincha'n aj Amorrey, akeju otok che ic' tlajo'n Kman cywitz aj Israel.) 27Tejtzun tbaj tbi'n Acab tcyakil yol lu, el t-sbit'un t-xbalun ti'j, oc tk'o'n t-xbalun ch'i'x twitz ex cub tyo'n we'yaj. Tuc'ix t-xbalun ch'i'x twitz toc ti'j oc tcub tan, ex oc tbet in bisun twitz. 28Tzajtzun yolin Kman tuc'il Elías aju aj Tisbe, ex chi cyja': 29—¿Mape tila Acab ma cub tmansin tib nwitze? Tu'nju ma cub tmansin tib nwitze, ja'lo mlay tzaj nk'o'ne castiw cyibaj keju ate' tuj tja acux itz'x Acab, maxi tzul nsama'ne castiw tuj tk'ijlalil oc tcawin tcy'ajal.

will be added

X\