1 REYES 20

1Oc tchmo'n Ben-adad aju rey te Siria cycyakil t-soldad cyuc'ix 32 rey, akeju otok moje' cyyol tuc'il, cyuc'ix ke cychej ex cycarwaj in che ajben tuj k'oj, e je'xtzun jatum ta' tnam Samaria, baj cytxolban cyib ti'jele ex e oc tzokpaj ti'j. 2Ex e je'x t-sama'n ke sanjel tuj tnam lu tu'n t-xi cyma'n te Acab aju rey cye aj Israel cyja': Chi Ben-adad in tma'n: 3Aju sak pwak ex k'an pwak at tuc'ila, weye ke, ax icx ke t-xu'jila cyuc'ix ke tcy'ajala mas tbanilxix, weye ke. 4Atzunte rey cye aj Israel ajtz t-sama'n ju tzak'webl cyja': Ic tza'nx ma tmaya tat rey, akine tuc'ix tcyakilju at weye c'oquel te teya. 5E je'x juntl maj ke sanjel tuc'il Acab ex xi cyma'n te: Chi Ben-adad in tma'n: O txi nma'ne teya tu'n ttzaj tk'o'na weye aju sak pwak ex k'an pwak at tuc'ila, cyuc'ix ke t-xu'jila ex ke tcy'ajala. 6Mya o'cx jlu, ax icx ax or nchi'j che xel nsama'ne ke xjal at cyoclen ntxlaje, tu'n tbaj cyjyo'n tuj tjaya ex tuj cyja ke xjal at cyoclen ttxlaja, ex tcyakil aju wi'yilxix at teya, ctzajel cyi'n, chi Ben-adad, che chi sanjel. 7Atzunte rey cye aj Israel e tzaj ttxco'n cycyakil cytijil aj Israel ex xi tma'n cye: —Cybintze, aju xjal lu in jyon tumel tu'n tbinchante mya ba'n ki'j, atzun weye minti' ma cub nxc'ayine tu'n cyxi nk'o'ne ke nxu'jile te, cyuc'ix ke ncy'ajale ex tuc'ix sak pwak ex k'an pwak at wuc'ile, chi Acab. 8—Mi'n txi tnimana ex mi'n tbinchaya aju ctzajel tkanin teya, che chi ke tij xjal, xi cytzak'we'n. Ex ax cyyol cycyakil xjal. 9Xitzun tma'n Acab cye ke xjal otok che tzaj t-sama'n Ben-adad: —Cyk'manxe te tat rey cyja': Jacu bant wu'ne tcyakil aju tzaj tkanin nej, atzunju in tzaj tkanin ja'lo, mlay nbinchaye, che chicuye te. Atzun cye sanjel xi cyi'n ju tzak'webl lu tuc'il Ben-adad. 10Tzaj tma'ntl Ben-adad te Acab cyja': Awt ke ndiose che cub k'onte ncastiwoye cyuwxix wen ka mi'n ma tza'jix tnam Samaria wu'ne, ex mlaylo canun jun yub ttza'jil te junjun soldad akeju lepcho'c wi'je. 11Atzunte rey cye aj Israel aj ttzak'we'ntl cyja': Mi'n jaw tniman tiba ka ma cambana tuj k'oj ex na'nx tcambana. 12Tejtzun tbinte Ben-adad aju tzak'webl lu, in c'antok k'e'n cyuc'il txkantl rey cyuj ke ja xbalun otok jaw cybincha'n. Xitzun tma'n cye ke xjal at cyoclen ttxlaj: Cybincham cytene. Cycyakiltzun bant cyten tu'n cyoc tzokpaj ti'j tnam. 13Pontzun jun t-sanjel Dios tuc'il Acab aju rey cye aj Israel, ex xi tma'n te: —Chi Kman ma tma: Masque in tila nimxix cyajlal aj k'oj ti'ja, pero akine chin xel k'onte cye tuj tk'aba ja'lo, tu'ntzun tel tnic'a ti'j ka akine Dios aju Cymane. 14—¿Al u'n cbel cyi'j ke jlu? Chi Acab xi tkanin. Xi ttzak'we'n t-sanjel Dios: —Cyu'n ke cu'xun, akeju in che onin cye ke gobernador cye junjun partament, chi Kman ma tma. —¿Alcye c'oquel tzokpaj tnejel? Chi Acab xi tkanintl. —Aya, chi t-sanjel Dios, xi ttzak'we'n. 15Atzunte Acab ic' twitz cyi'j ke cu'xun in che onin cyi'j ke gobernador cye junjun partament, attok cab syent tuc' 32 cybaj, ax icx e oc tchmo'n cycyakil ke soldad aj Israel, japun wuk mil cybaj. 16E etztzun ke soldad lu te chilcuk'ij, atzunte Ben-adad cyuc'ix 32 rey akeju otok moje' cyyol tuc'il, cucxtok cyc'an k'e'n cyuj ke xbalun ja. 17Tnejel e etz ke onil cye ke gobernador. Tejtzun tbinte Ben-adad aju tkanil ka attok junjun xinak otok che etz tuj tnam Samaria, 18xi tma'n cyja': Ka ma che etz tuc'il jun tkanil tu'n twe' k'oj ex ka tu'n toc k'oj, pero wajbile tu'n tul cyi'ne tzalu, itz'x ke. 19Akeju onil cye ke gobernador e etz tuj tnam Samaria, ex lepcho'c ke soldad cyi'j. 20Ex teyle junjun cye cub tbyo'n jun aj k'oj aju oc tzokpaj cyi'j, atzun cye aj Siria e je'l ok; e je'xtzun lpe' ke aj Israel cyi'j, atzunte Ben-adad aju rey cye aj Siria o clet tej tel ok tjax tibaj tchej, ex cyuc'ix junjuntl t-soldad cyjaxsa'n cyibaj cychej. 21Etztzun rey Acab, ul cyuc'il ke soldad aj Israel. E octzun tzokpaj cyi'j ke soldad aj Siria cyjax cyibaj chej, ex cyi'j keju cyjax cyuj carwaj in che ajben tuj k'oj. Cub cyi'j cyu'n ex nimcu aj Siria e cyim tuj k'oj lu. 22Te tibajxi pon juntl maj t-sanjel Dios tuc'il rey cye aj Israel ex xi tma'n te: —Binchama cyten ke t-soldadiya, ex chebaxix ximana ti'j alcye cbantel tu'na, porque tuj juntl abk'i tzul meltz'aj juntl maj aju rey cye aj Siria tu'n toc tzokpaj ti'ja. 23Ke xjal at cyoclen ttxlaj rey cye aj Siria xi cyma'n te cyja': —Ke cydios aj Israel atzun ate' cywi' ke witz; cyja'tzun ma ko cub cyu'n. Pero ka ma ko k'ojin cyuc'il tuj chk'ajlaj, segur ko cambal cyi'j. 24Aju tu'n tbant tu'na ja'lo Tat Rey, k'i'n ela cyoclen ke rey ex k'o'n oca ke xjal at cyoclen ttxlaja te cyxel, 25ex tu'n cybaj tchmo'na txkantl soldad ic tza'nx keju o che cub, ax icx ke chej ex ke carwaj ic tza'nx keju ate' nej. Entons ko k'ojl cyuc'il tuj chk'ajlaj ex ko cambal cyi'j. Atzunte Ben-adad xi tbi'n ju consej lu ex o tbincha icju. 26Tbajlenxi jun abk'i ic' twitz Ben-adad cyi'j ke t-soldad, ex cub be cyu'n tu'n cypon tuj tnam Afec tbi, tu'n cyk'ojin cyi'j aj Israel. 27Ax icx cye aj Israel ic' cywitz cyi'j ke cysoldad ex xi cyk'o'n tcyakil aju at tajben cye, ex e je'xtzun tu'n cyc'ulbante cyib cyuc'il aj k'oj. E cubtzun ten ke cywitz aj Siria, mer ic tza'n cabe byuj chip ke, ex atzun cye aj Siria nojni tuj tcyakil lugar lu cyu'n. 28Ex pontzun t-sanjel Dios tuc'il rey cye aj Israel ex xi tma'n te: —Chi Kman ma tma cyja': Masque ma cyma aj Siria ka akine jun Dios o'cx ta' twi witz, ex myatzun ta' tuj chk'ajlaj, che xel nk'o'ne cycyakil ke jlu tuj tk'aba, tu'ntzun tel cynic'e ti'j, axix toc akine Dios aju Cymane. 29Wuk k'ij e cub ten aj Siria tuj jun pac' ex ke aj Israel tuj juntl pac', ex tujx twukin k'ij tzyet k'oj cyu'n. Tuj k'ij lu cub cybyo'n aj Israel jun syent mil soldad aj Siria, akeju in che bet tu'n cykan. 30Atzun ke txkantl soldad e je'l ok tu'n cypon tuj tnam Afec, pero aju muro toc ti'j ju tnam tzaj tz'ak cyibaj 27 mil soldad, akeju otok che tzokpaj nej. Ax icx te Ben-adad pon tuj tnam lu ex o yut'ut'un tic' cyuj ke ja tu'n tclet. 31Ke xjal in che ajbentok te xi cyma'n cyja': —O kbiye akeju rey cye aj Israel in tzaj k'ak'an cyc'u'j cyi'j xjal; cyja'tzun c'oquel kk'o'ne kxbalune ch'i'x twitz, tuc'ix jun sakbak cbel ten kkule, ex ko xe'ltzune twitz rey cye aj Israel, kape jacu cyaj ank'ina tu'n. 32Octzun cyk'o'n cyxbalun ch'i'x twitz ex tuc'ix jun sakbak cub cyk'o'n cykul, e pontzun twitz rey cye aj Israel ex xi cyma'n te cyja': —Tat Rey, in cubsan Ben-adad twitza tu'n mi'n tcub tbyo'na. Atzunte Acab xi ttzak'we'n: —¿Maj itz'xpetzun aju wermaniye Ben-adad? 33Atzun cye xinak e jaw tzalaj tej cybinte ju yol lu ex jurat xi cytzak'we'n: —Tat Rey, ate Ben-adad termaniya. —Chuxni cyxi'ye k'ilte te, chi Acab xi ttzak'we'n. Pontzun Ben-adad twitz Acab, ex atzunte Acab jax tk'o'n tuj tcarwaj. 34Xitzun tma'n Ben-adad te Acab: —Jacu che aj nk'o'ne juntl maj ke tnam e je'l ti'n ktzan nmane te ktzan tmana, ex jacu ten tc'a'ẍa tuj Damasco, ic tza'n tej tten tc'a'ẍ ktzan nmane tuj Samaria, chi Ben-adad. Atzunte Acab xi ttzak'we'n: —Ka icju, jacu txi ntzokpi'ne tu'n taj meltz'aja. Cyja'tzun tten, bant ti'j jun yol tu'n Acab tuc'il Ben-adad, ex xi ttzokpi'n tu'n taj meltz'aj. 35Attok jun xinak cyxol ke t-sanjel Dios tzaj tma'n Dios te tu'n t-xi tma'n te jun tuc'il cyja': —Binchama xtalbil chin tbyo'n oca. Atzunte juntl minti' cub tuj twitz tu'n toc tbyo'n tuc'il. 36Xitzun tma'n ju t-sanjel Dios te tuc'il: —Tu'nju minti' ma txi tnimana aju ma tma Kman, o'cx oc tel tpa'n tiba wi'je c'oquel tzokpaj jun balun ti'ja. Tejtzun tel tpa'n tib ju xjal lu ti'j t-sanjel Dios, etz jun balun tuj tbe ex cub byo'n tu'n. 37Te tibajxi oc noj t-sanjel Dios ti'j juntl xinak, ax icx xi tma'n te tu'n toc c'ixbisa'n tu'n, atzunte xinak lu oc ten c'ixbisalte te ex bi'x oc jun ẍil ti'j tu'n. 38Xi'tzun t-sanjel Dios ayol ti'j rey max tuj be, oc tmaksi'n twitz tu'n jun xbalun tu'ntzun mi'n tel tnic' rey ti'j. 39Tejtzun tic' rey, xitzun tma'n t-sanjel Dios te tuc'il tk'ajk'ajel twi' cyuwxix: —Tat Rey, akine ajbel teya tej ẍin ex bete jatum nno'c k'oj, etz jun soldad ex tzaj ti'n jun pres wuc'ile. Tzaj tma'n weye tu'n tcyaj ten ju pres lu tuj ncwente, ax icx tzaj tma'n cyja': Ka ma txi tzokpaj tu'na, aya cymel te t-xel, ex ka mi'n, il ti'j tu'n t-xi tchjo'na 75 libr sak pwak te tmulta. 40Pero ma txi tzokpaj pres wu'ne tej matok in chin binchane juntl ti'xti. Atzunte rey cye aj Israel xi ttzak'we'n: —Axa ma k'mante ka at tila, ex ma tmaya aju t-sentensa tu'n tcub. 41Atzunte t-sanjel Dios jurat naj el ti'n aju xbalun tocsa'n twitz. Eltzun tnic' rey ti'j ka jun t-sanjel Dios jlu. 42Xitzun tma'n t-sanjel Dios te rey cyja': —Atzun jlu ma tma Kman: Tu'nju ma txi ttzokpi'na aju xinak otok cub t-sentens wu'ne tu'n tcyim, atzun ja'lo aya cymel te t-xel, ex akeju t-xjalila oc che najel te cyxel ke t-xjalil. 43Ajtzun meltz'aj ju rey cye aj Israel tu'n tpon tja tuj Samaria in bisun ex in k'ojl wen.

will be added

X\