1 REYES 18

1Eltzun k'ij. Tbajlenxi ox abk'i tzaj yolin Kman te Elías ex xi tma'n te: Txi'ya tuc'il Acab, porque ctzajel nsama'ne jbal tibaj tx'otx'. 2Xi'tzun Elías tu'n tpon twitz Acab. Aju we'yaj tuj tnam Samaria cyuwxix tponlen wen. 3Txquet Abdías aju mayordom, tu'n Acab. (Ate Abdías nimanxix Kman tu'n ex in xob twitz 4ex tej ttzyet cybyonjtz ke t-sanjel Kman tu'n Jezabel, otok che oc tchmo'n Abdías jun syent t-sanjel Dios, ex cabe c'loj e e'la tu'n, te mey syent junjun c'loj, ex otok che'x tewan naj tuj cabe toy' pic, ex c'a'chan ke tu'n.) 5Xitzun tma'n Acab te Abdías: —Bincham ttena, ko' tuj tcyakil cytx'otx' aj Israel ex jatum ta' cywi' cycyakil a', ex cyuj cycyakil cyk'ab xak, kape jacu cnet ch'in cha'x c'ul te cywa chej cabay ex ke mul, porque ka mi xcnet, jacu che cyim ex ko cyjel ten minti' kchej. 6Cyja'tzun baj cypa'n cyib, ate Acab xi' tuj mij tx'otx' cye aj Israel, ax icx te Abdías xi' tuj mijtl, jyolte cha'x c'ul. 7Tej cyja' t-xi' Abdías tuj be oc tc'ulban tib tuc'il Elías, ex tej tel tnic' Abdías ti'j cub ẍmeje', pon tacl tibaj twitz twitz tx'otx' ex tma: —¿Kape aya tat Elías? 8—Ax toc akine. Chux txi'ya ex k'manxa te tpatrona ka atzun atine tzalu, chi Elías xi ttzak'we'n. 9Atzunte Abdías xi ttzak'we'n: —¿Alcye il ma nbinchaye tu'nju taja tu'n nxi tk'o'na tuj tk'ab Acab tu'n ncub byo'ne tu'n? 10Cxel nma'ne jun yol axix toc twitz Kman. Cyuj cycyakil nasyon ex cawbil o txi joybaja tu'n npatrone; ex tej ttzaj k'ma'n mi a'la at ma chixin, in xi tma'n npatrone cye xjal tu'n t-xi cyma'n jun yol axix toc ka ax toc na'nxtok tcneta cyu'n. 11Atzun ja'lo in tma'na weye tu'n nxi'ye ex tu'n t-xi nma'ne te npatrone ka a ta'ya tzalu. 12Aju cbajel atzun jlu, oc tel npa'n wibe ti'ja ja'lo, aju T-xew Kman cxel k'i'na tu'n tuj juntl lugar minti' ojtzki'n wu'ne; ex octzun tpon tkanil wu'ne tuc'il Acab, ctzajel jyol teya, ex ka mi a'la at, chin bel byo'ne tu'n. Na'ntza, akine cucx in chin nimane te Kman atxix tuj ncu'xumale. 13¿Na'nxpe tbinteya aju o bant wu'ne tej cycub byo'n ke t-sanjel Kman tu'n Jezabel? Akine inx ewante jun syent t-sanjel Kman, mey syent junjun c'loj e ocx wewane tuj cabe toy' pic, ex e oc nc'a'chane. 14Atzun ja'lo in tma'na tu'n nxi'ye ex tu'n t-xi nma'ne te npatrone ka a ta'ya tzalu, ex jacu chin cub byo'ne tu'n, chi Abdías. 15Atzunte Elías xi ttzak'we'n: —Cxel nma'ne jun yol axix toc twitz Kman aju Tajaw Tcyakil aju in chin ajbene te, bi'x ja'lo cxel nyec'un wibe te Acab. 16Xi'tzun Abdías jyolte Acab tu'n t-xi tk'o'n tkanil ti'j Elías, ex xi'tzun Acab canul ti'j Elías. 17Tejtzun tilwaj Elías tu'n Acab, xi tma'n te: —¿Apeya ma tzaj k'inte mya ba'n cyibaj aj Israel? 18Atzunte Elías xi ttzak'we'n: —Mya awe kin ma chin tzaj k'inte mya ba'n cyibaj xjal, nok o'cx axa ex keju at t-xilena cyuc'il, tu'nju minti' ma che japun ke tmandamyent Kman cyu'ne, ex tu'nju ma che oc tene c'ulul cywitz ke tilbilal Baal. 19Ja'lo, samanxa ke xjal tu'n tbaj cychmo'n cycyakil aj Israel twi witz Carmelo, cyuc'ix cyaje syent tuc' 50 t-sanjel Baal ex cyuc'ix cyaje syent t-sanjel xu'j dios Asera, cycyakil ke jlu c'a'chan ke tu'n Jezabel, chi Elías. 20Xitzun tma'n Acab tu'n cytzaj txquet cycyakil aj Israel, ax icx e oc tchmo'n cycyakil t-sanjel Baal twi witz Carmelo. 21Pontzun lak'e' Elías cyuc'il cycyakil tnam xjal ex xi tma'n cye: —¿Jtoj txi cycoline tu'n tten cabe cyximbetze? Ka a Kman aju Dios axix toc, che lpe'que ti'j, ex katzun a Baal, che lpextzune ti'j. Atzun cye xjal mi jun yol xi cytzak'we'n. 22Cucx o yolin Elías ex tma: —Njunalxe ma chin cyaj tene akine t-sanjel Dios, atzun cye t-sanjel Baal at cyaje syent tuc' 50 cybet. 23Ja'lo cyi'ntze cabe tor, ex e tjaw cysc'o'n jun cye, e tbaj cypaẍu'n, ex e tcub cyk'o'n tibaj si', pero mi'n tz'oc cyk'o'n k'ak' ti'j. Ax icx weye, cbajel nbincha'ne aju juntl tor, cbel nk'o'ne tibaj si', pero ax icx mi'n tz'oc nkoptz'i'ne k'ak' ti'j. 24Che cubsantzune twitz cydiose, ax icx weye chin cubsale twitz Kman; ex alcyetzun cyxol cabe lu ma tzaj ttzak'we'n ex ma tzaj tk'o'n k'ak' tu'n ttz'e'y tor, atzun Diosju aju axix toc. —Ax ba'n, che chi xjal xi cytzak'we'n. 25Xitzun tma'n Elías cye t-sanjel Baal: —Cysc'on jawe jun cyeye cytor ex cybinchan baje nej tu'nju nim cyeye cybaj, ex che cubsane twitz cydiose, pero mi'n tz'oc cykoptz'i'ne k'ak' ti'j. 26Tzajtzun cyi'n aju tor otok txi k'o'n cye, ex baj cybincha'n, ex tzyet-x cyu'n te prim tu'n cycubsan twitz Baal aju cydios, tejxi tpon chilcuk'ij. Ex in cyma'n: Ko ttzak'we'ntza Baal, ex in che t'icpajtok ti'jele altar aju otok jaw cybincha'n, pero mi jun tzaj tzak'wente cye. 27Tejtzun tpon chilcuk'ij oc ten Elías xmayil cyi'j, ex xi tma'n cye: —Che sch'ine cyuwxix wen porque baka mya dios jlu. Balo at in ximan ti'j, ex ka nim tak'un, ex ka ma txi' tuj jun tbe. Balo in tan ex il ti'j tu'n tjaw cyc'asune, chi Elías. 28Cyja'tzun e jaw sch'in mas cyuwxix, ex e oc ten kesil cyximlal tu'n cchil ex tu'n lans tejxi tbaj ac' cyi'j tu'n chic' ic tza'nx cycostumr. 29Tbajlenxitzun chilcuk'ij cucxtok cysch'in, ex cucxtok cyt'icpaj mer ic tza'n loc ke, tejxi tpon or ic tza'n in xi k'ot ju chojbil te kale, pero mi a'l tzaj tzak'wente ex mi a'l tzaj binte cye. 30Xitzun tma'n Elías cye cycyakil xjal: —Che lak'etze wuc'ile. E tzajtzun lak'e' cycyakil ttxlaj, ex jawtzun tbincha'n Elías juntl maj altar te Kman, aju otok cub xitj. 31Tzajtzun ti'n Elías cablaj abj, ic tza'nx cyajlal cablaj c'loj cyiyjil tcy'ajal Jacob, aju a Kman o k'mante tu'n toc tbi Israel, 32ex cyu'ntzun ke abj lu, jaw tbincha'n jun altar te Kman; baj tbincha'n jun sanja ti'jele altar ma'yin t-xe', 33ax icx cub tnac'u'n si' tibaj altar; cubtzun tpaẍu'n ju tor ex cub tk'o'n tibaj si'. 34Xitzun tma'n cye xjal: —Cynojsan baje cyaje ẍok' a', ex cyko'n cube tibaj wacẍ paẍumaj ex tibaj si'. Ex xi tma'n tu'n tbinchet tcabmajin ex toxinmajin, ex o bant cyu'n icju. 35El tilj a' ti'jele altar, ex bi'x noj sanja tu'n. 36Tejtzun tpon or ic tza'n in xi k'ot chojbil te kale, ate Elías aju t-sanjel Dios tzaj lak'e' ti'j altar ex tma: Aya Nman aju Tdios Abraham, ex Tdios Isaac, ex Tdios Israel, cuchiwt tu'n tel nic'baj ti'ja ka aya Dios cye aj Israel, ex ka akine tmajena, ex ka ma nbinchaye tcyakil jlu porque aya xk'mante tu'n tbant wu'ne. 37Chin ttzak'wentza Nman, chin ttzak'wentza, tu'ntzun tel cynic' xjal ti'ja ka aya Dios ex in txocona cyi'j tu'n cyul meltz'aj juntl maj tuc'ila, chi Elías. 38Tujxtzun or lu cu'tz jucpaj k'ak' te Kman ex baj tz'e'y ju wacẍ paẍumaj, tuc'ix si', ex cyuc'ixpe ke abj e baj tz'e'y, tuc'ix tx'otx', ex bi'x jatz tzkij a' tcu'x tuj sanja. 39Tejtzun cyque'yinte cycyakil xjal jlu, e cub ẍmeje' ex pon tacl tibaj cywitz max twitz tx'otx' ex cyma: Ate Kman atzun Diosju, ate Kman atzun Diosju. 40Xitzun tma'n Elías cye: —Cytzyuntze ke t-sanjel Baal, ex mi jun tu'n ttzokpaj. E tzajtzun tzyu'n cyu'n ke xjal ex e je'xtzun ti'n Elías ma tuj tk'ab xak Cisón, ex atzun e cub tbyo'n. 41Xitzun tma'n Elías te Acab: —Txi'ya wa'l ex c'al, porque ya ch'ix tk'ajt tkan jbal tu'n ttzaj. 42Xi'tzun Acab wa'l ex c'al. Atzunte Elías jax twi witz Carmelo ex cub ẍmeje' tejxi tcub tacl tibaj twitz twi tch'ec, 43ex xi tma'n te tmajen: —Txi'ya, ex que'yinxa tibaj mar. Xi'tzun ex xi tque'yin tibaj mar, ex xi tma'n te Elías: —Minti' jun ti'xti ma wile. Xi tma'n Elías te tmajen tu'n t-xi' wuk maj que'yilte. 44Tujtzun twukin maj xi tma'n majen te Elías: —Ma tibaj mar niban tjaw jlet ch'in muj mer ic tza'n tuj tlakal jun k'abaj. Xitzun tma'n Elías te: —Txi'ya ex k'manxa te Acab tu'n toc tc'alo'n tcarwaj cyi'j ke chej ex tu'n taj naj, na'nxtok ttzokpaj jbal ex tu'ntzun mi'n tmaket tbe. 45Jaxtzun Acab tuj tcarwaj ex xi' tuj tnam Jezreel. Aju twitz cya'j ya cyja'tok toc yupj tu'n muj ex tu'n cyk'ik', ex tzajtzun txkan jbal cyuwxix wen. 46Atzunte Elías tzaj k'o'n nimxix tipun tu'n Kman, jawtzun tlak'ba'n ju tkan t-ẍjo'w, xitzun kelan tu'n tpon tuj tnam Jezreel nejnitok twitz Acab.

will be added

X\