1 REYES 17

1Atzunte Elías aju aj Tisbe aju at tuj tx'otx' Galaad, xi tma'n te Acab: Cxel nma'ne jun yol axix toc twitz Kman aju Cydios aj Israel aju in chin ajbene te: Tuj cab ox abk'i ja'lo mlay tzaj jbal ex mi tk'ab che'w, maxitzun ctzajel jbal oc t-xi nma'ne. 2Tzaj yolin Kman tuc'il Elías ex tma cyja': 3Texa tzalu ex cyja' t-xi'ya tuj tjawitz k'ij, ewanx tiba tuj tk'ab xak aju toc tbi Querit aju tcub jlajxi nima Jordán tuj tjawitz k'ij. 4Atzun cc'ala a' tuj tk'ab xak lu, ex o txi nma'ne cye ke joj tu'n t-xi k'a'cj twaya cyu'n. 5Tbinchatzun Elías ic tza'nx o tma Kman te, xi'tzun tuj tk'ab xak Querit jlajxi ju nima Jordán, ex axtzun cyaj ten. 6Pontzun k'i'n twa ex tchi' cyu'n ke joj te prim ex te kale, ex atzun o c'an a' tuj tk'ab xak. 7Pero tej tel ch'intl k'ij, aj tzkij tk'ab xak porque minti' jbal o tzaj tuj tcyakil tx'otx' cye aj Israel. 8Xitzun tma'n Kman te Elías: 9We'ctza ex txi'ya tuj tnam Sarepta nikayin ttxlaj tnam Sidón, ex atzun tcyaj tena najal ma chixin. Ma txi nma'ne te jun meba xu'j najl tuj lugar ma chixin tu'n ttzaj k'o'n twaya tu'n. 10Jawtzun we' Elías ex xi' tuj tnam Sarepta. Tej tocx tuj ju tnam o til jun meba xu'j in k'in si'. Tzaj ttxco'n ex xi tma'n te: —Binchama xtalbil, k'intza ch'in a' tuj jun vas te nc'aye. 11Cyja'tok t-xi' xu'j k'ilte tej tajtz txco'n juntl maj tu'n Elías, ex xi tma'n te: —Binchama xtalbil, tuc'ix jun piẍ pan k'intza. 12Atzunte xu'j xi ttzak'we'n te: —Cxel nma'ne jun yol axix toc twitz Kman aju Tdiosa: misicyer pan banimaj wu'ne. Nok o'cx jun yub arin atx tuj jun ẍok', ex tuc'ix ch'in chibj aseyt atx tuj jun xar, ex atzun til in chin k'ine ch'in si', tu'n nxi'ye tzk'ajsalte te twa wale ex te weye. Cbajel kwa'ne jlu, ex te tibajxi ko cymele tu'n we'yaj, porque minti'tl atx. 13Atzunte Elías xi ttzak'we'n: —Mi'n xoba. Txi'ya binchalte ju ma tmaya. Pero tnejel binchama jun tal wabj te weye ti'j arin ma tmaya ex k'intza weye, te tibajxi binchama juntl te teya ax icx te tala. 14Porque ma tzaj tma'n Kman aju Cydios aj Israel cyja': Mlay cub baj naj aju arin tcu'x tuj ẍok', ax icx aju chibj aseyt tcu'x tuj xar; maxi cbel baj ocxi ttzaj jbal tu'n Kman tibaj tx'otx' lu. 15Xi'tzun ju xu'j ex tbincha ic tza'nx otok tma Elías. Ate xu'j cyuc'ix keju ate' tuj tja ex tuc'ix Elías, cabal o canun cywa te nim k'ij. 16Minti' cub baj naj arin tuj ẍok', ax icx ju chibj aseyt tuj xar; o japun ic tza'nx otok tma Kman te Elías. 17Otok tz'el k'ij, tzyet tal meba xu'j tu'n yabil; cyuwxix aju yabil oc ti'j ex o cyim. 18Xitzun tma'n ju meba xu'j te Elías: —Aya t-sanjel Dios, ¿ti tk'oja wi'je? ¿Mape tzula wuc'ile nok tu'n ttzaj tna'na wile ex tu'n tcyim wale?, chi xu'j. 19—K'ontza tala tzalu wuc'ile, chi Elías xi ttzak'we'n. Eltzun ti'n Elías aju tal c'wa'l twi tkan meba xu'j, ex jax ti'n tuj tcwart jatum najltok, ex cub tcoẍba'n twi twatbil. 20Jawtzun tk'ajk'ajel twi' cyuw, ex xi tma'n te Kman: Aya Nman Dios, ¿maj tuc'ix ju meba xu'j lu ma tzaj tk'o'na jun bis ti'j, aju jatum in chin posadiyine, ex lu ma cyim tal tu'na? 21Te tibajxi jlu cubtzun mutze' Elías ox maj tibaj tal k'a, jaw tk'ajk'ajel twi' cyuw ex xi tma'n te Kman: Aya Nman Dios, in chin cubsane twitza tu'n tul tnabl tal k'a lu tu'na. 22Tzajtzun ttzak'we'n Kman aju tkanbetz Elías, ex ul tnabl tal k'a. 23Jawtzun ti'n naj Elías aju tal k'a, cu'tz ti'n tuj tcwart ma twi ja, xi tk'o'n te ttxu', ex xi tma'n te: —Que'yintza, aju tala ma tzul tnabl. 24Atzunte xu'j xi ttzak'we'n: —Ja'lo ma tz'el nnic'e ti'j ax toc aya jun t-sanjel Dios, ex aju in tma'na ax toc a Kman in k'mante teya.

will be added

X\