1 REYES 16

1Atzunte Kman tzaj yolin te Jehú aju tcy'ajal Hanani, tu'ntzun t-xi tma'n ke yol lu ti'j Baasa: 2Nej minti'tok ch'in toclena, pero oc nk'o'ne tu'n toca te nejenel cye aj Israel akeju etzan wu'ne; atzun teya icx ma tz'oca ic tza'n te Jeroboam; ma che binchan aj Israel il tu'na ex ma tzaj nk'oje tu'n tlaj o che binchan il. 3Cyja'tzun, aya Baasa cnajela wu'ne cyuc'ix ke tiyjila; ax cbantel wu'ne cyi'j ke tiyjila ic tza'nju o bant wu'ne cyi'j ke tiyjil Jeroboam aju tcy'ajal Nabat. 4Ke tiyjila che cymel tuj tnam, che xe'l chyo'n cyu'n tx'yan; ex atzun keju che cymel tuj cojbil, che xe'l chyo'n cyu'n c'utz, chi Jehú. 5Aju ch'intl tx'olbaben ti'j Baasa, ex ti'j ju tbincha, ex ti'j ju tbinchben ma'xix toclen, atzun tz'iban tuj u'j jatum ta' tcyakil tx'olbaben cyi'j cybinchben ke rey cye aj Israel. 6Tejtzun tcyim Baasa cu'x maku'n tuj tnam Tirsa. Te tibajxi aju o cawin te t-xel, atzun Ela aju tcy'ajal. 7Tzaj tma'n Kman te Jehú aju t-sanjel, aju tcy'ajal Hanani, alcye t-sentens Baasa attok tcubil ex ju cysentens ke tiyjil, porque akeju tbinchben Baasa mya ba'n e ela tuj twitz Kman; cyja'tzun tzaj tk'oj ti'j, porque ax ke mya ba'n o tbincha ic tza'n keju o tbincha Jeroboam ex ke tiyjil, akeju e cub tbyo'n Baasa. 8Otok bant 26 abk'i ttzyetlen tcawin Asa tuj Judá, tej ttzyet tcawin Ela aju tcy'ajal Baasa cyibaj ke aj Israel tuj tnam Tirsa, ex cab abk'i o cawin. 9Pero ate Zimri, aju tocsa'n te nejenel cyi'j mijcu tcarwaj rey in che ajben tuj k'oj, oc tchmo'n jun c'loj xjal junx cyximbetz tuc'il tu'n tjaw cyi'n cyib ti'j Ela. At jun k'ij, tej attok Ela tuj tnam Tirsa tuj tja Arsa aju tmayordom, oc ten c'al k'e'n tejxi tchyo'n twi'. 10Pontzun Zimri ex cub byo'n Ela tu'n tu'ntzun tcawin te t-xel. Bant jlu tej otok bant 27 abk'i ttzyetlen tcawin Asa tuj Judá. 11Nok o'cx tej ttzyet tcawin Zimri, e cub tbyo'n cycyakil ke xjal at cyxilen tuc'il Baasa, ex mi jun xinak cyaj ank'in tu'n cyxol keju at cyxilen tuc'il Baasa, mi cyxol ke tamiw. 12Cyja'tzun tten e cyim cycyakil xjal at cyxilen tuc'il Baasa tu'n Zimri, ic tza'nx ju sentens otok tma Kman ti'j Baasa, aju otok tma Jehú aju t-sanjel. 13Tu'n cylaj cycyakil ke il tbincha Baasa ex ke il tbincha Ela aju tcy'ajal, e binchan aj Israel il, e c'ulun cywitz ke tilbilal; cyja'tzun tzajxix tk'oj Kman cyi'j, aju Cydios aj Israel. 14Aju ch'intl tx'olbaben ti'j Ela ex ti'j tcyakilju o tbincha, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel. 15Tej lajo'ntok 27 abk'i ttzyetlen tcawin Asa tuj Judá ttzyet tcawin Zimri tuj tnam Tirsa. Pero nok wuk k'ij o cawin, ex tujx k'ij lu otok tz'oc cychmon cyib ke soldad aj Israel tu'n cyoc ten k'ojlel cyi'j aj Filistey tuj tnam Gibetón. 16Tujx k'ij lu, tej ate'tok ke soldad tuj campament, o cybi ka otok moje' tyol Zimri cyuc'il xjal ex otok cub byo'n rey tu'n. Cycyakiltzun ke soldad ate' tuj campament oc cyk'o'n Omri te rey cye aj Israel, aju nejenel cye soldad. 17Cyja'tzun xi tcolin Omri cyuc'ix cycyakil soldad aj Israel tu'n cyk'ojin ti'j tnam Gibetón, ex cub be cyu'n tu'n cypon tuj tnam Tirsa ex e oc tzokpaj ti'j. 18Tejtzun tque'yinte Zimri otok tzyet ju tnam, ocx tuj jun ja cyuw tten tuj tja rey, oc tkoptz'i'n k'ak' ti'j ja ex tuc'ix tocxtok tuj; cyja'tzun tten cyim. 19Bant icju tu'n tlaj ju il bant tu'n, ex tu'nju tbinchben mya ba'n ela tuj twitz Kman, porque ax il tbincha ic tza'n keju tbincha Jeroboam, ex tu'n jlu e binchan aj Israel il tu'n. 20Aju ch'intl tx'olbaben ti'j Zimri ex ti'j ju tbincha ti'j rey Ela, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel. 21Cub ten jun pabl tib cyxol tnam xjal, mij cyajbiltok tu'n a Tibni tu'n toc te cyrey, aju tcy'ajal Ginat, ex mijtl cyajbiltok tu'n a Omri tu'n toc te cyrey. 22Te mancbilxi, akeju ate' tuc'il Tibni aju tcy'ajal Ginat, cub cyi'j cyu'n keju ate' tuc'il Omri. Cyimtzun Tibni, ex cyja'tzun oc Omri te rey. 23Otok bant 31 abk'i ttzyetlen tcawin Asa aju rey te Judá, tej ttzyet tcawin Omri cyxol aj Israel, ex cablaj abk'i o cawin; kak abk'i o cawin tuj tnam Tirsa. 24El tlak'o'n te Semer aju witz Samaria tbi, tu'n jun quintal tuc' 50 libr sak pwak, ex atzun ma chixin jaw tbincha'n jun tnam ex oc tk'o'n muro ti'j, ex oc tk'o'n tbi Samaria, porque Semer tbi tajwil ju witz nej. 25Akeju tbinchben Omri mya ba'n e ela tuj twitz Kman, masxix mya ba'n o tbincha ic tza'n ke rey e ten nej twitz, 26porque ax ke il tbincha ic tza'n keju tbincha Jeroboam aju tcy'ajal Nabat; e binchan aj Israel il tu'n, ex tu'nju in che c'ulun cywitz ke tilbilal, tzaj tk'oj Kman cyi'j, aju Cydios aj Israel. 27Aju ch'intl tx'olbaben ti'j Omri ex ti'j tcyakil aju tbincha, ex cyi'j ke tbinchben ma'xix cyoclen, atzun tz'iban tuj u'j jatum ta' tcyakil tx'olbaben cyi'j cyak'unben ke rey cye aj Israel. 28Tejtzun tcyim, cu'x maku'n tuj tnam Samaria. Te tibajxi aju o cawin te t-xel, atzun Acab aju tcy'ajal. 29Otok bant 38 abk'i ttzyetlen tcawin rey Asa tuj Judá, tej ttzyet tcawin Acab aju tcy'ajal Omri cyxol ke aj Israel. Ex o cawin 22 abk'i cyxol aj Israel tuj tnam Samaria. 30Pero aju tbinchben Acab mya ba'n ela tuj twitz Kman, ex masxix mya ba'n o tbincha cywitz ke mastl rey, akeju otok che ten nej twitz. 31Aju il tbincha mya nok o'cx ic tza'n tbincha Jeroboam aju tcy'ajal Nabat, ax icx at juntl il tbincha mas ma'xix, tu'nju o moje' tuc'il ju xu'j Jezabel aju tme'jel Et-baal aju cyrey aj Sidón, ex atzun o c'ulun twitz Baal ex o ajben te, 32ex jaw tbincha'n jun tja Baal tuj Samaria, tuc'ix jun altar tuj. 33Ax icx cub tbincha'n jun tilbilal xu'j dios Asera. Tu'ntzun jlu tzaj tk'oj Kman aju Cydios aj Israel ti'j rey Acab, ex masxix nim tk'oj Kman tzaj ti'j cywitz ke mastl rey otok che ten nej twitz. 34Tuj tk'ijlalil Acab o jaw bincha'n juntl maj tnam Jericó tu'n jun xjal aj Betel, Hiel tbi. Tej tcub ke' t-simyentil tnam tu'n, bi'x cyim Abiram aju nej tcy'ajal; ex tej cyoc ke tpwertil tnam tu'n, bi'x cyim mancbil tcy'ajal, Segub tbi, ic tza'nx otok tma Kman te Josué aju tcy'ajal Nun.

will be added

X\