1 REYES 14

1Tuj tk'ijlalil lu o yabt Abías aju tcy'ajal Jeroboam, 2ex xi tma'n Jeroboam te t-xu'jil: —Ch'expumel t-xbaluna tu'ntzun mi'n tel nic'baj ti'ja ka aya nxu'jile, ex txi'ya tuj Silo tuc'il Ahías aju t-sanjel Dios tzaj k'mante weye tu'n woque te rey te nasyon lu. 3K'inxa laj pan, tuc'ix wabj tx'ilsa'maj, tuc'ix jun xar ta'l cab, ex k'onxa te tu'ntzun ttzaj tma'n teya ti cbajel ti'j c'wa'l lu. 4Tbinchatzun t-xu'jil Jeroboam icju. Banttzun tten, xi' tuj Silo ex pon tja Ahías. Atzunte Ahías mibantok que'yin tu'nju otok tz'oc yupj cyi'j tbak' twitz tu'n tijin, 5pero otok tzaj tma'n Kman te cyja': Tzul t-xu'jil Jeroboam kanil jun t-xjel teya ti'j ju tal ma yabt. Atzun yol lu cxel tma'na te, porque oc tul xu'j lu ch'expu'n t-xbalun tu'n mi'n tel tnic'a ti'j, chi Dios. 6Tejtzun tbinte Ahías tk'ajk'ajel tkan ju xu'j tej topin bet ttzi ja, xi tma'n te: —Toctza, aya t-xu'jil Jeroboam. ¿Tiku'n nno'c tk'on tiba te juntl xu'j? Ma nc'ame jun tkanil mya ba'n te teya, 7cyja'tzun, taj meltz'aja ex k'manxa te Jeroboam: Ate Kman aju Cydios aj Israel ma tma cyja': Akine in etz k'inte teya cyxol tnam xjal, ex oc nk'o'ne te nejenel cye aj Israel aju tnam etzan wu'ne. 8El wi'ne ju cawbil cye tiyjil David ex xi nk'o'ne teya. Pero minti' ma tz'oca ic tza'n te David aju nmajene, e japun ke nmandamyente tu'n ex oc lpe' wi'je tu'n tcyakil tanmi, ex tz'aklxix e ela ke tbinchben tuj nwitze; 9nimxix mya ba'n ma tbinchaya cywitz ke cawil e ten ojtxi; ma tbinchaya txkantl tdiosa ex ke tilbilal in che bant ti'j c'uxbil in cub ulj tu'n k'ak', ex ma chin el tic'una. Tu'n tcyakil jlu ma tzaj nk'oje ti'ja. 10Cyja'tzun, ctzajel wi'ne mya ba'n cyibaj tiyjila: Che najel wu'ne cycyakil ke tiyjila xinak ate' cyxol aj Israel; mi jun cyjel ank'in; te jumajx che najel wu'ne ic tza'n in baj tz'iset tz'is. 11Akeju tiyjil Jeroboam che cymel tuj tnam, che xel chyo'n cyu'n tx'yan; ex akeju che cymel tuj cojbil, che xe'l chyo'n cyu'n c'utz, porque akine ma chin k'mante jlu, chi Kman. 12Atzun teya xu'j, taja tjaya. Nok o'cx oc tocxa tuj tnam, cymel aju tala, 13ex cycyakil aj Israel che ok'el ti'j, ex cbelex cymaku'n; o'cxcu jun tiyjil Jeroboam lu cbelex maku'n, porque cyxol cycyakil tiyjil Jeroboam, o'cxcu ju k'a lu ma tzalaj Kman ti'j, aju Cydios aj Israel. 14Te tibajxi jlu c'oquel tk'o'n Kman juntl rey cyxol aj Israel ex che cymel tiyjil Jeroboam tu'n tuj k'ij lu, ex bi'x cbantel tu'n ja'lo. 15che cbajel tchito'n Kman ke aj Israel ic tza'n jun nima in baj tyucun ke tkan ajlaj. Che jawitz tbako'n tuj tbanil tx'otx' aju xi tk'o'n cye cyxe'chel, ex che elex tlajo'n max ti'jxi nima Éufrates, porque ma tzaj nim tk'oj Kman cyi'j tu'nju ma cub cybincha'n tilbilal xu'j dios Asera. 16Che cyjel colin ke aj Israel tu'n Kman tu'n cylaj ke il ma tbincha Jeroboam ex ma che binchan aj Israel il tu'n, chi Ahías, xi tma'n. 17Jawtzun we' t-xu'jil Jeroboam ex aj tja tuj Tirsa; ex matok nno'cx ttzi tja tej tcyim tal. 18Cycyakil aj Israel e je'x makulte ex e ok' ti'j, ic tza'nx otok tma Kman te Ahías aju t-sanjel. 19Aju ch'intl tx'olbaben ti'j Jeroboam, tuc'ix cyi'j ke k'oj e oc tu'n ex ti'j aju baj tuj tcawbil, atzun tz'iban tuj u'j jatum ta' tcyakil tx'olbaben ti'j cyak'unben ke rey cye aj Israel. 20O cawin Jeroboam 22 abk'i, ex tcyimlenxi, atzun Nadab aju tcy'ajal o cawin te t-xel. 21O cawin Roboam aju tcy'ajal Salomón tuj Judá. Otok japun twi' 41 abk'i tej ttzyet tcawin, ex o cawin wuklaj abk'i tuj Jerusalén aju tnam jaw t-sc'o'n Kman cyxol cycyakil c'loj cyiyjil aj Israel tu'ntzun tten tbi tuj. Aju ttxu' Roboam Naama tbi ex aj Amón. 22Pero ke cybinchben tiyjil Judá mya ba'n ela tuj twitz Kman, ex mas nim tk'oj tzaj cyu'n twitzju tk'oj otok tzaj nej tu'n tcyakilju il otok cybincha cyxe'chel; 23ax icx cye jaw cybincha'n ke ja te cyc'ulbil xjal mya nimal Dios ke, ex jaw cywalba'n ke abj ex ke tronc xjansamaj cyu'n, cywi' cycyakil tal witz ex cyjak' cycyakil tze' pin cyxak. 24Ax icx tuj ju tx'otx' lu at ke xinak in che yaẍin ax tuc'il juntl xinak, ex a jlu in cybincha'n te jun c'ulbil cywitz tilbilal, ex in cybincha'n tcyakil mya ba'n aju in cybincha'ntok ke nasyon mya nimal Dios ke, akeju otok che ex tlajo'n Kman cywitz aj Israel. 25Tuj tjwe'yin abk'i ttzyetlen tcawin Roboam, oc tzokpaj Sisac aju rey te Ejipt ti'j tnam Jerusalén, 26ex xi ti'n ke k'inumabl ate' tuj tja Kman ex tuj tja rey. Tcyakil ex ti'n, cyuc'ix cycyakil makbil k'an pwak cytx'otx'il, akeju e cub tbincha'n Salomón. 27Te cyxel ke jlu cub tbincha'n rey Roboam ke makbil k'an c'uxbil cytx'otx'il, ex e cyaj tk'o'n tuj cycwent ke nejenel cye ke xk'ukil tja jatum in cawin. 28Ex tcyakil maj oc t-xi' rey tuj tja Kman, akeju xk'ukil in xi cyi'n ke makbil, ex nna'jtz cyi'n juntl maj tu'n cypon tuj ja jatum c'u'n ke. 29Aju ch'intl tx'olbaben ti'j Roboam, tuc'ix tcyakil aju tbincha, atzun tz'iban tuj u'j jatum ta' tcyakil tx'olbaben cyi'j cyak'unben ke rey te Judá. 30Cucx o ten k'oj cyxol Roboam tuc'il Jeroboam. 31Tejtzun tcyim Roboam cu'x maku'n cyxol ke ktzan t-xe'chel tuj tnam Ttanmi David tbi. Naama tbi ttxu' ex aj Amón. Te tibajxi, aju o cawin te t-xel atzun Abiam aju tcy'ajal.

will be added

X\