1 REYES 12

1Xi'tzun Roboam tuj Siquem, tu'nju otok che pon cycyakil aj Israel ma chixin tu'n toc cyk'o'n te rey. 2Maxtok ta' Jeroboam aju tcy'ajal Nabat tuj Ejipt, jatum otok pon tej tel ok twitz rey Salomón ex ax otok cyaj ten najal. Tejtzun tbinte Jeroboam ka otok cyim rey Salomón, ajtz meltz'aj tuj Ejipt. 3Xi txocbaj Jeroboam cyu'n aj Israel, ex cycyakil e je'x yolil tuc'il Roboam ex xi cyma'n te cyja': 4—Aju tley ktzan tmana cyuwxix cub tk'o'n kibaje, atzun teya mi'n cub tk'o'na ak'untl cyuwxix kibaje, ex k'in ela aju ley ponin ta'w wen cub tk'o'n ktzan tmana kibaje; ka ma txi tnimana kyole, octzun ko ajbele teya, che chi. 5Xitzun ttzak'we'n Roboam: —Cyxi'ye, ex bix che ule wuc'ile juntl maj tujxi ox k'ij, chi Roboam. E ajtzun ke xjal. 6Xi tkanin rey Roboam jun tumlal cye ke tij xjal, akeju otok che ajben te Salomón aju ktzan tman tej itz'xtok, ex tma: —¿Alcye nconseje ctzajel cyk'o'ne tu'n t-xi ntzak'we'ne cye ke xjal lu? 7Atzun cye tij xjal xi cyma'n te: —Ka ma tak' tiba tu'n tajbena cye xjal lu, ex ka ma txi tk'o'na jun mejor tzak'webl cye, octzun che ajbel teya te jumajx. 8Pero ate Roboam minti' xi tniman cyconsej ke tij xjal, xi' kanil tconsej cyuc'il ke cu'xun akeju junx e ch'iy tuc'il ex in che ajben te, 9chi cyja': —¿Alcye nconseje ctzajel cyk'o'ne tu'n t-xi ntzak'we'ne cye xjal lu? Porque ma cykani weye tu'n mi'n tcub nk'o'ntle ak'untl cyuwxix cyibaj, ic tza'n ju ak'untl cub tk'o'n ktzan nmane. 10Atzun cye cu'xun, akeju junx e tzaj ch'iy tuc'il, xi cytzak'we'n: —K'manxa cye xjal lu, akeju ma tzaj cykanin teya tu'n mi'ntl tcub tk'o'na ak'untl cyuwxix cyibaj ic tza'n cub tk'o'n ktzan tmana, atzun teya k'manxa cye cyja': Ka cyuwxix o cawin ktzan nmane, atzun weye masxix c'ic'el wu'ne ic tza'n te; 11cyuw tcawbil ktzan nmane cub tk'o'n cyibaje, atzun weye c'ic'el mastl wu'ne ic tza'n te; xi tjato'n ti'j cyc'u'je tu'n asyal, atzun weye cxel njato'ne ti'j cyc'u'je tu'n tz'u'm xpaltx'imaj tocx c'uxbil ttxa'n, chicuya cye, che chi cu'xun. 12Tujtzun toxin k'ij xi' juntl maj Jeroboam cyuc'ix cycyakil tnam xjal aj Israel, tu'n cyyolin tuc'il Roboam ic tza'nx otok tma cye. 13Atzunte rey xi tma'n jun yol cyuwxix cye xjal, porque minti' xi tniman aju consej otok tzaj cyk'o'n ke tij xjal te, 14ex ax yol xi tma'n ic tza'n consej otok tzaj cyk'o'n cu'xun te, ex chi xi tma'n cyja': Cub k'o'n ak'untl cyuwxix cyibaje tu'n ktzan nmane, atzun weye cbel nk'o'ne mas cyuwxix wen; o txi jato'n cyasyale tu'n ktzan nmane, atzun weye cxel njato'ne cyasyale tu'n tz'u'm xpaltx'imaj tocx c'uxbil ttxa'n, chi rey. 15Minti' xi tniman rey cyyol xjal porque otok bant ti'j tu'n Kman icju, tu'ntzun tjapun aju yol otok txi ttziyan te Jeroboam aju tcy'ajal Nabat, tej ttzaj k'ma'n te tu'n Ahías aju aj Silo. 16Tejtzun cyque'yinte cycyakil xjal aj Israel minti' xi niman cyyol tu'n rey, xi cyma'n te: Minti' ke koclen ti'j tiyjil David. Minti' ke kxilen tuc'il tcy'ajal Isaí. Akeye aj Israel cu cyaje cyjaye, e toc cycwentin cyib ke xjal at cyxilen tuc'il David, che chi xjal. Texju or lu e aj meltz'aj aj Israel cyja. 17Atzun ke aj Israel akeju najl cyuj ke tnam ate' tuj Judá, cucx e cyaj ten tjak' tcawbil rey Roboam. 18Tej t-xi t-sama'n Roboam ju xjal Adoram tbi, aju toc te nejenel ti'j ak'untl lajwers in che oc k'o'n xjal ti'j, cycyakil aj Israel e oc ten xo'l abj ti'j, ex bi'x cyim cyu'n. Jaxtzun naj rey Roboam tuj tcarwaj ex xi ok tuj Jerusalén. 19Cyja'tzun tten e je'tz aj Israel tjak' cycawbil ke tiyjil David, ex cucx cyten ja'lo. 20Tej cybinte aj Israel ka otok tzul meltz'aj Jeroboam tuj ttanmi, xi' mandar ti'j tu'n tul cyuc'il ex oc cyk'o'n te rey cye cycyakil aj Israel. Misicyer jun c'loj xjal cucx tu'n t-xi tk'o'n tib tjak' cycawbil tiyjil David, nok o'cx jun c'loj, aju tiyjil Judá. 21Tejtzun tpon Roboam tuj Jerusalén e baj tchmo'n jun syent tuc'il 80 mil soldad, akeju sc'o'maj cyxol cycyakil tiyjil Judá ex cyxol ke tiyjil Benjamín, tu'n cyk'ojin cyi'j aj Israel, ex tu'n tcawin juntl maj Roboam cyibaj. 22Pero o yolin Dios tuc'il Semaías aju t-sanjel, ex xi tma'n te cyja': 23K'manxa te Roboam aju rey te Judá, aju tcy'ajal Salomón, ex k'manxa cye cycyakil tiyjil Judá ex cye tiyjil Benjamín ex cye mastl xjal: 24Chitzun Kman cyja': Mi'n che'xe k'ojlel cyi'j aj Israel akeju cyermaniye. Ba'n tu'n cyaj meltz'aj cycyakil xjal cyja, porque wu'ne ma che el npa'ne ke aj Israel cyi'je. Tejtzun cybinte aju yol tzaj tma'n Kman, e ajtzun meltz'aj cyja ic tza'nx otok tma Kman cye. 25Jaw tbincha'n Jeroboam juntl maj muro ti'j tnam Siquem ex baj tcyuwsa'n, aju max ta' tuj tiwitz tx'otx' te Efraín, ex o najan tuj. Ax icx jaw tbincha'n juntl maj muro ti'j tnam Penuel ex baj tcyuwsa'n. 26Pero cub t-ximan Jeroboam cyja': Mya yaj jacu che cawin juntl maj ke tiyjil David cyibaj aj Israel. 27Ka cucx ma che'x xjal tuj Jerusalén k'ol chojbil tuj tja Kman, jaculo ke' juntl maj cyc'u'j ti'j Roboam aju rey te Judá tu'n cyten juntl maj tuc'il, ex jaculo chin cub byo'ne cyu'n, chi Jeroboam. 28Tbajlenxi tkanin Jeroboam tconsej cye ke xjal, baj tbincha'n cabe tilbilal tal wacẍ k'an pwak cytx'otx'il, ex xi tma'n cye tnam xjal: Akeye aj Israel, ya mi'n che'xtle c'ulul tuj Jerusalén. Lu ke cydiose lu, aju etz k'inte cyeye tuj Ejipt. 29Cubtzun tk'o'n jun tilbilal wacẍ tuj tnam Betel ex juntl tuj tnam Dan. 30Cyu'ntzun ke tilbilal lu e binchan aj Israel il, porque in che'xtok ke xjal tuj Betel ex max tuj Dan tu'n cyc'ulun cywitz ke tilbilal. 31Ax icx e jaw tbincha'n ke ja te c'ulbil cywi' ke witz, ex e jaw t-sc'o'n ke pal cyxol mastl xjal mya aj Leví ke. 32Ax icx cub xe't jun nink'ij tu'n ma' toclen, tuj olaj tajlal k'ij te twajxakin xjaw, ic tza'nx jun nink'ij in ic'set tuj Judá, ex ax Jeroboam in xi k'onte chojbil twi altar. Atzun jlu o bant tu'n tuj Betel, xi tk'o'n chojbil cye ke tilbilal tal wacẍ akeju otok che baj tbincha'n, ex e oc tk'o'n ke pal tu'n cyten cyuj ke ja te c'ulbil. 33Cyja'tzun, tuj olaj tajlal k'ij te twajxakin xjaw, xi tk'o'n Jeroboam chojbil twi altar aju otok jaw tbincha'n tuj Betel. Atzun xjaw lu oc te nink'ij aju tu'nx Jeroboam cub t-ximan tu'n tbinchet, ex xi tma'n cye aj Israel ka ma' toclen ju nink'ij te cye, ex jax jatum ta' ju altar tu'n tcub tpatun storac.

will be added

X\