1 REYES 11

1Mya o'cx te tme'jel Faraón o tc'ujla Salomón, ax icx o tc'ujla nimcu xu'j stranjer xjal: at xu'j aj Moab, at aj Amón, at aj Edom, at aj Sidón ex at aj Hetey; 2akeju xu'j lu atzun e tzaj cyuj keju nasyon akeju otok tma Kman cye ke aj Israel cyja': Mi'n che moje'ye cyuc'il ke xu'j lu, porque che elel tzpete cyu'n ex che oquel lpe'ye cyi'j ke cydios, chi Dios. Atzunte Salomón tzaj tgan cyi'j ex jaw moje' cyuc'il. 3Ten wuk syent t-xu'jil oc cyoclen te tnejel t-xu'jil, ex ten ox syent t-xu'jil oc cyoclen te tcab t-xu'jil, ex cyu'ntzun ke xu'j lu el tzpet. 4Tejtzun ttijin Salomón el tzpet tnabl cyu'n ke t-xu'jil, ex oc ten c'ulul cywitz ke tilbilal nno'c cydiosin xjal, porque minti' o niman te Kman aju Tdios tu'n tcyakil tanmi ic tza'n otok tbincha David aju ktzan tman. 5Oc ten Salomón c'ulul twitz tilbilal xu'j dios Astoret aju cydios aj Sidón, ex twitz Milcom aju tilbilal puro ic'bilxix aju cydios aj Amón. 6Cyja'tzun mya ba'n ela ke tbinchben Salomón tuj twitz Kman, porque minti' o japun tajbil Kman tu'n ic tza'n otok tbincha David aju ktzan tman. 7Jaw tbincha'n Salomón jun ja twi witz tcub tuj tjawitz k'ij te Jerusalén, ex ajben te c'ulbil te Quemos aju tilbilal puro ic'bilxix aju cydios aj Moab, ex jun te Moloc aju tilbilal puro ic'bilxix aju cydios aj Amón. 8Ax icx o tbincha cye cycyakil ke t-xu'jil stranjer xjal ke, akeju in che'x k'onte storac ex chojbil cye ke cydios. 9Atzunte Kman aju Cydios aj Israel tzaj tk'oj ti'j Salomón, porque otok tz'el tpa'n tib ti'j masque otok cub tyec'un tib cab maj twitz, 10ex otok tma te tu'n mi'n tc'ulun cywitz txkantl dios. Masque icju, pero minti' xi tbi'n Salomón aju otok tma Kman te. 11Cyja'tzun tzaj tma'n Kman te Salomón: Tu'nju ma tbinchaya icju, minti' ma japun tu'na aju yol cyaj bant ti'j wu'ne tuc'ila, ax icx minti' ma che japun tu'na ke ley xi nma'ne teya, c'elel wi'ne cawbil tuj tk'aba ex cxel nk'o'ne te jun cye keju in che ajben teya. 12Masque icju, nok tu'nju at nc'ujlalile ti'j David aju ktzan tmana, mlay nbinchaye jlu acux itz'xa; pero c'elel wi'ne cawbil tuj tk'ab tcy'ajala. 13Mlay tz'el wi'ne tcyakil cawbil tuj tk'ab tcy'ajala; cyjel nk'o'ne jun c'loj cyiyjil aj Israel tuj tcwent, nok tu'nju at nc'ujlalile ti'j ktzan nmajene David ex ti'j tnam Jerusalén, aju tnam o jaw nsc'o'ne, chi Dios te Salomón. 14Ex tu'n Dios o ten jun aj k'oj ti'j Salomón, Hadad tbi, aju aj Edom ex cyiyjil ke rey te Edom. 15Tej tcub cyi'j aj Edom tu'n David, xi' Joab aju nejenel cye soldad makulte cye keju otok che cyim tuj k'oj, ex e cub tbyo'n cycyakil xinak aj Edom; 16kak xjaw cyaj ten Joab ma chixin, cyuc'ix cycyakil soldad aj Israel, tejxi cynaj cycyakil ke xinak aj Edom cyu'n. 17Atzunte Hadad matok c'wa'lx, xi ok tuj Ejipt cyuc'il junjun aj Edom, akeju in che ajbentok te tman. 18E je'x tuj Madián ex e pon tuj Parán, atzun xi cyi'n junjun xinak tu'n cyxi' cyuc'il. E pon tuj Ejipt ex e je'x tuc'il Faraón aju rey te Ejipt, atzunte rey xi tk'o'n cyja, cywa, ex cytx'otx'. 19Atzunte Hadad ba'n ela tmod tuj twitz Faraón, cyja'tzun xi tk'o'n Faraón titz'in Tahpenes aju t-xu'jil, tu'n toc te t-xu'jil Hadad. 20Tzajtzun jun tcy'ajal Hadad ti'j titz'in Tahpenes, Genubat tbi oc. Ate c'wa'l lu ax o ch'iy tuj tcwent Tahpenes tuj tja rey Faraón, junx cyuc'il keju tex tal. 21Tej tbinte Hadad max tuj Ejipt ka otok cyim David, ax icx otok cyim Joab aju nejenel cye soldad, xitzun tma'n Hadad te Faraón cyja': —K'ontza ambil weye tu'n waj meltz'aje tuj ntanmiye. 22Atzunte Faraón xi ttzak'we'n: —¿Tiku'n tajbila tu'n taj meltz'aja tuj ttanmiya? ¿Atpe jun ti'xti atx taj teya wuc'ile? Xi ttzak'we'n Hadad: —Minti' jun ti'xti atx taj weye, pero in chin cubsane twitza tu'n ttzaj tk'o'na ambil tu'n waj meltz'aje. 23Ax icx tu'n Dios o ten juntl aj k'oj ti'j Salomón, Rezón tbi, aju tcy'ajal Eliada. Otok tz'el ok Rezón ti'j tpatrón Hadad-ezer tbi, aju rey te Soba. 24Tej cycub tbyo'n David ke xjal tuj Soba, baj tchmo'n Rezón junjun xinak ex a oc te nejenel cye tu'n cyk'ojin. Xi' Rezón tuj Damasco, atzun o ten ex oc k'o'n te rey. 25Tuj tcyakil tank'ibl Salomón oc Rezón te aj k'oj ti'j, ic tza'n in tbincha'ntok Hadad, porque nimxix o ic'un cyi'j aj Israel. Cyja'tzun tten, oc Rezón te rey tuj Siria. 26Ax icx te Jeroboam, aju attok toclen ttxlaj Salomón, jaw ti'n tib tu'n tk'ojin ti'j rey. Ate Jeroboam tcy'ajal Nabat ex tiyjil Efraín, ex aju ttanmi Sereda tbi. Aju ttxu', Zerúa tbi ex meba xu'j. 27Aju t-xilen tk'oj Jeroboam ti'j rey atzun jlu: In baj tnojsa'ntok Salomón ke jul tu'n toc te chk'ajlaj, ex nibantok tjaw ttz'aksa'n ju muro ti'jele tnam aju toc tbi Ttanmi David, 28ex ate Jeroboam at tipun ex tk'on tib tuj ak'untl. Tejtzun tque'yinte Salomón aju cu'xun lu puro sec' tnabl, oc tk'o'n te nejenel ti'j ak'untl in bant cyu'n cycabil c'loj tiyjil José. 29Tujtzun tk'ijlalil lu, at jun k'ij ex Jeroboam ti'jxi tnam Jerusalén, ex oc tc'ulban tib tuj be tuc'il Ahías aju aj Silo, aju t-sanjel Dios, toc jun t-ẍjo'w ac'aj, ex cyjunalx ate'tok tuj cojbil. 30Eltzun ti'n Ahías aju t-ẍjo'w toc ti'j, ex cub t-sbit'un; te cablaj piẍ ela tu'n, 31ex xi tma'n te Jeroboam cyja': K'inx laj piẍ teya, porque ate Kman aju Cydios aj Israel in tma'n cyja': C'elel wi'ne cawbil tuj tk'ab Salomón, ex cxel nk'o'ne laj c'loj cyiyjil aj Israel teya. 32Atzun te Salomón, nok jun c'lojx cyjel nk'o'ne nok tu'n tlaj nmajene David, ex nok tu'n tlaj tnam Jerusalén, aju tnam sc'o'maj wu'ne cyxol cycyakil c'loj cyiyjil aj Israel. 33Porque ma chin el ic'une cyu'n, ex ma che oc ten c'ulul twitz tilbilal xu'j dios Astoret aju cydios aj Sidón, ex twitz Quemos aju cydios aj Moab, ex twitz Milcom aju cydios aj Amón. Mya ba'n ma tz'e'la cybinchben tuj nwitze, ex minti' ma che japun ke nleye ex ke nmandamyente cyu'n, ic tza'n te David aju ktzan tman Salomón o japun tu'n. 34Pero mi'n tz'el baj wi'ne tcyakil tcawbil, cucx ctel toclen te rey, ex maxi c'elel toclen ocxi tcyim, nok tu'n tlaj nmajene David aju jaw nsc'o'ne, ex o che japun ke nmandamyente ex ke nleye tu'n. 35C'elel wi'ne cawbil tuj tk'ab tcy'ajal, ex cxel nk'o'ne laj c'loj cyiyjil aj Israel teya. 36Nok jun c'loj cyjel nk'o'ne te tcy'ajal Salomón, tu'n mi'n tcub yupj tiyjil David tuj Jerusalén aju tnam jaw nsc'o'ne tu'n ttzaj na'n nbiye tuj. 37Ex aya c'oquel te rey wu'ne tu'n tcawina tibaj tcyakil nok nic'punx taja, ex tu'n toca te cyrey aj Israel. 38Ka ma japun tu'na tcyakilju cxel nma'ne teya, ex ka ba'n ma tz'e'la ke tbinchbena tuj nwitze, ex ka ma che japun ke nleye ex ke nmandamyente tu'na, ic tza'n o japun tu'n David aju nmajene, chin teltzune tuc'ila, ex oc tcyima, cucx che jawil nsc'o'ne ke tiyjila tu'n cyoc te rey, ic tza'n cyaj bant ti'j wu'ne tuc'il David; ex che tel ke aj Israel tjak' tcawbila. 39Atzun ke mastl tiyjil David, cbel nk'o'ne cycastiw nok tu'n tlaj il ma tbincha Salomón, pero mya te jumajx, chi Dios teya, chitzun Ahías xi tma'n te Jeroboam. 40Tu'ntzun jlu, oc tilil tu'n Salomón tu'n tcub byo'n Jeroboam tu'n; pero xi ok Jeroboam tuj Ejipt, o pon tuc'il Sisac aju rey te Ejipt, ex atzun o cyaj ten ma chixin tejxi tcyim Salomón. 41Aju ch'intl tx'olbaben ti'j Salomón ex ju tnabl, tuc'ix tcyakilju o tbincha, atzun tz'iban tuj u'j jatum ta' tcyakilju tx'olbaben ti'j tak'unben Salomón. 42O ten Salomón te rey tuj tnam Jerusalén 40 abk'i, ex o cawin cyibaj cycyakil aj Israel. 43Tej tcyim, atzun cu'x maku'n tuj tnam toc tbi Ttanmi David aju ktzan tman. Ex a Roboam aju tcy'ajal cyaj ten te rey te t-xel.

will be added

X\