1 Juan 5

1Cycyakil keju in xi cyocsla'n ka ate Jesús ju Crist aju at toclen tu'n Dios, atzun ke tc'wa'l Diosju; ex cycyakil keju c'ujla'n Mambaj cyu'n, ax icx c'ujla'n ke tc'wa'l Mambaj cyu'n. 2Ka c'ujla'n Dios ku'n ex ka ma che japun ke tmandamyent ku'n, tu'ntzunju nne'l knic' ti'j ka c'ujla'n ke tc'wa'l Dios ku'n. 3Ka c'ujla'n Dios ku'n, che japunel ke tmandamyent ku'n; ex ke tmandamyent mya cyuw ke. 4Porque cycyakil keju ma che oc te tc'wa'l Dios, in cub ti'j ju mya ba'n cyu'n, aju at twitz tx'otx'. Cyja'tzun tten nok tu'nju kocslabl in cub ti'j mya ba'n ku'n, aju at twitz tx'otx'. 5¿Alcyetzunju in cub ti'j mya ba'n tu'n, aju at twitz tx'otx'? ¿Myapetzun aju in xi tocsla'n ka ate Jesús Tc'wa'l Dios? Atzunju. 6Ate Jesucrist ul, o byan tuj a' ex el tchc'el twitz crus; mya nok o'cx o byan tuj a', ax icx el tchc'el. Axju Xewbaj Xjan testiw ti'j jlu, porque aju Xewbaj Xjan ax toc tyol. 7At ox testiw [tuj cya'j in che yolin ti'j jlu, ex atzun ke jlu: Mambaj, tuc'ix ju Yol, tuc'ix Xewbaj Xjan; akeju ox testiw lu junx cyten. 8Ex at ox testiw twitz tx'otx'], ex atzun ke jlu: Aju Xewbaj Xjan, tuc'ix ju a', ex ju tchc'el Jesucrist; ex akeju ox lu ax yol in cyma'n. 9Ka ma txi kocsla'n aju cyyol xjal, yajtzun tyol Dios, ¿myapetzun mas ma' toclen tu'n t-xi kocsla'n? Porque atzun tyol Dios jlu tzaj tchic'ba'n ti'j Tc'wa'l. 10Alcye ma tz'ocslan ti'j Tc'wa'l Dios, in tna'n tuj tanmi ka ax toc tyol Dios. Alcye minti' ma txi tocsla'n tyol Dios, nno'c Dios nic'al yol tu'n, porque minti' ma txi tocsla'n tyol Dios aju tzaj tchic'ba'n ti'j Tc'wa'l. 11Atzunju yol lu tzaj tchic'ba'n Dios ke: Ma tzaj tk'o'n Dios kchwinklal te jumajx, ex aju chwinklal lu tu'nju Tc'wa'l in tzaj tk'o'n. 12Alcye at Tc'wa'l Dios tuc'il, at tchwinklal; pero alcye minti' Tc'wa'l Dios tuc'il, minti' tchwinklal. 13Tcyakil jlu ma txi ntz'ibane cyeye, akeye ma che ocslane ti'j Tc'wa'l Dios, tu'ntzun tke'xix cyc'u'je ti'j ka at cychwinklale te jumajx. 14Ka at jun ma txi kkanin te Dios ic tza'nx ju tajbil, in ko tzaj tbi'n, cyja'tzun tten in ke'xix kc'u'j ti'j. 15Ba'n ku'n in tzaj tbi'n Dios alcyeju ma txi kkanin te; cyja'tzun ax icx ba'n ku'n in kc'mo'n aju ma txi kkanin te. 16Ka at jun ocslal ma til in binchan terman il, mya jun il in tzaj camic tu'n, ba'n tu'n tcubsan twitz Dios ti'j terman, ex ctzajel tk'o'n Dios tchwinklal terman; in xi nma'ne jlu cyi'j keju in che binchan il, ka mya jun il in tzaj camic tu'n. At il in tzaj camic tu'n. Minti' in xi nma'ne tu'n kcubsan twitz Dios ti'j jlu. 17Tcyakilju mya ba'n in kbincha'n, atzun ilju; pero at il minti' in tzaj camic tu'n. 18Ba'n ku'n, akeju ma che oc te tc'wa'l Dios mya cucx in che binchan il; porque cwentin ke tu'n Tc'wa'l Dios, ex minti' in che tzyet tu'n tajaw il. 19Ba'n ku'n, te Dios ko', ex cycyakil xjal twitz tx'otx' ate' tjak' tipumal tajaw il. 20Ex ba'n ku'n, o tzul aj Tc'wa'l Dios ex ma tzaj tk'o'n knabl tu'n kojtzkinte alcyeju Dios axix toc. Ax ato' tuc'il ju Dios axix toc, ex tuc'il Jesucrist aju Tc'wa'l. Atzunte Diosju axix toc ex k'olte kchwinklal te jumajx. 21Akeye tal nc'wa'le, ten cycwente cyi'je tu'n mi'n cyc'ulune cywitz ke tilbilal. Icxwitju.

will be added

X\