1 Juan 4

1Akeye erman at nc'u'je cyi'je, mi'n txi cyocsla'ne cyyol cycyakil pacbal yol in cyma'n ka tu'n Dios sama'n ke, nok o'cx cyk'o'nque cwent cyi'j, tu'ntzun tel cynic'e cyi'j ka te Dios ke ex ka mi'n. Porque nimcu pacbal nic'al yol in che bet cyxol xjal, in cyma'n ka tu'n Dios sama'n ke. 2Pero c'eleltzun cynic'e ti'j ka ax toc tu'n T-xew Dios in che yolin; porque cycyakil pacbal yol, ka in cychic'ba'n ka ax toc xjal te Jesucrist tej tul tzalu twitz tx'otx', entons te Dios xjal lu. 3Pero cycyakil pacbal yol, ka in cyma'n, mya ax toc xjal te Jesucrist tej tul tzalu twitz tx'otx', myatzun te Dios xjal lu. Atzun in tzaja ju yol lu tuc'il ju aj k'oj ti'j Crist, aju o cybiye ka tzul; ex lu at cyxol xjal ja'lo. 4Akeye tal nc'wa'le, te Dios keye ex ma cub cyi'j pacbal nic'al yol cyu'ne; porque mas ma' toclen Dios aju at tuj cyanmiye twitz ju tajaw il at cyxol xjal. 5Cye xjal ke, cyja'tzun in che yolin ti'j ju cye xjal, ex in xi cybi'n xjal cyyol. 6Atzun ke te Dios ko'. Aju xjal ojtzki'n Dios tu'n, in xi tbi'n kyol; atzunju xjal mya te Dios, minti' in xi tbi'n kyol. Cyja'tzun nne'l knic' ti'j alcyeju in yolin ax toc ex alcyeju minti' in yolin ax toc. 7Akeye erman at nc'u'je cyi'je, kc'ujlam kib kxolx, porque aju kc'ujlalil te Dioste; ex cycyakil keju at cyc'ujlalil, tc'wa'l Dios ke ex ojtzki'n Dios cyu'n. 8Alcye minti' tc'ujlalil, na'nx tel tnic' ti'j Dios, porque ate Dios at tc'ujlalil. 9Tu'n jlu ma tzaj tyec'un Dios tc'ujlalil ki'j; tu'nju tzaj t-sama'n Dios o'cxcu jun Tc'wa'l, ul tzalu twitz tx'otx' tu'ntzun tten kchwinklal nok tu'n. 10Tu'ntzun jlu nne'l knic' ti'j ju tc'ujlalil: Mya akeko' ma ko c'ujlante Dios, nok o'cx ate Dios ma ko tc'ujla ex tzaj t-sama'n aju Tc'wa'l tu'n toc te chojbil kil. 11Akeye erman at nc'u'je cyi'je, ka ic tten tc'ujlalil Dios ki'j, ax icx ke kc'ujlam kib kxolx. 12Mi jun xjal o til twitz Dios, pero ka ma kc'ujla kib kxolx, axtzun najl Dios tuj kanmi, ex aju tc'ujlalil Dios ma tz'aket-xix tuj kanmi. 13Tu'ntzun jlu nne'l knic' ti'j ka ax najl ko' tuc'il Dios, ax icx te najl tuj kanmi, porque ma tzaj tk'o'n Dios aju T-xew ke. 14Ax ko'ye ma kile ex in xi kchic'ba'ne ma tzaj t-sama'n Kman Dios aju Tc'wa'l tu'n toc te Colol cye xjal. 15Alcye in tchic'ba'n ka ax toc Tc'wa'l Dios te Jesús, ax najl Dios tuj tanmi, ax icx te ax najl tuc'il Dios. 16Cyja'tzun nne'l knic' ti'j tc'ujlalil Dios ki'j ex ma txi kocsla'n. Ate Dios at tc'ujlalil, ex alcyeju at tc'ujlalil tuj tanmi, ax najl tuc'il Dios, ax icx te Dios ax najl tuj tanmi. 17Tu'n jlu in tz'aket-xix kc'ujlalil tu'ntzun tke'xix kc'u'j oc tul tk'ijlalil jwisi; ex ckebil kc'u'j, porque ic tza'n tten Jesucrist, icxtzun ktenju tzalu twitz tx'otx'. 18Ka at kc'ujlalil mlay ko xob, porque ka tz'aklxix kc'ujlalil, tu'n jlu nne'l ti'n ju xobajil. Porque aju xobajil in tzaj tu'n tlaj ju castiw cyja' ttzaj; cyja'tzun alcye in xob, na'nx ttz'aket tc'ujlalil tuj tanmi. 19In kc'ujla'n Dios, porque tnejel ma ko c'ujlanjtz tu'n. 20Pero ka at jun xjal in tma'n: In nc'ujla'ne Dios, ka chi, ex ka nne'l tic'un terman, nic'al yol te; porque ka minti' in tc'ujla'n xjal terman aju nno'c tque'yin, ax mlay bant tu'n tc'ujlanjtz Dios tu'n, aju na'nx toc tque'yin. 21Ex atzun mandamyent jlu ma kc'am te Jesucrist, in tma'n: Alcyeju c'ujla'n Dios tu'n, ax icx c'ujlam terman.

will be added

X\