1 Juan 3

1Che ximane ti'j, ma'xix tc'ujlalil Kman Dios ki'j, porque ma tz'oc kbi tc'wa'l Dios, ex ax toc tc'wa'l Dios ko'. Cyja'tzun, minti' nne'l cynic' xjal ki'j, porque minti' nne'l cynic' ti'j Dios. 2Akeye erman at nc'u'je cyi'je, ma ko oc te tc'wa'l Dios ja'lo; ex na'nx ttzaj yec'un tza'n ko oquel. Pero ba'n ku'n, oc tyec'unte tib Jesucrist, ko oquel ic tza'nx te, porque oc kila' tza'n que'yin. 3Ex cycyakil keju in che ayon ti'j Crist ex k'ukl cyc'u'j ti'j, in sakix tuj tanmi, ic tza'n te Crist sak te. 4Cycyakil keju in che binchan il in che ic' tibaj tley Dios, porque ka ma ko ic' tibaj ley atzun ilju. 5Ba'n cyu'ne, ul aj Jesucrist twitz tx'otx' tu'n tel ti'n kil, atzun te minti' o binchan il. 6Cyja'tzun, aju xjal ax ta' tuc'il Crist minti' in binchan il; pero aju in binchan il bajx til xjal Crist ex bajx tz'el tnic' ti'j. 7Akeye tal nc'wa'le, cuchiwt tu'n mi'n cyel txalpuje tu'n juntl. Alcye in tbincha'n aju tz'aklxix, tz'aklxix te, ic tza'n te Crist tz'aklxix te. 8Pero alcyeju in binchan il, te tajaw il te; porque ate tajaw il binchan il tzajnix bant atxix t-xe tnejel. Tu'ntzun tlaj jlu ul aj Tc'wa'l Dios twitz tx'otx', tu'ntzun tcub xitj tcyakil tak'unben tajaw il. 9Jun xjal ka ax toc ma tz'oc te tc'wa'l Dios minti' in binchan il, porque tiyjil Dios te ex mlay bant cucx tu'n tbinchan il, porque tc'wa'l Dios te. 10Tu'ntzun jlu nne'l nic'baj cyi'j alcye ke tc'wa'l Dios ex alcye ke tc'wa'l tajaw il; porque tcyakilju minti' in tbincha'n aju tz'aklxix, myatzun te Diosju, ax icx mya te Dios aju minti' in tc'ujla'n terman. 11Porque atzunju yol lu o cybiye atxix t-xe tnejel: Tu'n kc'ujlante kib kxolx. 12Ex mi'n ko oc ic tza'n te Caín, te tajaw il te ex cub tbyo'n aju titz'in. ¿Tiku'ntzun cub tbyo'n? Porque mya ba'n aju tbinchben Caín, atzun te titz'in ba'n tbinchben. 13Erman, mi'n che labine ti'j ka ma che el ic'une cyu'n xjal. 14Ba'n ku'n ma ko etz tuj camic, ma ko ul tuj chwinklal porque in che kc'ujla'n ke erman. Alcye minti' in tc'ujla'n terman, ax ta' tuj camic. 15Aju xjal nne'l tic'un terman, byol xjal te; ex ba'n cyu'ne mi jun byol xjal ctel tchwinklal te jumajx. 16Ti'jtzun jlu nne'l knic' ti'j tc'ujlalil Dios, porque xi tk'on tib Jesucrist tu'n tcyim tu'n klaj; ax icx ke ba'n tu'n t-xi kk'on kib tu'n kcyim tu'n cylaj kerman. 17Pero ka at jun xjal nimcu at te tzalu twitz tx'otx', ex ka ma til xjal terman atx taj aju in ajben te, ex in cub t-xc'ayin, ¿tza'ntzun tten tu'n tmante ka at tc'ujlalil Dios tuj tanmi? 18Akeye tal nc'wa'le, mi'n kc'ujla kib nok tu'n kyol ex tu'n ktzi'; nok o'cx kc'ujlam kib tu'n kbinchben ex ax tocwit kc'ujlalil. 19Tu'n jlu c'elel knic' ti'j ka ma ko oc lpe' ti'j ju yol axix toc, ex ckebilxix kc'u'j ti'j Dios. 20Porque ka ma tma kanmi ka mya ba'n in kbincha'n, ate Dios ma' toclen twitz ju kanmi, ex ojtzki'n tcyakil tu'n. 21Akeye erman at nc'u'je cyi'je, ka minti' in tma'n kanmi ka mya ba'n in kbincha'n, k'ukl kc'u'j ti'j Dios. 22Ex alcye ma txi kkanin te, ctzajel tk'o'n ke porque in che japun ke tmandamyent ku'n ex in kbincha'n aju ba'n nne'la tuj twitz. 23Ex atzunju tmandamyent jlu: tu'n t-xi kocsla'n Jesucrist aju Tc'wa'l Dios, ex tu'n kc'ujlante kib kxolx, ic tza'n k'ma'maj ke tu'n. 24Alcye in che japun ke tmandamyent tu'n, ax ta' tuc'il Dios, ex ax ta' Dios tuc'il. Cyja'tzun nne'l knic' ti'j ka ax najl Dios tuj kanmi, tu'nju Xewbaj Xjan ma tzaj tk'o'n ke.

will be added

X\