1 Akeye tal nc'wa'le, in xi ntz'ibane tcyakil jlu cyeye tu'ntzun mi'n cybinchane il. Pero ka at jun ma binchan il, at jun yolil k'ij tuc'il Kman Dios, ate Jesucrist aju tz'aklxix. 2 Oc Jesucrist te chojbil kil; mya o'cx tu'n tlaj kil, ax icx tu'n tlaj cyil cycyakil xjal. 3 Ka ma che japun ke tmandamyent Dios ku'n, tu'ntzunju in ke'xix kc'u'j ti'j ka ojtzki'n Dios ku'n. 4 Pero ka at jun xjal ma k'mante: Ojtzki'n Dios wu'ne ka chi, ex ka minti' in che japun ke tmandamyent Dios tu'n, nic'al yol te, ex aju yol axix toc minti' tuj tanmi. 5 Pero alcyeju in japun tyol Dios tu'n, ax toc at tc'u'j ti'j Dios ex ma tz'aket-xix tc'ujlalil. Cyja'tzun in ke'xix kc'u'j ti'j ato' junx tuc'il. 6 Alcye in k'mante ka ax ta' tuc'il Dios, il ti'j tu'n tbet ba'n ic tza'n o bet Crist. 7 Erman, mya ac'aj mandamyent aju in xi ntz'ibane cyeye; nok o'cx aju ojtxi mandamyent aju at cyuc'ile atxix t-xe tnejel. Aju ojtxi mandamyent, atzunju yol o cybiye atxix t-xe tnejel. 8 Masque ojtxi mandamyent in xi ntz'ibane cyeye, pero ac'ajx ta', ax toc ma japun tu'n Crist, ax icx cyeye tu'n tjapun cyu'ne, porque aju klolj ch'ix tic', ex aju spic'un ax toc ma tzul koptz'aj. 9 Ka at jun in k'mante ka at tuj spic'un ex ka nne'l tic'un terman, ax ta' tuj klolj. 10 Alcye jun xjal in tc'ujla'n terman ax ta' tuj spic'un, ex minti' jun mya ba'n tuj tanmi tu'n tjaw tolj ti'j. 11 Pero ka at jun nne'l tic'un terman, ax ta' tuj klolj ex in bet tuj klolj, ex minti' nne'l tnic' ti'j tza'n t-xi', porque ma tz'oc te moẍ tu'n klolj. 12 In xi ntz'ibane jlu cyeye, akeye tal nc'wa'le, porque o najset cyile tu'nju ocslal keye ti'j Jesucrist. 13 In xi ntz'ibane jlu cyeye, akeye mambaj, porque ojtzki'n Crist cyu'ne, aju at atxix t-xe tnejel. In xi ntz'ibane jlu cyeye, akeye cu'xun, porque ma cub ti'j tajaw il cyu'ne. In xi ntz'ibane jlu cyeye, akeye tal nc'wa'le, porque ojtzki'n Kman Dios cyu'ne. 14 In xi ntz'ibane jlu cyeye, akeye mambaj, porque ojtzki'n cyu'ne aju at atxix t-xe tnejel. In xi ntz'ibane jlu cyeye, akeye cu'xun, porque at cyipune, ex ma cyc'ame tyol Dios tuj cyanmiye, ex ma cub ti'j tajaw il cyu'ne. 15 Mi'n cyc'ujlaye aju achbil te twitz tx'otx', mi jun ti'xti mya ba'n at twitz tx'otx'. Ka at jun xjal in tc'ujla'n aju achbil te twitz tx'otx', minti' tc'ujlalil tuj tanmi ti'j Kman Dios. 16 Porque tcyakilju at twitz tx'otx', aju tajbil kchibjal mya ba'n, ex tcyakilju mya ba'n nno'c kque'yin ex in pon kc'u'j ti'j, ex aju knimbil kib tuj kchwinklal, myatzun te Kman Dios jlu, nok o'cx te twitz tx'otx'. 17 Cbajel ju twitz tx'otx' tuc'ix ju cyajbil xjal mya ba'n; atzunju xjal in tbincha'n tajbil Dios cyjel ten te jumajx. 18 Akeye tal nc'wa'le, atzunju mancbil tk'ijlalil ja'lo; ic tza'n o cybiye, tzul aju aj k'oj ti'j Crist, icxtzun ja'lo nimcu aj k'oj ti'j Crist ma che jaw jlet; cyja'tzun nne'l knic' ti'j ka atzun mancbil tk'ijlalil ja'lo. 19 Kxol ma che ex; pero mya kuc'il ke; porque nokwit kuc'il ke, axwitlo ma che cyaj ten kuc'il. Pero ma che ex tu'ntzun tyec'unjtz ka mya cycyakil ke kuc'il ke. 20 Atzun cyeye ma tz'oc k'o'n cyoclene tu'n Xewbaj Xjan, ex cycyakile ojtzki'n ju yol axix toc cyu'ne. 21 Minti' in xi ntz'ibane cyeye tu'nju minti'wt ba'n cyu'ne aju yol axix toc, nok o'cx tu'nju ojtzki'n cyu'ne; ex ba'n cyu'ne mya ti'j ju yol axix toc in tzaj ju nic'aj yol. 22 ¿Alcyetzunju nic'al yol? ¿Myapetzunju in tma'n ka mya ate Jesús ju Crist, aju at toclen tu'n Dios? Atzun jlu aj k'oj ti'j Crist, porque nne'l tic'un xjal Kman Dios tuc'ix Tc'wa'l. 23 Aju xjal ic'un Tc'wa'l Dios tu'n, minti' Kman Dios tuc'il; pero alcye jun xjal in tchic'ba'n ka ax toc ocslal ti'j Tc'wa'l Dios, ax icx at Kman Dios tuc'il. 24 Aju yol o cybiye atxix t-xe tnejel, axwit cyaj ten tuj cyanmiye. Ka ma cyaj ten ju yol tuj cyanmiye, aju o cybiye atxix t-xe tnejel, ax icx che cyjel tene tuc'il Kman Dios ex tuc'il Tc'wa'l. 25 Ex atzun jlu o tzaj tma'n Jesucrist ke tu'n ttzaj tk'o'n aju kchwinklal te jumajx. 26 A jlu in xi ntz'ibane cyeye tu'n tel cynic'e cyi'j keju cyajbil tu'n cysbun cyeye. 27 Aju Xewbaj Xjan ma cyc'ame tu'n Jesucrist ax ta' tuj cyanmiye, ex mya il ti'j tu'n cyxnak'tzanjtze tu'n juntl; porque aju Xewbaj Xjan ma cyc'ame tu'n Jesucrist, in che xnak'tzanjtze tu'n tuj tcyakil, ax toc tyol ex mya nic'al yol te. Cyja'tzun, ax che cyaj tene tuc'il Crist, ic tza'n ma che xnak'tzanjtze tu'n. 28 Ja'lotzun, akeye tal nc'wa'l, ax che cyaj tene tuc'il Crist, tu'ntzun tke'xix kc'u'j ti'j oc tyec'unte tib, ex tu'n mi'n kch'ixwi twitz oc tul. 29 Ba'n cyu'ne ka tz'aklxix te Crist, ax icx tz'elx cynic'e ti'j, aju xjal in tbincha'n aju tz'aklxix, tc'wa'l Dios te.
Copyright ℗ 2000 Hosanna Grabado por Producciones Cristianas Vina