1 Corintios 8

1Atzun ja'lo tu'n kyolin ti'j chibj in xi k'o'n te oyaj cye tilbilal. Ba'n ku'n ex ojtzki'n jlu ku'n kcyakil, aju ojtzkibl in jaw kniman kib tu'n, atzunju c'ujlalil in ko ch'iy tu'n. 2Ka at jun xjal in tma'n ka ba'n tcyakil tu'n, minti' ch'in ba'n tu'n, atx taj tu'n tbant tu'n. 3Pero ka at jun xjal c'ujla'n Dios tu'n, atzunju ojtzki'n tu'n Dios. 4Ex atzunju chibj in xi kchyo'n ex otok cub k'o'n te jun oyaj cywitz tilbilal, ba'n ku'n, ke tilbilal minti' cyajben twitz tx'otx', o'cx jun Dios at, minti' juntl, 5masque at junjun toc cybi dios ka tuj cya'j ex ka twitz tx'otx', porque at nimcu cydios xjal ex nimcu cypatrón. 6Atzun ke, nok junx Kdios at, aju Mambaj, atzunju binchalte tcyakil, ex atzun tu'n kajben te. Ex junx Kajaw at, aju Jesucrist, nok tu'n o bant tcyakil, ex tu'n in ko ank'in. 7Pero mya cycyakil nne'l cynic' ti'j jlu, porque at junjun nak'l ke cyi'j ke tilbilal ojtxi, oc t-xi cychyo'n chibj cucx in che ximan ti'j ka otok cub k'o'n te oyaj cywitz tilbilal; tu'n jlu in tz'ilix tuj cyanmi, porque in jawje' cyc'u'j ti'j, ex na'nx tcyuwix cynabl. 8Porque mya tu'n chibj tu'n kc'met tu'n Dios; porque ka ma txi kchyo'n, mya tu'nju ko oquel mas ba'n, ex ka minti' ma txi kchyo'n, mya tu'nju ko oquel minti' kajben. 9Pero ten cycwente ti'j tu'n mi'n cycub tz'ak tuj il keju ch'in cyocslabl tu'nju tzokpi'n keye ti'j tu'n t-xi cychyo'ne. 10Porque ka at jun erman ch'in tocslabl ma que'yinte teya, aya at tnabla, k'ukla ti'j mes tuj cyja tilbilal in chyona chibj, ¿mlaypelo pon tc'u'j ti'j tu'n t-xi tchyo'n aju chibj in cub k'o'n te oyaj cywitz tilbilal? 11Ex tu'nju at tnabla ti'j jlu, c'elel tzpet termaniya ch'in tocslabl, aju o cyim Crist tu'n tlaj. 12Cyja'tzun, ka ma tz'ajtz jetpaj cynabl erman ch'in cyocslabl tu'n tlaj cychi'ye, ti'j Crist in cybincha'ne il. 13Cyja'tzun, ka tu'n tlaj nchi'ye cbel tz'ak wermaniye tuj il, mlayx txi nchyo'ne chibj, tu'ntzun mi'n tcub tz'ak wermaniye tuj il.

will be added

X\