1 Ti'j ju tzaj cytz'ibane weye tuj u'j, ax toc balo ba'n tu'n mi'n tcnet t-xu'jil xinak; 2 pero tu'n tlaj nimcu in cybincha'n aj pajil, mas ba'n teyle junjun xinak tu'n tten t-xu'jil ex teyle junjun xu'j tu'n tten tchmil. 3 Ate xinak mi'n cub t-xc'ayin tib te t-xu'jil; icxte xu'j mi'n cub t-xc'ayin tib te tchmil. 4 Ate xu'j minti' toclen ti'jx t-ximlal, ate chmilbaj at toclen ti'j; ax icx te chmilbaj minti' toclen ti'jx t-ximlal, ate xu'j at toclen ti'j. 5 Mi'n cub cyxc'ayin cyibe jun te juntl. Jacu bant icju, pero otok bant ti'j cyu'ne ex nok te cabe k'ij, tu'ntzun cycub tene tuj na'j Dios, ex tu'n toc cymojban cyibe juntl maj, tu'ntzun mi'n cyoque tuj joybil cyi'je tu'n Satanás tu'n tlaj minti' in cyjac'un cyibe. 6 Nok jun tumel ma txi nma'ne cyeye, mya jun mandamyent. 7 Nokwit ic cycyakil xjal ic tza'n kine, pero teyle junjun at tex toclen tzaj k'o'n tu'n Dios, junxitl toclen jun ex junxitl toclen juntl. 8 Pero cxel nma'ne cye keju minti' cymoj ex cye meba xu'j, mas ba'n tu'n cyten cyjunalx ic tza'n weye. 9 Pero ka minti' tumel tu'n cyjac'unte cyib, cyjyom cymoj, porque mas ba'n tu'n tcnet cymoj ex mya tu'n cyten nok in pon cyc'u'j ti'j jun cymoj. 10 Pero cxel nma'ne cye keju mejebni, tu'n mi'n tel tpa'n tib xu'j ti'j tchmil. Mya akine in chin k'mante jlu, ate Kajaw in k'mante. 11 Katzun ma tz'el tpa'n tib, cucx tu'n tcyaj ten, minti' tu'n tmoje' tuc'il juntl, ex ka tu'n tbant tten tuc'il tchmil tu'n tmoje' juntl maj tuc'il. Icx te chmilbaj, mi'n cyaj tcolin t-xu'jil. 12 Ex cye txkantl in xi nma'ne, mya ate Kajaw in k'mante, ka at jun erman mya ocslal t-xu'jil ex taj xu'j tu'n tten tuc'il, mi'n cyaj tcolin xjal t-xu'jil. 13 Ex ka at jun xu'j mya ocslal tchmil ex taj xinak tu'n tten tuc'il, mi'n cyaj tcolin xu'j tchmil. 14 Aju chmilbaj mya ocslal in tc'mo'n t-xtalbil Dios tu'nju ocslal t-xu'jil; ex aju xu'j mya ocslal in tc'mo'n t-xtalbil Dios tu'nju ocslal tchmil. Nokwit mya icju, icwitlo cyten cyc'wa'le ic tza'n cyc'wa'l mya ocslal, pero ja'lo ate' tjak' t-xtalbil Dios. 15 Pero ka taj tu'n tel tpa'n tib aju mya ocslal, pa'mil tib; ka ma tz'el tpa'n tib, entons tzokpi'ntl erman xinak ex ka erman xu'j, porque ma ko txconjtz tu'n Dios tu'n kten minti' k'oj kxol. 16 ¿Bi'npe tu'na xu'j ka jacu clet tchmila tu'na? Ex ¿bi'npe tu'na xinak ka jacu clet t-xu'jila tu'na? 17 Pero teyle junjun tu'n tten ic tza'nx toclen tzaj tk'o'n Kajaw, ex ic tza'nx ma txconjtz teyle junjun tu'n Dios. Atzun jlu in xi nma'ne cye cycyakil ocslal tuj junjun tnam. 18 Ka otok sircunsidarinjtz jun xjal tej ttxconjtz tu'n Dios, cucx tu'n tten icju; ex ka na'nxtok t-sircunsidarinjtz jun xjal tej ttxconjtz tu'n Dios, cucx tu'n tten icju. 19 Aju sircunsisyón minti' toclen, ex ka minti' ma bant sircunsisyón, ax minti' toclen; aju mas at toclen, tu'n tjapun tmandamyent Dios ku'n. 20 Teyle junjun xjal tza'nx tten tej ttxconjtz tu'n Dios cucx tu'n tten icju. 21 Ka jumajx tzyu'na te majen tej ttxconjtza tu'n Dios, mi'n bisuna ti'j. Pero ka at tumel tuj twitza tu'n ttzokpeta, ba'n, tz'oc tililx tu'na. 22 Porque aju majentok tej ttxconjtz tu'n Kajaw, tzokpi'ntl ja'lo ex ma tz'oc tuj tcwent Kajaw; ex aju tzokpi'ntok tej ttxconjtz tu'n Kajaw, majen te Crist ja'lo. 23 Porque ma che lak'ete ex nimxix lok'ben cyeye; cyja'tzun mi'n txi cyc'ayin cyibe cye xjal. 24 Erman, teyle junjun tu'n tcyaj ten twitz Dios ic tza'nx tten tej ttxconjtz. 25 Atzun cyi'j keju na'nx cymoje', minti' jun yol tzaj tma'n Kajaw weye cyi'j; pero cxel nma'ne cyeye aju ma cub nximane, porque ma tzaj k'ak'an tc'u'j Kajaw wi'je ba'n tu'n tke' cyc'u'je wi'je. 26 Ba'n te jlu tuj nnable, tu'n tcyaj ten xjal ic tza'nx tten, tu'n tlaj nim yajbil ke at ja'lo. 27 Ka at t-xu'jila, mi'n ximana ti'j tu'n tel tpa'n tiba ti'j. Ex ka minti' t-xu'jila, mi'n ximana ti'j tu'n tmoje'ya. 28 Pero ka ma moje'ya, minti' in tbincha'na il; ax icx te k'apoj ka ma moje', minti' in binchan il; pero akeju in che moje', tzul yajbil cye tuj cychwinklal tzalu twitz tx'otx', ex atzun waje tu'n mi'n cyc'ulba'ye jlu. 29 Atzun jlu in xi nma'ne erman: Nok nic'xi k'ij taj tu'n tul Kajaw. Ja'lotzun, keju at cyxu'jil, tu'n cyten ic tza'n minti' cyxu'jil; 30 ex keju in che ok', tu'n cyten ic tza'n minti' in che ok'; ex keju in che tzalaj, tu'n cyten ic tza'n minti' in che tzalaj; ex keju in che lok'on, tu'n cyten ic tza'n minti' at cye; 31 ex keju in ajben cyu'n aju at twitz tx'otx', tu'n cyten ic tza'n minti' in ajbenxix cyu'n; porque tcyakilju in baj twitz tx'otx' cyja' tnaj. 32 Atzun wajbile tu'n mi'n tbaj cyc'u'je; aju xjal minti' t-xu'jil, toc tc'u'j ti'j tu'n tajben te Kajaw tu'ntzun ttzalaj Kajaw ti'j; 33 pero aju xjal at t-xu'jil, toc tc'u'j ti'j ju te twitz tx'otx', tu'ntzun ttzalaj t-xu'jil ti'j. 34 Ax icx mya junx ta' jun xu'j at tchmil ex jun xu'j minti' tchmil. Aju xu'j minti' tchmil, toc tc'u'j ti'j tu'n tajben te Kajaw, in xi tk'o'n t-ximlal te Dios tuc'ix tanmi tu'n tajben o'cx te; atzunju xu'j at tchmil, toc tc'u'j ti'j ju te twitz tx'otx' tu'ntzun ttzalaj tchmil ti'j. 35 Ma txi nma'ne jlu cyeye tu'n tajben cyeye, pero mya tu'n cycub ntzyu'ne, nok o'cx waje tu'n cytene tuj tumelxix ex tu'n cyajbene te Kajaw minti' jun makol cyeye. 36 Pero ka at jun ma cub t-ximan ka mya ba'n tu'n tcub ttzyu'n tme'jel ex otok pon tabk'iyil, ex ka il ti'j tu'n tmoje', bincham alcyeju tajbil; ba'n tu'n tmoje', mya il jlu. 37 Atzunju xjal junx t-ximbetz, ex mya il ti'j tuj twitz tu'n tmoje' tme'jel, axte xjal tajwil tnabl, ka ma cub t-ximan tuj tanmi tu'n mi'n t-xi tk'o'n tme'jel, ba'n in tbincha'n. 38 Cyja'tzun, alcye jun xjal in xi tk'o'n tme'jel tu'n tmoje', ba'n in tbincha'n; ex alcye jun xjal minti' in xi tk'o'n tme'jel tu'n tmoje', mas ba'n in tbincha'n. 39 Aju xu'j at tchmil, toc tuj tcwent tchmil tu'n ley itz'xcu tchmil; katzun ma cyim tchmil, tzokpi'ntl te xu'j tu'n tmoje' tuc'il juntl nok al uc'il tajbil, pero tuc'il jun ocslal ti'j Kajaw. 40 Pero weye tuj nnabl, mas at tzalajbil te xu'j ka cucx ma cyaj ten; ax icx ma cub nximane ka ax T-xew Dios at wuc'ile.
Copyright ℗ 2000 Hosanna Grabado por Producciones Cristianas Vina