1 Corintios 6

1Ka at jun cyxole at tk'oj ti'j juntl, ¿tza'n tten in xi' xtisil cywitz ke aj sanjelal mya ocslal ex mya cywitz ke ocslal? 2¿Minti'pe ba'n cyu'ne, ke xjal tuj tcyakil twitz tx'otx' che oquel tuj xjel cyu'n ocslal? Katzun cyu'ne che oquel xjal tuj xjel, ¿maj mlaytzun bant ti'j cyu'ne aju nok ch'in t-xilen? 3¿Minti'pe ba'n cyu'ne oc che oquel ke anjel tuj xjel ku'n? ¿Yajtzunju in baj kxol ja'lo, mlaypelo bant ti'j ku'n? 4Katzun in che xtisine ti'j ju in baj cyxole ja'lo, ¿maj in che oc cyk'o'ne te jwes keju nok ch'in cyoclen cyxol ocslal? 5In xi nma'ne jlu tu'n ttzaj cych'ixwiye. ¿Maj minti' jun cyxole at tnabl tu'n toc te jwes cyxol terman? 6Atzun jlu in cybincha'ne: In k'ojin jun erman ti'j juntl erman, in che xtisin cywitz ke aj sanjelal mya ocslal. 7Ax toc at cypaltile ti'j jlu tu'nju at cyk'oje cyxolxe. ¿Myapelo mas ba'n tu'n tic'x cyu'ne aju mya ba'n in binchanjtz cyi'je? ¿Myapelo mas ba'n tu'n t-xi elk'a'n aju at cyeye? 8Pero jlu ax keye in cybincha'ne mya ba'n ti'j juntl ex in che elk'ane, ex cyi'jx erman in cybincha'ne jlu. 9¿Minti'pe ba'n cyu'ne, ke xjal mya tz'aklxix minti' cyoclen ti'j tcawbil Dios? Mi'n che tzpete ti'j; keju in che yaẍin, ke c'ulul cywitz ke tilbilal, ke aj pajil, keju nno'c cyk'on cyib te xu'j, ke xinak in pon cyc'u'j ti'j xinak, 10ke elek', keju in pon cyc'u'j ti'j nimcu, ke c'al k'e'n, keju in che yasun ex keju in che elk'an tu'n sbubl, cycyakil jlu minti' cyoclen ti'j tcawbil Dios. 11Ex ictzun cyten junjun cyeye ojtxi; pero ma che tx'jete ja'lo, ex ma che el pa'ne tu'n Dios tu'n cyajbene o'cx te, ex ma che oc k'o'ne te tz'aklxix tu'n Dios nok tu'n Kajaw Jesús ex tu'n T-xew Kdios. 12At jun yol in cyma'n xjal cyja': Ba'n tu'n tbant ku'n nok alcye kajbil, che chi. Ax toc jlu, pero mya tcyakil jacu tz'el ba'n te cye. Ax toc jacu bant wu'ne nok alcye wajbile, pero mlay txi nk'on wibe tu'n ntene tjak' tcawbil. 13Aju chibj in ajben te kc'u'j, ex atzun kc'u'j in ajben te tcubix chibj; pero tza'nx jun ax icx juntl che najel cycabil tu'n Dios. Pero aju kximlal myatzun tajben tu'n tbinchet aj pajil, nok o'cx tu'n tajben te Kajaw, atzunte Kajaw tu'n tajben te kximlal. 14Ate Dios jaw ank'in Kajaw tu'n; ax icx ke ko jawil ank'in tu'n, tu'n tipumal. 15¿Minti'pe ba'n cyu'ne ka aju cyximlale te Crist? ¿Maj c'elel wi'ne aju te Crist tu'n t-xi nk'o'ne te jun xu'j aj pajil? Mlayx. 16¿Minti'pe ba'n cyu'ne ka at jun ma tz'oc tmojban tib tuc'il jun xu'j aj pajil, junx ma tz'oc t-ximlal tuc'il? Porque in tma'n tuj Tu'jil: Cycabil che oquel te junx. 17Pero alcye jun ma tz'oc tmojban tib tuc'il Kajaw, junx cyanmi tuc'il. 18Cyel oke ti'j ju yaẍbil. Alcyechakx juntl il ma tbincha xjal, mya ti'j t-ximlal in binchan il; pero alcyeju in binchan aj pajil, in binchan il ti'jx t-ximlal. 19¿Minti'pe ba'n cyu'ne, aju cyximlale tja Xewbaj Xjan aju at tuj cyanmiye, aju ma tzaj k'o'n cyeye tu'n Dios, ex mya cycwent-x cyibe? 20Porque o che lak'ete ex nim lok'ben cyeye; cyja'tzun cynimsa'nctze Dios tuj cyximlale [ex tuj cyanmiye, porque te Dios ke cycabil].

will be added

X\