1 Corintios 5

1Ax toc ma tz'el tkanil at jun ma tbincha aj pajil cyxole, at jun ma txi ti'n t-xu'jil tman tu'n toc te t-xu'jil; minti'lpe in cybincha'n xjal mya ocslal icju. 2Atzun cyeye ma jaw cyniman cyibe. Mas ba'nwtlo nokwit tzaj cybise ti'j jlu ex bi'x tu'n tel k'i'n cyxole aju binchante jlu. 3Ax toc, masque mya atine cyuc'ile, pero at wanmiye cyuc'ile, mer ic tza'n ax atine cyuc'ile ma cub t-sentens wu'ne aju ma binchante jlu. 4Oc toc cychmon cyibe tuj tbi Kajaw Jesús, tuc'ix wanmiye ctel cyuc'ile ex tuc'ix tipumal Kajaw Jesús, 5ba'n tu'n t-xi k'ot ju xjal lu tuj tcwent Satanás tu'n tnaj tchibjal, tu'ntzun tclet tanmi tuj tk'ijlalil oc tul Kajaw Jesús. 6Mya ba'n tu'nju ma jaw cyniman cyibe. ¿Minti'pe ba'n cyu'ne, tcyakil tk'otjil pan in jaw mal tc'u'j tu'n ch'in t-samel? 7Cyi'meltzune cyxole aju ojtxi t-samel pan tu'n cyoque ic tza'n tk'otjil pan ac'aj, porque ic cytene ic tza'n pan minti' t-samel tu'n tjaw mal tc'u'j. Porque ma cub byo'n Crist tu'n tchjet kil ic tza'n jun tal ẍne'l tu'n tic'set Xjan K'ij. 8Cyja'tzun, ko ic'san nink'ij mya tuc'il ojtxi t-samel pan, atzun in tma'n tu'n mi'n kximan ti'j mya ba'n ex tu'n mi'n kbinchante mya ba'n, pero ko ic'san nink'ij tuc'il ju pan minti' t-samel, atzun in tma'n minti' tz'il tuj kanmi ex ax toc kyol. 9O txi ntz'ibane cyeye tuj u'j tu'n mi'n toc cysmon cyibe cyuc'il ke aj pajil. 10Minti' xi nma'ne tu'n tel cypa'n cyibe te jumajx cyi'j ke aj pajil ate' cyxol xjal, ex ka cyi'j keju in pon cyc'u'j ti'j nimcu, ex ka cyi'j ke elek', ex ka cyi'j ke c'ulul cywitz tilbilal; nokwit te jumajx tu'n tel cypa'n cyibe cyi'j, ilxixwitlo ti'j tu'n cyic'e tzalu twitz tx'otx'. 11Atzun jlu xi ntz'ibane cyeye, ka at jun toc tbi erman, ex ka in tbincha'n aj pajil, ex ka in pon tc'u'j ti'j nimcu, ex ka in c'ulun cywitz tilbilal, ex ka in yasun, ex ka c'al k'e'n, ex ka elek', mi'n tz'oc cymojban cyibe tuc'il, ex mi'n che wa'ne junx tuc'il. 12Porque ¿ti woclene tu'n cyoc tuj xjel wu'ne keju mya ocslal ke? Porque ake jlu tu'n Dios che oquel tuj xjel. Atzun ke ocslal ate' cyxole, ba'n tu'n cyoc tuj xjel cyu'ne. Cyja'tzun, aju xjal binchal mya ba'n, cyi'mele cyxole.

will be added

X\