1 Corintios 4

1Cyja'tzun, che ximanwt xjal ki'je ka ajbel ko'ye te Crist, ex tuj kcwente ma tzaj k'o'n tu'n t-xi kma'ne tyol Dios aju ewantok nej. 2Cyja'tzun, akeju ma tzaj k'o'n ak'untl tuj cycwent, teyle junjun ilxix ti'j tu'n tjapun tajbebl tu'n. 3Ka ma chin oque tuj xjel cyu'ne ex ka cyu'n xjal, mya ma'xix t-xilen jlu tuj nwitze; ex mya wu'nxe in chin oque tuj xjel. 4Minti' na'n wu'ne ka at jun mya ba'n o nbinchaye, pero myatzun tu'n jlu tu'n t-xi nma'ne ka tz'aklxix kine, ate Kajaw ck'malte ka at wile ex ka minti'. 5Cyja'tzun mi'n txi cyma'n naje jun cyyole ti'j juntl, che ayone ti'j Kajaw oc tul, ate cchic'balte aju ewan tuj klolj, ex c'elel tuj k'ancha'l tu'n, aju in che ximan xjal ti'j tuj cyanmi; cyja'tzun teyle junjun oc tc'ma' nimbil te tu'n Dios. 6Tcyakil jlu ma txi ntz'ibane cyeye erman, in chin yoline wi'jxe ex ti'j Apolos tu'n koque te jun yec'bil cyeye, tu'ntzun tel cycano'ne ki'je, tu'ntzun tjapun cyu'ne aju tz'iban tuj Tu'jil, tu'ntzun mi'n tjaw cyniman cyibe ex tu'n mi'n cymanteye ka mas ba'n jun tmajen Dios twitz juntl. 7Porque ¿alcye ma k'mante ka mas ba'n keye twitz juntl? ¿Ex atpe jun at cyuc'ile mya tu'n Dios tzaj k'o'n cyeye? Katzun ma tzaj k'o'n cyeye tu'n Dios, ¿tiku'ntzun in jaw cyniman cyibe ic tza'n mya tu'n Dios tzaj k'o'n cyeye? 8In cyma'ne ka nojni cyc'u'je wen, ex ka ma che oque te k'inun, ex ka ma che oque te rey, atzun keye minti' koclene tuj cywitze. Cuchiwt ax toc ma che oque te rey, tu'ntzun icx keye tu'n koque te rey junx cyuc'ile. 9Porque tuj nnable, ako'ye apostl ma ko oc k'o'ne tu'n Dios te cyque'ybetz xjal, ma ko oque mas tal ch'in cywitz cycyakil xjal, mer ic tza'n ma cub ksentense tu'n kcyime; porque ma ko oque te cyque'ybetz cycyakil, cywitz anjel ex cywitz xjal. 10Ma ko oc k'o'ne minti' knable tu'n tlaj Crist, atzun cyeye ma che oque te aj nabl tuc'il Crist. Keye minti' kipune, atzun cyeye at cyipune. Akeye in che nimanjtze, atzun keye ic'un ko'ye. 11Cucx tic'x we'yaj ku'ne, cucx in txket ti'j kc'u'je, cucx ktene minti' kxbalune, cucx in ko oc bju'ne, ex minti' kjaye. 12Nim in ko sicte in ko ak'nane tu'n kk'abe. Oc in ko oc yaso'ne, in ko yoline ba'n cyi'j xjal. Oc in ko yajlanjtze, nnic'x ku'ne. 13Oc in che si'min xjal yol ki'je, in che'x ktzak'we'ne tuj mansbajil. Ma ko oc k'o'ne te minti' kajbene, ma ko oque ic tza'n tz'is tuj cywitz cycyakil xjal. 14Minti' in xi ntz'ibane jlu tu'n ttzaj cych'ixwiye, nok o'cx tu'n t-xi nk'o'ne cynable, ic tza'n nc'wa'l keye c'ujla'n keye wu'ne. 15Porque masque at laj mil k'ol xnak'tzbil cyeye ti'j Crist, pero mya nim cymane at; porque ma chin oque te cymane tu'nju ocslal keye ti'j Jesucrist tu'nju xi nma'ne tkanil colbil cyeye. 16Cyja'tzun chin cubsale cywitze tu'n tel cycano'ne wi'je. 17Tu'ntzun jlu ma txi nsama'ne Timotey cyuc'ile. A Timotey nc'wa'le at-xix nc'u'je ti'j ex ocslalxix ti'j Kajaw, ctzajel tna'n cyeye tza'n ntene tuj wocslable ti'j Crist, ic tza'n xnak'tzbil in xi nk'o'ne tuj tcyakil lugar ex cyxol cycyakil ocslal. 18Pero at junjun cyeye jawni cywitz, tuj cynabl ka mlay chin pontle cyuc'ile. 19Pero chin xel naje cyuc'ile ka tajbil Kajaw; c'eleltzun nnic'e cyi'j keju jawni cywitz ka ax toc at cyipumal, mya nok o'cx tu'nju cyyol c'elel nnic'e cyi'j. 20Porque jun xjal ma canun tuj tcawbil Dios, mya tu'n tyol c'elel knic' ti'j, nok o'cx tu'nju tbinchben. 21¿Alcye cyajbile? ¿Cyajpeye tu'n nxi'ye cyuc'ile tu'n cybaj wasyaline, ex ka tu'n tten nc'ujlalile cyi'je ex mans kine?

will be added

X\