1 Cyja'tzun erman, minti' in chin yoline cyuc'ile ic tza'n in chin yoline cyuc'il ocslal in cybincha'n tajbil T-xew Dios; nok o'cx in chin yoline cyuc'ile ic tza'n na'nx t-xi cynimane T-xew Dios; ic tza'n tal c'wa'lx keye tuj cyocslable ti'j Crist. 2 Aju xnak'tzbil xi nk'o'ne cyeye nok ch'in tnabl; ic cytene ic tza'n jun tal c'wa'l nok ta'l imj in xi' tu'n ex mya wabj, porque na'nxtok tbant cywane. Ax icx ja'lo na'nx t-xi wabj cyu'ne, 3 porque cucx t-xi cynimane aju cyexe cyajbile, cucx ttzaj tlo'ch cyc'u'je cyi'j mastl, cucx cyk'ojine ex atx pabl tib cyxole. ¿Myapetzun ax cyajbile in xi cynimane, ex in che ank'ine ic tza'n ke xjal mya ocslal ke? 4 Porque oc in tma'n jun: Te Pablo kine, ex oc in tma'n juntl: Te Apolos kine, ¿myapetzun ax cyajbile in cybincha'ne icju ic tza'n cye xjal in cybincha'n? 5 ¿Titzun woclene? ¿Ex titzun toclen Apolos? Ajbel ko'ye te Dios, nok tu'n kyole ma che ocslane ti'j Kajaw ic tza'nx ju koclene tzaj tk'o'n Dios. 6 Wu'ne cu'x wawa'ne iyaj, atzunte Apolos oc ten a'lilte, ex atzunte Dios ch'isal te. 7 Cyja'tzun, aju awalte minti' toclen, tuc'ix ju a'lilte minti' toclen; nok o'cx Dios at toclen; porque atzun ch'isal te. 8 Aju awalte tuc'ix ju a'lilte junx ta' cyoclen; ex teyle junjun oc tc'ma' chojbil te ti'j ju tak'unben. 9 Porque junx in ko ak'nane, in ko ajbene te Dios; atzun cyeye tawal Dios keye. Ax icx jun ja keye bincha'n keye tu'n Dios. 10 Aju t-xtalbil Dios tzaj tk'o'n weye tu'n tcub nk'o'ne simyent ic tza'n jun binchal ja nim tnabl, ex juntl in jaw binchante ju ja tibaj simyent; teyle junjun tu'n toc tk'o'n tcwent ti'j tza'n tten tu'n tjaw tbincha'n. 11 Porque mi a'l jun xjal jacu bant tu'n tu'n tcub tk'o'n juntl simyent, nok o'cx aju simyent ma cub nk'o'ne, atzun Jesucrist. 12 Ka at jun xjal ma jaw tbincha'n k'an pwak tibaj ju simyent lu, ex ka sak pwak, ex ka tal abj in che koptz'aj, ex ka tze', ex ka ch'im, ex ka tkan cjo'n, 13 ck'ancha'lil tak'unben teyle junjun, porque c'elel tuj k'ancha'l tuj tk'ijlalil jwisi, porque tu'n k'ak' c-yec'etel nok alcyex tak'unben junjun. 14 Ka at jun xjal ma cyaj ten tak'unben aju jaw tbincha'n tibaj simyent, oc tc'ma' chojbil te. 15 Ka at jun xjal ma cub tz'e'y tak'unben, bi'xtzun cnajel tak'unben, pero ate xjal ccletel, ic tza'n tuj k'ak' otok tz'etz. 16 ¿Minti'petzun bi'n cyu'ne ka tja Dios keye ex najl T-xew Dios tuj cyanmiye? 17 Ka at jun xjal ma cub xitunte tja Dios, ax Dios cbel xitunte xjal, porque aju tja Dios xjante, ex akeye tja Dios. 18 Cuchiwt mi jun tu'n t-sbun tib. Ka at jun cyxole in ximan ti'j ka at tnabl ic tza'n cye xjal tuj tk'ijlalil ja'lo, k'o'nc tib ic tza'n minti' ch'in ba'n tu'n, tu'ntzun toc te aj nablxix. 19 Porque aju cynabl xjal minti' ttxolil nne'l tuj twitz Dios; porque in tma'n tuj Tu'jil: In che tzyet ke aj nabl tu'n Dios masque jawni cywitz. 20 Ex juntl maj in tma'n: Ba'n tu'n Kman, minti' tajben aju cyximbetz ke aj nabl, chi tuj Tu'jil. 21 Cyja'tzun, mi jun tu'n tmante ka at jun tmajen Dios mas ba'n twitz juntl, porque cyeye tcyakil, 22 ka a Pablo, ex ka a Apolos, ex ka a Pedro, ex ka tcyakilju at, ex ka aju chwinklal, ex ka ju camic, ex ka aju at ja'lo, ex ka aju tzul, cyetzune tcyakil; 23 ex akeye te Crist keye, atzunte Crist te Dios te.
Copyright ℗ 2000 Hosanna Grabado por Producciones Cristianas Vina